1 Nǝ bɛr nuŋ Yesɔ ne zen ben Arik ne amkpa nuŋ. Ndi ne klɛ, izhin ne abɛ tsene maa adiu, <<Ŋgɔŋ, tsar ta yir keŋ ndi ta te ben, ndi Yɔɔna ne tsar abɛ zeu na ndum.>>

2 Yesɔ a di ba, <<Izhin tǝ ben Arik, di zhin te:

<<<Tetɛɛ, ne gbarshu,

Sak me bǝ yi tsetser,

Ngɔŋ mi bǝ nyɛ,

3 Nek ta kili yi kɔte bɛr tayi.

4 Zuk ta zhɔk ne zumimin mɔr,

Tǝ taba mɔryi ta zuk izhu iye abaŋ ndi ala ta lɛ.

Kǝr gli ta gar ne amkpa ne ten ta ka.>>>

5 Fe Yesɔ adi abǝ zǝu tsin amaa, <<Abɛ di nuŋ ne miŋ min ayi ne kpa maa, te gar bǝn bɔu ne tsutsu bu te diu, <Ikpa muŋ, kɔb me ambwab borodi mei tar, 6 te kpamuŋ ŋɔ ne rɛ tsin te nyɛ bene bɛm, bam yi ne kili yi nǝgu ba.>

7 <<Ankyak ine kur ne min kime adi, <Duŋ dam me ba, ne ka ku ankɔŋɔ, nga bene amumune muŋ tane ka zukur. Bam tei na lu te nǝgu kinuŋ ba.> 8 Mbla zhin, te ba tei na lu te nǝgu drugba ba ndi ayi kpa ma, ndi nǝ nǝk tu maa yaŋ te shisha atei nǝgu kiyiŋ ndi awɔbǝ.

9 <<Fe mdi zhin: Rib atei nǝgu wɔb utei yik, ŋur ankɔŋ atei buu. 10 Waŋ ndi arib anegu, waŋ ndi awɔb ayik, waŋ ndi a ŋur ankɔŋ abuu.

11 <<Jineba atetɛ, ŋɔwa ne miŋ min izu maa atei benu ambɛ fe atei kama baŋ iwa nǝgu? 12 kɔ atei rib mkpaŋ kukɔ atei baŋ Ilaŋ anegu? 13 Fe atei izhineba, abaŋ ndi zhin yi aner bɛ yi ne susuno mimin, izhin nek amumune min kiki didik, fe amɛ tetɛɛ min ne gbarshu atei nek abaŋ ndi aribu izhu Tsetser!>>

14 Ndi Yesɔ ne Gli anerim ru ne kpa kɛ ner ne yaŋ lɛ, ndi anerime ne ru inere ne kpa maa, abu anu te lɛ, fe aneshir sak aŋɔk ne ne. 15 Ankyak aneshire nuŋ adi, <<Yesɔ ne gli anerim aglɛ rumɔ ne mgbyamgbyaŋ kɛ itum ane anerim.>> 16 Anuŋ ne ten Yesɔ te wɔb te abɛ tsar ba ngir kǝ ire gbarshu.

17 Yesɔ ne zhi lɛ kɛ susun mǝne te di ba: <<Ntun yiŋ di gab kpa maa itei zhaku, kɔb keŋ ndi nena gab kpa maa itei na zǝr. 18 Shetan ate gab tu maa, te kɔmaa itei kli kikin? Mdi amɛ te zhin di mne gli anerim rumɔ ne mgbyamgbyaŋ kɛ ngɔŋ anerim. 19 Te yi ndi me gli anerim rumɔ ne mgbyamgbyaŋ kǝ ngɔŋ anerim, abɛ zǝ zhin agli ba rumɔ ne nii? Fena, atei yi abɛ tei zhin ambuk. 20 Te yi ndi mgli anerim rumɔ ne mgbyamgbyaŋ kǝ Arik, fe ikɔb kǝ Arik neka nyɛ ben abɛ zhin.

21 Te yi ndi ner ne klik, ne ble kɔmaa bleble didik, ba nuŋ atei zhib ki maa ba iki maa itei yi keke. 22 Ankyak te yi ndi nuŋ ne klik nuŋ anaŋu atei yaru, atei vu ateta maa ayiŋ ndi ne nyagǝ te gabɛ bǝn anuŋ.

23 <<Waŋ ndi ba yi bene bɛm ba akyak me, waŋ ndi ba abiŋ bene bɛm ba, avarǝ.

24 Te yi ndi izhu mimin te ru ne kpa kɛ neshir, iwɔb amkpa waŋ ndi ayi zizik te bɛ kur asik te bane yigǝ ba. Ankyak adi, <M tei kam kɔmɔ ne kɔb keŋ ndi mne ru remɛ.> 25 Ndi ne yir, te yik kɔbɔ ne kun kɛ te na kɛ aŋyak anenen. 26 Fe itei gar baŋ izhu mimin amɛ taŋgba anuŋ ndi na zumimin anaŋu, fe akɔte yire zǝ sɔŋ ne mine. Fe ikpa kɛ neshire lɔu ŋgon naŋ ye kuti me.>>

27 Ndi Yesɔ azǝn bla kiki yiŋɛ, iwa nuŋ ne min kɛ aneshir azho, <<Anu adidik ayi ne tu kɛ iyah waŋ ndi ne ŋliu tena yɔgu.>>

