1 Ndi Yesɔ ne yir Jerikɔ te gara zǝ min ntunɔ. 2 Fe neshir nuŋ waŋa ndi azhɔu te Zaka; ayi ŋgɔŋ ne min kɛ abɛ ta gendu, ana yi ne adudunki. 3 Ne wɔb yik ka ai ŋɔwa ayi Yesɔ mɔ, ama ne lak akana te yi ner vǝmkpuk, aneshir neyi ne du. 4 Akɔ klu akɔmɔ ne tii te gar ayuŋ tiŋ bwab asɔŋɔ tǝ bɛ yigu, ne zhi te Yesɔ atei zǝ amɔ.

5 Ndi Yesɔ ne yir amkpama, a lɛk ayi atɔ shumɔ te diu, <<Zaka, zi andanda, M tei ŋgar kɔmi aliŋǝ.>> 6 Akɔ nama azǝ te tau aŋɔgɔ yaa.

7 Aneshir te nak ayik amɛ, akɔ lɛ mumur, <<Ne yir kɔb kɛ ne na zumimin.>>

8 Fena Zaka alu aklɛ adidik tedi Ŋgɔŋ, <<Tǝ,Ŋgɔŋ! Baŋ rɛ aliŋ, iki yiŋ ndi yi muŋ M tei ŋgab nkime nek abɛ yaŋ adudunki, fe te yi ndi mne nkyer kinuŋ nta ben nuŋ, M tei yai amkpaŋa nas.>>

9 Yesɔ adiu, <<Aliŋe ita zhɔk ne yir kɔb kǝŋe, te neshir waŋa maayi, ayi izu Ibrai. 10 Tǝ Izu Neshir ne nyɛ te bɛ wɔb tena ta iki yiŋ ndi ne dɔ azhɔk.>>

11 Ndi ne asɔŋ azǝn wɔu, Yesɔ a blaa ba nkanlɛ, ndi ne te gbahir ne Urshelima, ndi aneshir ayik te di kɔb Arik itei nyɛ andanda. 12 Adi, <<Neshir waŋ ndi ne ŋliu ne kɔb ŋgɔŋ ne gar ntun nuŋ yi lak te bɛ nyɛn wa Itum tɛka kama nyak. 13 Fena, alu azho agɛn amaa amɛ wur te nek ba azɔb amɛ wur tedi, <Kam zhin aŋɔgɔ neyi, mla ne nyak muŋ.>

14 Ankyak agɛn amaa akɔ kyagu, te lu ashar anuŋ ne goŋ maa te bɛ blau, <Ba ta ne tanyɛme te neshire abɛ yi itum amɔr ba.>

15 <<Ne shuru itum, ndi amɛ, ne nyak kɔb. Fena, akɔ duŋ azho agene abaŋ ndi ne nek ba azɔb ayi kam aŋɔgɔ, te wa abɛ zhi kɔ ayi kin kɔte ŋɔwa ne yik ne sɔŋ ne tumɔ.

16 Fe ine kuti me anyɛ di, <Ngɔŋ, azɔb ayiŋ ndi une nǝm ma, mne kam aŋɔgɔ neyi nena nǝm azɔb amɛ wur ne tu mɔ.>

17 <<Igen amuŋ une na ndum didik!>> Atukɔ amaa adiu, <Ndi une na ki didik ne ki vǝtsɔb, nyɛ gli ntuntun wur.>

18 <<Ine yaa maa anyɛ tedi, <Ngɔŋ, azɔb ayiŋ ndi une nǝm ma ne ŋli azɔb amɛ tuŋ ne tu mɔ.

19 <<Atukɔ amaa adiu, <Uwa bǝ Gli ntuntun mei tuŋ.

20 <<Ankyak igen nuŋ anyɛ te diu, <Atukɔ, tɔ azɔb mi keŋ, mne men kpaa kɛ zhɔk ne mkpɔk anklu. 21 Mne klu sisik mi, ulɔ zhi, uwɔb li isha, ubaŋ kiyiŋ ndi bai wa une nai ba tedi iyi mi te na sɛr iyiŋ ndi bau ne tibɛ ba.>>

22 <<Atukɔ amaa adiu, <M tei teu ambuk ne nkanlɛ mi, uwa igen ne naki mimin! Amɛ une zhi tem lɔ zhi, te mbaŋ kiyiŋ ndi bai ŋgam ne nai ba tem ndi iyi muŋi? 23 Ite yeme, anii ne yaru zhɔk kɛ ne amkpa anǝ nyak azɔbɔ, te bɛr yiŋ ndi mte nyak M tei yik kinuŋ ne yuŋ tu mɔ kai?>

