1 Fe, Yesɔ bǝn abɛ tsene maa ne yir ntun ngɔngɔŋ bǝn ntun mɔtsɔtsɔb, te zin du lɛ kɛ Arik kɛ men, abɛ na ndum ma amɛ awur ne yaa ne yi bene abɔu. 2 Amba nuŋ ndi ne gli anerim agliru bama bǝn lɔ men a gliru bama. Ne min mǝne Meryamu ndi azhɔu te Magadaliya, waŋ ndi ne Gli ishetan me taŋgba ruu ne kpa maa. 3 Yuwana iwa kuza, ine shar ayou Hiridus, bǝn Suzana, bǝn amba tetɛk indi ne hru kiki yi lɔk Yesɔ bǝn abɛ tsene maa.

4 Ndi aneshir zen bin tetɛk, fe aneshir are tuntun te nyɛ bǝn Yesɔ, abla nkanlɛ iyiŋɛ: 5 <<Neshir nuŋ ne lɔn ne gar tib bǝbǝ ki. Ayi ne min kɛ yi bǝbǝ ki maa inuŋ ne hrie ne kɔŋ; ne caŋǝ, aŋliŋlɔ ne re gbarshu te vui amli. 6 Nuŋ ne hrie ne tu mkpaŋ, ndi ne tɔ te kam ku te mimi ba yi ne amkpa ma ba. 7 Inuŋ ne hrie ne ncoŋ, ne tɔ, ankyak ncɔŋɔ ne mli adɔmɔ. 8 Inuŋ ne hrie ne mimi didik. Te flu te na shur mgbyaŋ, tena ŋli mgbyaŋ tetɛk naŋ yiŋ ndi ne tib bǝ ma.>>

Ndi ne bla me, alɛ te di, Waŋ ndi ayi ne atɔŋ ayi wɔ, abɛ wɔ.>>

9 Abɛ tsene maa a rib bu nkanlɛ maa yiŋe ndi anii. 10 Fe Yesɔ adi, <<Izhi ki suyir ne kɔb Arik ne nek zhin neyi, Fe bene nuŋ me lɛ nkan lelɛ, te di,

<<<Iyik kam, ba tei yik ba;

Iwɔ, atei wɔ amaa ba tei zhi ba.

11 <<Waŋa ayi bla ruu ye nkan lɛmɛ: Bǝbǝ me ayi lɛ kɛ Arik. 12 Iyiŋ ndi ne hrie ne akɔnɔsa ayi abaŋ ndi ne wɔ lɛ kɛ Arik, fe shetan anyɛ baŋ lɛ me gli tibɛ ne susun mǝne, te bɛ duŋ tanyɛmɛ ndi ne zuk ba shur ba. 13 Iyi atu mkpaŋ ayi abaŋ ndi ate wɔ lɛ, akɔ ta kɛ ne nyer susun, abaŋa ba yi ne ririŋ ba, atanyɛmɛ mɔ bɛr watsɔb, ama mkpaŋ keŋ ndi ate ten ba iya te vuŋ ba akɔ zhaku. 14 Iyiŋ ndi ne hrie ne ncɔŋ ayi abaŋ ndi ne wɔ lɛ, ne shur ayi ne pwǝr, bǝn men kɛ gɔŋmimi ne duŋ ba ne zhaku. 15 Fe bǝbǝ yiŋ ndi ne tibɛ ne mimi didik ayi abaŋ ndi ne wɔ ilɛmɛ te vuŋ kɛ Gli gbamgbaŋ ne susun didik, ne vuŋ akpa Gli te na ki didik.

16 <<Inuŋ ba tei sak lu ne iki laŋ te kui ne adonke kɔ abɛ nyak kɛ ne angus akpa ne kur ka. Neme, a sak kɛ ne amkpadeb, te duŋ abaŋa ndi ayir abɛ yik laŋ maa. 17 Fe ba ki yiŋ ndi ne suyir ndi ba tei Gli arumɔ ba, ka ki yi kuŋkum yiŋ ndi ba tei bu ayi aŋyak ne bɛm ba. 18 Ne mee izhin bɛ shur kpa, tena wɔ. Iwaŋ ndi ayi ne ki ana sagu inuŋɔ, iwaŋ ndi ba yi ne ki ba, ivǝ yiŋ ndi ayime ne yi a tei bene bɔu.>>

