1 Neme ta ne zhi teyi ndi ate ŋun ikpa mɔr kɛ gɔŋmimi, tɛ zǝr kǝ, Arik atei yi nǝ kɔb kǝ shu ikǝ sɔŋ mɔr, ikɔb kǝŋ ndi iwa nɛ mɛ kǝ nǝ tu maa, ikǝŋ ndi tei yimɛ iyaŋ klɛtu. 2 Neme ta kɔr asusun, te ŋub te Yesɔ abɛ suu ta ikpa kɛ gbarshu, 3 ankyak atei su ta kpa, ba ta tei yi mgbawun ba. 4 Ndi ta ri yi ne kpa kǝŋe, ta yi ne mɔ, ba ta wɔb te ta bǝ yi mgbawun ba ama Yesɔ abɛ suu ta iki yi shu, tǝ kpa kɛ yaŋ ku bǝ mli kǝ ku dɔmɔ. 5 Fe ayi Arik wa ne na ta netu ki yiŋe te bǝ nyak Izhu maa aŋub tama, tǝ duŋ ta bǝ zhi iki yiŋ ndi nyɛɛ ta nǝ ti.

6 Ndi amɛ ta yine zhɔk susun tena zhi te ta yine kɔb ne miŋ kɛ kpa ta yi shaan bǝn Ŋgɔŋ. 7 Ta tsǝn ne tanyɛmɛ, banǝ yik ayi ba. 8 Ta yine zhɔk susun, te di, ne rɛ te tabǝ duŋ kpa kɛ be kǝŋe te sɔŋ bǝn Ŋgɔŋ ne kɔb. 9 Waŋa ai ki sak ayi mɔr ben Arik te tabǝ sigu susun, kɔ tabǝ yi ne kpa kǝŋe ka tayi gbagbaŋ ma ne kǝ. 10 kɔ tabǝ yaŋ ta nyɛmɛ ta tei ru kli ne ti kɛ Kristi ne amkpa ane te ambuk amaa, te kɔte ŋɔwa abɛ ta kiyiŋ ndi ne teu anenen ki yiŋ ndi ne nai ne kpa kǝŋe, kɔte yi didik kɔ mimin.

11 Ndi amɛ, fe, tane zhi klu sǝsǝk Arik, tane te tabǝ vuŋ atu aneshire. Iki ndi ta yime iyi ndende ne ti kɛ Arik, fe Ŋgam myik inayi ndende ne dur min. 12 Ba ta wɔb te tabǝ gbar atu amɔr asak ben abɛ zhin ba, neme ta nek zhin alɛla awaŋa te zhin bǝ gah ben abɛta, te duŋ zhin sak abaŋ ndi alǝk atu amen ne ki ndi ayige neyi inaŋ yiŋ ndi ikur ne miŋ susun. 13 Ate yi ndi atu amɔr ba yi anenen ba, ai ayi atu ayi Arik; ate yi ndi atu amɔr ayi anenen, ayi ne atu amin. 14 Ndi tanyɛme iyi Kristi ne shak ta asusun, te ta ne tanyɛme te di Izhiin ne ku netu aneshir bɔbɔk, fena aneshir ne ku bɔbɔk. 15 Ndi amɛ Yesɔ ne ku ne atu amɔr bɔbɔk, te abaŋ ndi ayi atsitsir kǝr abɛ sɔŋ iyi atu amen ba ama iwaŋ ndi ne ku ne atu amene ne lɛgu ne bɛ me.

16 Ankyak nak baŋ rɛ azizaŋa te kɔmɔ ne ti bata tɔ nuŋ ne tɔi kpa kɛ goŋ mimi kǝŋe ba. Fena tane ben tɔ Yesɔ iyaŋ shaga ayi, bata nak ri na me ba. 17 Ndi amɛ, inuŋ waŋ ndi ayi ne miŋ kɛ Kristi, ayi ner yayas; kiki yi kukub neka gayir, yayas neka nyɛ! 18 Kiki yiŋɛ bɔbɔk ire ben Arik, iwaŋ ndi ne biŋ ta ne tu maa ne ŋɔk kɛ Kristi tena nek ta ndum kɛ biŋ atu aneshir: 19 te Arik ne biŋ goŋ mimi ne tu maa ne ŋɔk kɛ Kristi, bane bla lalɛ aneshir ne atu amen ba. Ne na nek ta lɛ kɛ biŋ aneshir ben Arik. 20 Fena ta yi ayi Kristi ndi Arik ne duŋ ta yi abɛ biŋu aneshir ta ben zhin nǝ zhi iyi kristi: Izhin bǝ nek Arik atu min. 21 Arik wa ne duŋ Yesɔ ndi bai nǝ lalɛ ba te bɛ yine lalɛ ne tu mɔr, te bǝ yi ne tu maa ta bǝ yi tsetser ben Arik.