28 Asaga, <<Anu adidik ne naŋ abaŋ ndi ne wɔ lɛ kɛ Arik te Gli kɛ.>>

29 Ndi aneshir ne kli tetɛk, Yesɔ adi, <<Waŋ ayi kab aneshire mimin. Awɔb ngir amɛ batei tsar ba kinuŋ ba, nak ngir kɛ Yunana. 30 Ndi Yunana ne yi ngir bǝn anere bǝ Neneba, ne me Izu neshir atei yi ngir ne kab aneshire. 31 Itum amba ne rɛ gar kǝ amgbalu atei lu te te ŋas bene aner abɛ kab kǝŋe tena nek ba shisha; ndi are klɛtu yi gɔnmimi te bɛ wɔ mgbemgbeb kɛ Solɔmɔn, fe nuŋ ndi anaŋ Solɔmɔn aye yaŋa. 32 Aner bɛ Neneba atei lu kli ne bɛr yi te ambuk ne kab kɛ aneshir te nek ba shisha; ndi ne duŋ lalɛ ne du lɛ kɛ Yunana ne lɛ kɛ Arik amɛ inuŋ ndi anaŋ Yunana ne nyɛ.

33 <<Inuŋ ba tei mɔr lu kǝ pitila te baŋ kɛ suyir ne amkpadeb waŋ ndi ba tei yik laŋ ma ba. kɔ abɛ nyak kɛ ne angus adǝdak, ne me atei mɔr kɛ sak ne shu te aneshir bɛ yik laŋ lumɔ. 34 Iyi mi iyi pitila ne laŋ yi kpa mi. Te yi ndi ayemi ayi kyekye, kpami bɔbɔk tei nek laŋ lu. Te yi ndi ba yi kyekye ba, ikpa mi itei te bu. 35 Na tɔ iyi amɛ, ilaŋ lu ndi yi bene bɔu ba yi bu ba. 36 Ne me, ta yi ndi kpa mi nek laŋ lu bɔbɔk, ba ŋa nuŋ kɛ te bu, itei laŋ shaga, ndi laŋ lu kǝ pitila itei laŋ ne atɔ mi.>>

37 Ndi Yesɔ ne lɛ klɛ, awɔnǝ Ferisawa nuŋ ne zhɔu li kili: Fe ne gar te kɔte li kili me. 38 Ankyak awɔnǝ Ferisawa ma ne sak ŋɔk ne ne ndi ne yik Yesɔ ne li kili iyaŋ ŋla ŋɔk.

39 Fe Yesɔ adiu, <<Amɛ, zhine ba Ferisawa zhin ŋla goŋ abɛm kɛ agbǝgba bǝn kuca, fe miŋ min izhin sɔ tu tena naa zumimin. 40 Jineba bliblik! Ba yi waŋ ndi ne na goŋɔ abɛm wa ne na mine kai? 41 Fena, nek abɛ yaŋ ki iki yiŋ ndi yi ne min agbǝgba ma, kɔte nii itei yi zhin tsetser.

42 <<Zhin zhɔk atu amin izhineba Ferisawa, zhin nek Arik zhin ne min kɛ wur yi kimin, iyi mbumburniŋ bǝn amgbaki bɔbɔk, te kyak na didik bǝn nyer Arik. Zhin bǝ na kiyi azizaŋ bǝn yi kukub.

43 <<Zhin zhɔk atu amin zhin Ferisawa, zhin nyer sɔŋ ne mben didik ne Akabakɔŋ te na duŋ abɛ tek zhin ne dub.

44 <<Zhin zhɔk atu amin, izhin yi ndi abɛ ayiŋ ndi aneshir bane yige neyi ba te caŋǝ te gayir.>>

45 Izhiin ne abɛ tsar zhi ne nkenlɛ asagu ma, <<Ine Tsar, ndi utǝ di kiyiŋɛ amɛ upwar ta miyi.>>

46 Yesɔ adi, <<zhin abɛ tsar cɛr yi Musa, Zhin zhɔk atu amin, zhin nek aneshir hru kɛ luk ngɔŋ ndi batei baŋ kɛ yir ba, fe zhine ba minyi ba zhin tei lɛk vǝn ŋɔk zok bama ba.

47 <<Zhin zhɔk atu amin, te zhin mee abɛ ayi abɛ bla shar yi Arik, ndi atsintsim amin aba ne ŋlɔk ba. 48 Izhin ne yik ne yi amin te tanyɛmɛ te atsintsim amin aba ne ŋlɔk abɛ bla shar yi Arik izhineba ne mee abɛ mǝne. 49 Ndi iyeme, Arik ne mgbemgbeb ma ne di, <M tei shar ba abɛ bla shar muŋ bene abɛ na ndum muŋ. atei tsik anuŋ aŋlɔk tena sak anuŋ iya.> 50 Fena ikab kǝŋe aba atei vuŋ ba gli ne tu azhizhi anere abǝ bla shar yi Arik vuŋ rɛ kuti gɔnmimi, 51 Vuŋre azhizhi ayou Abila bene azhizhi ayou Zakariya, waŋ ndi ne ŋunu ne amkpa ne tsik baŋ ne Akabakɔŋ. Mm, mbla zhin, ikab kǝŋe atei gli ba ne kiki yiŋɛ bɔbɔk.

52 <<Zhin zhɔk atu amin izhin bɛ zhi cɛr yi Musa! Ndi izhin ne yak iki bu ankɔŋ ane zhi ki . Izhin bane yir ba, ba zhin nena duŋ anuŋ ayir ba!>>

53 Ndi Yesɔ ne ru abɛm, Ferisawa bene abɛ tsar cɛr yi Musa ne ruk abɛm te rib bu lǝlɛ, 54 te aba bɛ vuŋu ne nkan lɛ ndi atei blai.