19 Iya maa Yesɔ bǝn amun zumen ne nyɛ te aba abɛ yigu, bane yigu ba aneshir ne te du. 20 Ineshir nuŋ a blau te di, <<Iya mi ben amun zumin aklɛkli ne bɛm a ŋubu te bɛ yigu. 21 A ta nyɛmɛ tedi, <<Abaŋ ndi a wɔ lɛ kɛ Arik te na zǝ kǝ, aye ba ayi yaa muŋ ben amunzumɔr.>>

22 Iber nuŋ yime Yesɔ ne di, abɛ tsene maa, <<Nyɛ zhin tabǝ glɔ te kɔmɔ ne goŋ nek yuŋ.>> Fe akɔ lu te yir gumɔ te kɔmɔ. 23 Ayi ne min kɛ tsin ankyak, ina baŋu. Ŋguŋgu goŋ ne te ne nek ŋgɔŋ, Ngugumɔ zin fa amashir ndi te kam ku, amɛ ayi ne min kɛ ya.

24 Abɛ zǝu tsin akɔte suu ne na, tedi, <<Ngɔŋ, ngɔŋ, ta te dɔ ne mashir!>>

Akɔ si, te tsaŋ ŋguŋgu mɔ ben aŋkun amashire; fe ŋguŋgu mɔ kɔ te zee, te zǝkur. 25 Fe adi abɛ tsǝne maa. <<Itanyɛmɛ mine iyi ne mee?>>

Ne sisik ne vuŋ anu te di akpa men, <<Ai ŋɔwa? Te atsaŋ ŋguŋgu ben amashir, te awɔ lɛ ma te zǝ kɛ.>>

26 Fe Yesɔ ben abɛ zǝu tsin ne yir ntun yi Garisinawa iyiŋ ndi yi ŋɔk aklu ben ntun yi Galili. 27 Ndi Yesɔ ne ru ne gumɔ te yi agankubgbu, ineshir nuŋ ndi ayi ne anerim aru rɛ ntunɔ. Ne baŋ mkpaŋ, bane su iki su ba ne sɔŋ ne kɔb ba, akur ne amkpa ne ru aneshir. 28 Ndi ne yik Yesɔ, fe aŋur ruru te zhaku ne za maa, alǝk kɔr tedi, <<Yesɔ, uwɔb anii bene abɛm, Izu Arik Ŋgɔŋ? Me benu, duŋ sak me ya ba!>> 29 Fe Yesɔ ne tsaŋ anerime te duŋ ba aru ne kpa kɛ neshire. Amkpaŋ tetɛk ina ŋuru tyak zhɔk ne mimi, ana ku aŋyak, ana kluk atsǝtsaŋ zɔb ndi ne kpa aŋɔk amaa shetan na yaru kɔmɔ ne zizik.

30 Yesɔ aribu, <<Azho sak mi te ŋɔ?>>

<<Tetɛk,>> Ne diu, anerim abaŋ ndi yi ne kpa maa iyi tetɛk. 31 Fe anerim aben Yesɔ tedi, duŋ ta hrie ne amkpa ne naŋ dɔ ba. 32 Ne ankpa waŋa a yɔk ane gluk abɛ kɔb ne tiŋ gbu. Ki tuk aben Yesɔ tedi abɛ ta nyɛ bama te duŋ ba yir min mǝne, ne ta nyɛ bama. 33 Fe anerim akɔ ru ne kpa kɛ neshire te duŋ neshire, te yir min ane gluk abɛ kɔbɔ, fe akɔ zǝǝ akɔmɔ ne nkam amashire te dɔ.

