1 Ne se kɛ wur ane tuŋ ne gli ngɔŋ kɛ Kaisar Tiberiya, Buntus Bilatus agli Yahudiya, Hiridus ayi itum ne Galili, izumen ane Filibus a gli Ituniya bene Tarakunitas, Lisaniyas a yi itum ne Abiliya, 2 ne mkpaŋ keŋ ndi Hannas bene kayafa aba ayi angɔngɔŋ abɛ na ndum kɛ Arik, Arik ne lɛ bene Yɔɔna izu Zakariya ne zizik. 3 Ne tsin itun yi Juda, te bla lɛ kɛ Arik te na su aneshir na sak kɛ Arik te bɛ duŋ na zumimin te bɛ ta ba zhɔk. 4 Ndi ne cɛr ne mplɛ kɛ cɛr kɛ Ishaya ine bla shar yi Arik:

<<Ikɔr kɛ nuŋ zhɔ ne zizik,

<Naa zhin Arik ankɔŋ,

Na zhin ankɔŋɔ ne nab.

5 Ate ku andǝgǝlɛk bɔbɔk,

Ate zir igbu bɔbɔk.

Ate nab nkunkɔŋ ayiŋ ndi ne vǝk,

Kuŋkɔŋ yi amgbɔk bǝ kɔ.

6 Aneshir abɛ yi ne kpa bɔbɔk ate yik ita zhɔk ye Arik.>>>

7 Yɔɔna ne di ntsan aneshir ndi aru nyɛ te wa bǝ su ba, <<Izhineba ane wa! Ŋɔwa ne gbaŋ zhin atɔŋ te zhin klu mfu kɛ ŋyɛ? 8 Nazhin ki didik ndi te tsar duŋ na zumimin min. Kǝr zhin bɛ di akpamin, <Tayi ne tetɛɛ amɔr ndi ai Ibrai.> Fe mblazhin ni min mkpaŋ yiŋɛ Arik atei gli amumun gli ruu Ibrai. 9 Ne ka tsɔm angen a sak ne nkunkun, fe kuŋkun keŋ ndi ba te dɔ ba ate tsɔm kɛ ne ririŋ atyak zhɔk ne lu.>>

10 Aneshir aribu te di, <<Aye nii ta tei nai?>>

11 Yɔɔna adi ba, <<Waŋ ndi ate yi ne nkluklu me ya bɛ baŋ azhiin nek Kpa maa ndi ba yime ne kǝ ba, ben waŋ ndi ate yi ne kili bɛ na mee.

12 Abɛ ta gandu ne nyɛ te bɛ su ba. <<Ne tsar,>> Arib, <<Anii ta tei na?>>

13 A diba. <<Duŋ ta naŋ zhin kiyiŋ ndi ne di zhin bǝ ta ba,>>

14 Abɛ kpaakpa na rib bu te di, <<taba mɔryime tate na kikin?>>

Yɔɔna a di ba, <<Duŋ ta zhin azɔb bene abɛ lalɛ bai ki yi ŋɔk min bǝ mla zhin.>>

15 Aneshir a klikli te na shur ayi te na lɛ susun men ka Yɔɔna wa yi Kristi me. 16 Yɔɔna ne bla ba bɔbɔk mǝne, <<Me su zhin ne mashir ne inek ne juda. Amɛ waŋ ndi ayi ne mgbyamgbyaŋ anaŋ me ate ŋyɛ, bam tei zuk a kpaza maa yir ba. Ate su zhin ne izhu tsetser bǝn lu. 17 A gli mumu kɛ zee ne ŋɔk maa ate zee ikpu didik abiŋe a shur ne wun, fe te vu atunturɔ ashur ne lu kɛ yaŋ rim.>> 18 Yɔɔna ne bla lǝlɛ tetɛk tena bla ba abɛ duŋ kiki yi na men.

19 Ankyak ndi Yɔɔna ne vee Hiridus ne ta Hirudiya, iwa zumen, bene kiki mimin ndi ne nayi, 20 Hiridus ne biŋ kiyiŋɛ, te vuŋ Yɔɔna aku ne jaru.

21 Ndi Yɔɔna ne su aneshir bɔbɔk ne sak kɛ Arik, ne na su Yesɔ mayi. Fe ndi ne zin ben Arik, gbarshu ne bu 22 Ankyak izhu tsetser ne zǝǝ sɔŋ ne kpa maa ndi angu. Ankyak kɔr rɛ gbarshu tedi: <<Waŋa ayi zumuŋ, me nyeru; me ne tanyɛmɛ bene bɔu.>>

23 Yesɔ ne te ase sɔk tar te she vuŋ ndum maa. Ne yi vǝvǝn, ne yik tedi, ayi zu Yusuu,

Izu Heli, 24 izu Mata,

Izu Levi, ne ŋli Melki,

Izu Janai, ne ŋli Yusuu,

25 Izu Matayas, ne ŋli Amɔs, izu Nahum, ne ŋli Esli, izu naggai, 26 izu Maat, ne ŋli Matayas, izu Semei, ndi a yi zu Josek, izu Joda, 27 ne ŋli Joanan, waŋ ndi Rhesa ne ŋliu, izu Zerubabɛl, izu shɛtiyel, ndi Neri ne ŋliu, 28 Izu Melki, ne ŋli Addi, izu kɔsam, izu Elmadam, waŋ ndi Er ne ŋliu, 29 Izu Joshuwa ne ŋli Eliaza, izu Jorim, izu Matat, ne ŋli Levi, 30 izu Simɔn, waŋ ndi Yahuza ne ŋliu, izu Yusuu, izu Yonana, ŋli kɛ Eliyakim, 31 Izu Malaya, waŋ ndi Mainana ne ŋliu, ŋli kɛ Matata, izu Natan, ŋli kɛ Doda 32 izu Yese, izu Obida, ŋli kɛ Buaza, waŋ ndi Solɔmɔn ne ŋliu, izu Nashan, 33 Nashan ayi zu Aminadab, ndi ayi zu Aram, izu Hesruna, ne ŋli Feresa, ndi ayi zu Yahuza. 34 Yakubu ayi zu Ishaku ne ŋli Ibrai, izu Tera ne ŋli Nahor. 35 Nahor ayi zu Serug, ne ŋli Reyu, izu Feleg, di ayi zu Ebɛr, Ebɛr ayi zu Shela, 36 Shela ayi izu Kena izu Afashak, Afashak ayi izu Shem, Shem ayi zu Nuhu ndi ayi zu Lamek, 37 ne ŋli Metusela, ndi ayi zu Anuhu, ne ŋli Jare, izu Mahalɛl, waŋ ndi ayi zu Kenan, 38 Kenan ayi zu Enosh, izu Shitu, ne ŋli Ademu, Ademu Arik ne nau.