1 Fe Yesɔ abla abɛ tsene maa nkanlɛ te abɛ ben Arik iyaŋ mkpaŋ kǝr abɛ tun susun ba. 2 Adi: <<Nǝ ntun nuŋ iyiŋɛ ine te ŋas ayime ndi ba klu sisik Arik ba kai bɛ lɔ wɔ lɔ susun aner. 3 Nǝ ntuno iwakɔ nuŋ azǝn zeu gar te ben, <Yir min mɔr bǝn waŋ ndi awɔb zhaku muŋ.>

4 <<Ne lɔ di wa akyak. Te nalɔ di ne susun maa, <Mni nzhi bam klu sisik Arik ba bam na nkam tɔ aneshir ba, 5 ndi kime iye mee wakɔmɔ adam me, M tei nǝgu ikiyiŋ ndi iyi maa, kǝr abɛ zen nyɛ te dam me ba!>>>

6 Fe Arik Ŋgɔŋ adi, <<Wɔ zhin ki yiŋ ndi ne yaŋ te ambuk zub waŋa adi. 7 Fena Arik bai lɔ wɔ zhin kɛ abaŋ ndi ne hria ba kai, ndi azhin ashuru aririk bǝn bu kai?Ai lɔ kyak wɔ bai? 8 Mbla zhin, atei nek kɔte ŋɔwa ikiyiŋ ndi iyi anenen. Ndi iye mee, ne bɛr yi nyɛ Izu Neshir, atei yik itanyɛmɛ ne gɔnmimi? >>

9 Fe ne bla nkanlɛ tedi, aneshir abaŋ ndi ne tanyɛmɛ ne kpa men te ba naki didik, te bene yik nki aneshir bayi ikinuŋ ba, adi: 10 <<Anere yaa ne gar ben Arik ne Akabakɔŋ, nuŋ aye awɔnǝ Ferisawa ine yaa ma ata gendu. 11 Awɔnǝ Ferisawa ma alu akli adidik te ben yi gbaar atu amaa sak: <Arik, Mne nye ru te bam yi ndi nki aneshir ba, abɛ zhib, abɛ na ki mimin abɛ ze amba, te vuŋ waŋ ndi ata gendumɔ. 12 Mkpaŋ anu amkpaŋ ayaa ne min kɛ sati, ikiyiŋ ndi mtǝ yik mtun zhiin ne min kɛ wur nek.>

13 Ndi amɛ, ine ta gendumɔ aklɛ shaan, bane lɛk ayi atɔ shumɔ ba, fe atsik asa amaa te bene di, <Arik, wɔ lɔ susun muŋ, myi ne lalɛ.>

14 <<Mdik mbla zhin te neshir waŋa, ne kama kɔmɔ ne kɔ maa te Arik ne ŋlau azhɔk anaŋ ne ŋur asa yuŋɔ, te waŋ ndi ate lɛk tu maa atei gliu azime, iwaŋ ndi ate Gli tu maa azime, atei lɛgu.>>

15 Aneshir ne gliu amumun amen te nyɛ ben Yesɔ te bɛ sak ba ŋɔk. Abɛ tsene maa te yik amɛ, akɔ tsaŋ ba. 16 Ankyak Yesɔ akɔ zhɔ amumune tedi, <<Duŋ zhin amumune abaŋa anyɛ bene bɛm, duŋ yar zhin neba ba, te kɔb Arik ŋgɔŋ kɛ shu iyi men. 17 Mbla zhin lɛ didik, ate yi ndi waŋ ndi bate ta nyɛmɛ ne kɔb Arik ndi vǝvǝn vǝtsɔb ba, ba tei yir kɛ ba ne mla yaŋ klɛtu.>>

18 Ngɔŋ ne yine ŋɔgo aribu, <<Ine tsar didik, M tei na kikin tem ta ivli kǝ yaŋ klɛtu?>>

19 Fe Yesɔ adiu. <<Anii duŋu zhɔm te ne tsar didik?>> <<Inuŋ ne rɛ ba na yime ba aye Arik ankyak. 20 Une zhi ilɛ kǝ kpa nyak: <Duŋ ze amba ko ze alulum ka, duŋ ŋun neshir ba, duŋ zhib ba, duŋ ta lɛ ndi bau nǝ zhi ki ba, nek tetɛɛ mi ben yaa mi ŋgɔŋ men.>>>

21 <<Iki yiŋɛ bɔbɔk mni men zee ire mkpaŋ kɛ tashi lu rɛ nzak muŋ,>> adi.