34 Abɛ yɔk ne gluk abɛ kɔbɔ ayik amɛ, aklu te kɔ te abla lɛ me ne min ntun ben abɛ kɔno sa, 35 Fe aneshire akɔ ru te yik kiyiŋ ndi ne na. Ndi ne nyɛ ben Yesɔ akɔte yik neshir waŋ ndi anerime ne ruu ne kpa maa, te akɔ sɔŋ ne aza yi Yesɔ> ne suu ki itu ma iyi anenen; fe sisik te ba. 36 A baŋ ndi kime ne na ne ayi amen akɔ bla aneshir ndi ne yi ne anerim ne rɛ. 37 Ankyak aneshir abɛ ntun bɔbɔk abɛ Garisinawa aben Yesɔ te bɛ duŋ ba, te sisik ne vuŋ ba ŋgɔŋ. Fe Yesɔ akɔ yir igu te kɔmɔ. 38 Iner waŋ ndi anerim ne ru ne kpa maa, abenu tedi abɛ duŋ wa zeu, fe Yesɔ ne duŋɔ kɔmɔ, adi, 39 <<kɔmɔ ne kɔb, te bla aneshir iki goŋgɔŋ yiŋ ndi Arik ne nau ane yi.>> Ankyak neshire a kɔ kɔmɔ ne tuntun te zen bla ki ngɔngɔŋ yiŋ di Yesɔ ne naa wa ne yi.

40 Fe ndi Yesɔ ne ŋur kam, ntsan aneshir ne tau. Ne men azǝn ŋub nyɛ ma. 41 Fe ineshir nuŋ a zhɔ sak maa te Yarus ngɔŋ ne akaba, ne nyɛ zhaku ne ti kɛ Yesɔ, te benu abɛ gar kɔmaa. 42 Ayi ne vǝvǝn wa zhin ankyak, ne ase wur aneya, ne dǝk watsɔb te bɛ ku. Ndi Yesɔ ayi ne min kɛ tsǝn, aneshir tetɛk a mɔu, 43 Fe, iwanuŋ waŋ ndi azǝ azhizhi a se wur ane yaa, waŋ ndi ne ŋun azɔb ama bɔbɔk ne kpa ne ta kǝka, ba ne rɛ ba. 44 Ne kama zǝ gɔŋ kɛ Yesɔ te sak ŋɔk ma ne anklu maa, ne amkpama izi azhizhi me ku gbur kli. 45 Fe Yesɔ adi, <<Ai ŋɔwa a sak me ŋɔk?>> Ndi aneshir aturu, Biturus ben abaŋ ndi ayi bene bau adi, <<Ŋgon, a aneshir ne te du te zin turu tena mɔu.>>

46 Ama Yesɔ a di; <<Ne sak me ŋɔk, me wɔ mgbyamgbyaŋ muŋ ne ru ne kpa muŋ.>>

47 Ndi iwa ma ne yik ba tei ya su yir ba, fe a tib nyɛ te zin iri kpa, a ja ku ne ti ma, te bla ne ti kɛ aneshir ki yiŋ ndi ne duŋ wa ne sagu ŋɔk, bǝn yir kɛŋ ndi wa ne re ne kpama. 48 Fe a diu te di; <<Va muŋ, tanyɛmɛ ne susun mi ne duŋu rɛ lu kɔmɔ keke.>>

49 Ayi ne min kɛ lɛ fe neshir nuŋ are kɔb kɛ ngɔŋ ne akaba, te di; <<Ai Va mi ne ku, duŋ na sak ine tsar ya ba.>>

50 Ndi Yesɔ ne wɔ me, adi ŋgɔŋ ne akaba, <<Duŋ te sisik ba; ubɛ tanyɛmɛ ne susun mi ankyak, Va mi atei rɛ.>>

51 Ndi ne yir kɔb kɛ Jarus ba ne ta nyɛmɛ te nuŋ abɛ zu ayir kime ba, anaga yi Biturus bǝn Yɔɔna, ben Yakubu, ben tetɛɛ maa Vǝvǝn iwa ma bǝn iya maa kyak. 52 Azǝn zhin tɛ tǝ ruru ne atu ayi Vǝvǝnwa ma, akyak Yesɔ adi. <<Kuu zhin anu,>> <<bane ku ba, a kukurna.>> 53 Fe amlagu te ne zhi ne kaku. 54 Ankyak avuŋ ŋɔk kɛ Vǝvǝn iwa ma, te lɛk kɔr tedi, <<Vǝvǝnwa lu>>

55 Ivli maa ŋur kam nyak, ne kpa maa a lu sɔŋ. Fe adi abɛ nugu kili 56 Aner amaa akɔ sak ŋɔk nenu, fe Yesɔ akɔ gbaŋ ba atɔŋ te di kǝr abɛ duŋ bla nuŋ ki yiŋ ndi ne nai ba.