24 <<Ankyak akɔdi abaŋ ndi aklɛkli amɔ, <Ta zhin azɔb kɛ waŋa, te nek zhin ne amɛ awur ne kɛ.>

25 <<Ngɔŋ, akɔ diu, amene yi ne azɔb amɛ wur!>>

26 <Mdik mbla zhin,> iwaŋ ndi ate yini ki, atei na anyaŋu nuŋ, fena iwaŋ ndi ayaŋ ki a tei ta vǝ yiŋ ndi ayime neyi. 27 Ndi amɛ, abɛ di abaŋ ndi akyak me iyi, te kǝr me yi itum amen ba, gli zhine ba nyɛmɛ te ŋlɔk ba ne tii muŋ.>>

28 Ndi Yesɔ ne lɛ amɛ, alɔ ku ti te kɔmɔ ne Urshelima. 29 Ndi ne te gbahir ne vǝ ntun yi Betafaji bene Batanya, yaŋ igbu yiŋ ndi azhɔi te Igbu atiŋe akuŋkun Zetun, fe ne shar abɛ tsene maa amɛ ayaa. 30 Te di ba, <<kɔmɔ zhin ne vǝ ntun yi ti min amɔ. Izhin te yirǝ, izhin tei yik ne kpa tatur, waŋ di nuŋ bane zǝn yuŋu atɔ ba. Zuk zhin ne wu igli nyɛmɛ. 31 Ineshir nuŋ ate rib zhin, <Ŋɔwa adi izhin bǝ zu gu?> Izhin bǝ diu, <Ŋgɔŋ awɔbu.>>>

32 Abaŋ ndi ne shar ba ne kate yigu ndi ne blama. 33 Ayi ne min kǝ zu gu ma, akiki ne tatur ma arib ba, <<Ai ŋɔwa adi zhin bǝ zuk Tatur waŋai?>>

34 Fe akɔ di, <<Ŋgɔŋ awɔbu.>>

35 Agliu agli Yesɔ mɔ, ne lab nklunklu mǝne ne goŋ taturo te baŋ Yesɔ asak ne goŋɔ. 36 Ayi ne min kǝ tsen, aneshir avu nklunklu mǝne lab ne ankɔŋ.

37 Mkpaŋ keŋ ndi ne tsene te yir andǝgǝlɛk ane zi kɔmɔ ne atiŋe akunkun ayi gbu Zetun, ankyak abɛ tsene maa akɔ nyer te gbara Arik Ŋgɔŋ asak ne akɔr amen ne ki ngɔngɔŋ iyiŋ ndi aba ne yigǝ.

38 Tedi, <<Inek anu adidik ne te ne atu ayi Itum waŋ ndi ne nyɛ ne sak kɛ Arik!>> Sik susun ne gbarshu bǝn Ŋgɔŋ ne gbarshu!>>

39 Anuŋ ne min kɛ Ferisawa ne miŋ ntsan kɛ aneshire adiu, <<Ine Tsar, tsaŋ abɛ tsene ami te abǝ ku anu!>>

40 <<Mdi zhin,>> A tanyɛme, <<Ate kyak lɛ, mkpaŋ tei ŋur ruru.>>

41 Ndi ne tsǝne gbahir ne Urushelima te yuŋ aru yik ntuno, akɔ hrie ayi ne tu ayi ntuno 42 te di, <<atei wa, mdi wa, abɛdi une zhi tedi bɛr yiŋɛ atei Gli zhin sik susun, amɛ ne sui ayir zhin ma. 43 Ibɛre nyɛ ndi abɛ kyak zhin ayi atei mee nkɔntsǝn, te kam zhin azik, te bɛ te ikum ben zhin. 44 Atei caŋ zhin ashur ne mimi, ben amumun amin abɛ klɛ ne akɔnɔntsin. Ba tei duŋ mkpaŋ nuŋ ne atɔ ayi nuŋ ba, te zhin ne kyak kam tɔ mkpaŋ kǝŋe ndi Arik ne anyɛ atu amin>>.

45 Ankyak akɔ yir gar kɛ Akabakɔŋ ŋɔ te kɔ yar aneshir abɛ zen lii dub ne akɔnɔsa ayi mɛ me. 46 Ablaa ba te di <<Ne mǝne cɛrǝ,>> <Ikɔb muŋ itei yi kɔb kɛ ben Arik,>; fena izhin kam kɛ te min kɔb abɛ zhib!>>

47 Kɔ te bɛr ta yi a zen tsar ne Akabakɔŋ. Ndi amɛ ngɔŋ ine na ndum kǝ Arik, abɛ tsar zhi lɛ cɛr Musa, bǝn acicɛ nuŋkub awɔb ankɔŋ ane ŋunu. 48 Ne wɔb ki nau alakakna akana, te ilɛ maa ne baŋ asusun aneshir.