22 Ndi Yesɔ ne wɔ amee, adiu, <<Ikinuŋ yaŋa. Leb adudunki ayiŋ ndi uyime neyi te nek abɛ yaŋ kinuŋ, teu tei yik ki tetɛk ne shu. Tǝ kashe zǝm.>>

23 Ndi ne wɔ mee, akɔ te mfu ŋgɔŋ, te iwa ayine ŋɔk. 24 Yesɔ ne yigu amɛ te di, <<Itei yini iya te ner ne yi ne adudunki abɛ yir ikɔb Arik! 25 Nǝ tǝ te lakurmi abɛ zǝ mblu alura inaŋ ndi neshir ne ŋɔk abɛ yir kɔb Arik.>>

26 Abaŋ ndi ne wɔ amɛ arib, <<Tei ŋɔwa atei li aru i?>>

27 Yesɔ asaga, <<Iki yiŋ ndi naŋ neshir ben Arik bai naŋ ba.>>

28 Biturus adiu, <<Tane duŋ ki bɔbɔk te zee wa!>>

29 Mbla zhin lɛ didik, Yesɔ adi ba, <<Baa nuŋ ndi ne duŋ kɔb, te duŋ wa, te duŋ amunzu, amunva, atetɛ ka ye amumun ne sak kɛ kɔb Arik 30 ndi atei yik ki tetɛk azizaŋa bǝn ivli kǝ yaŋ klɛtu naŋ yi kukub yime, ne gbarshu ba atei dɔ ba.>>

31 Yesɔ ne gli awur ane yaa ma gar nkɔnsa te diba, <<Ta kɔmɔ ne Urshelima, kiyiŋ ndi ne cɛrǝ ne nkanlɛ yi abɛ bla shar yi Arik ne atu yi Izu Neshir ne shaga. 32 Atei baŋu nek abaŋ ndi bai ŋli Yahudawa ba. Atei mlagu, ateu mla, te sɛre ntǝ shuru, te tsǝgu, tena ŋunu. 33 Iber yi ntar atei na lu.>>

34 Abɛ tsene maa inuŋ ba ne zhi iki yiŋ ndi tsǝn ba, te ilɛmɛ menyi kuŋkum bene beba, bane mǝne zhi kiyiŋ ndi ne blai ba.

35 Ndi Yesɔ ne te gbahir ne ntun yi Jerikɔ, iner ne amfik asɔŋɔ ben ne kɔno ankɔŋ. 36 A shur atɔŋ te wɔ aneshir azǝn gayir, a rib ka ye anii tsǝn. 37 A blau, <<Ai Yesɔ awɔnǝ Nazara agayir.>>

38 Akɔ zhɔ, <<Yesɔ, Izu Doda, wɔ lɔ susun ne atɔ muŋ!>>

39 Abaŋ ndi ayi ne tii maa akɔ tsaŋu abɛ kwɔnu ayi ndi a shɔgu, a ŋar kɔr, <<Izu Doda, wɔ lɔ susun muŋ!>>

40 Yesɔ agbur aklɛ tedi abɛ glii wa neshire. A te te gbahir, Yesɔ aribu, 41 <<Aye nii mnau neyii?>>

<<Ŋgɔŋ, tem yik!>>

42 Fe Yesɔ akɔ diu, <<Duŋ ayi ami abɛ tɔ; itanyɛmɛ mi ne duŋu rɛ.>> 43 Andanda ayi amaa bu akɔ zǝ Yesɔ, te nyer Arik. Ndi aneshir ne yik amɛ, akɔ nyɛr Arik menyi.