1 Nǝ bɛr yi Sɔŋ sik nuŋ yiŋɛ Yesɔ azǝn zǝ min arum akɛ alikama, fe abɛ tsene maa akɔ ŋɔr alikama te nuk mgbyaŋa te tei. 2 Ferisawa anuŋ arib, <<Anii duŋ zhin glak lɛ keŋ ndi ne lɛ kǝ kpa nyak ne atu yi bɛr yi Sɔŋ sik?>>

3 Yesɔ asak bama, <<Ba zhin ne tɔ cɛr yiŋ ndi Doda ne na ben akpa amaa ndi abaŋ ndi ijɔŋ ne vuŋ ba kai? 4 Ne yir kɔb kɛ Arik, te baŋ mbwab borodi ndi ne nyak abɛ na ndum Arik ata, ne ta mbwab borodi kɛ ine na ndum kǝ Arik ndi bai kɛ ta maa ba. Tena nek abɛ tsene maa.>> 5 Ne klɛtu fe Yesɔ adi ba, <<Izu Neshir a yi Ŋgɔŋ ne bɛr yi sɔŋ sik.>>

6 Nǝ bɛr yi Sɔŋ sik nuŋ, Yesɔ ne yir Akaba te zen tsar ba, fe neshir nuŋ ndi ŋɔk maa kɛ lii ne shen. 7 Ferisawa ben abɛ tsar izhi lɛ azǝn wɔb ankɔŋ ane vuŋ Yesɔ ne lalɛ, aneshir azǝn shurɔ yi ka tei na neshir te bɛ rɛ ne bɛr yi Sɔŋ sik. 8 Amɛ Yesɔ ne zhi ilɛ mǝne tedi ner ne shen ŋɔgo, <<Lu klɛ ne tii kɛ aneshire.>> Fe akɔ lu kli ne tii mǝne.

9 Fe Yesɔ adi ba, <<M rib zhin, aye nii rɛ abɛ nai ne bɛr yi Sɔŋ sik: bɛ na ki didik ka bɛ na ki mimin ni? Abɛ duŋ nuŋ ayik ivli ka abɛ ŋunu ni? >>

10 Akama tɔ ba bɔbɔk, te di neshire, <<Nab ŋɔk mi.>> Akɔ nab kǝ, fe ŋɔk maa ku nab anenen. 11 Ankyak akɔ te mfu te kama lɛ ne kpa men ne ki yiŋ ndi aba atei na Yesɔ.

12 Iber nuŋ yime Yesɔ ne yuŋ tu gbu te gar ben Arik. Tǝ kur amɔ te zen ben Arik. 13 Ndi bɛr ne ŋan, a zhɔ abɛ tsene maa te hria aner awur ane yaa ne min mǝne abaŋ ndi ne di atei naa wa ndum. 14 Siman waŋ ndi azhɔu te Biturus ben zumen Anduru, Yakubu, Yɔɔna, Filibus, Batɔlɔmi, 15 Matiu, Tɔma, Yakubu izu Halfa. Isiman waŋ di a zhɔu te Zalɔt, 16 Yahuza Izu Yakubu, ben Yahuza Iskariyɔti waŋ ndi ne baŋ Yesɔ alɛb.

17 Yesɔ ne gli abɛ tsene maa te kama zi te kli ne amkpa waŋ ndi ba yi gbu ba. Ntsan aneshir ne zeu anyɛ rɛ ntun yi Yahudiya, ben Urshelima, ben gar kɛ Taya ben Sidon. 18 Abaŋ ndi ne nyɛ wɔ lɛ maa te bɛ nab ba te duŋ ba rɛ ne min kɛ lɔ men. Abaŋ ndi izhu mimin ne sak ba iya ne rɛ, 19 kɔte ŋɔwa ne min kɛ aneshir awɔb te wa abɛ sagu ŋɔk, te mgbyamgbyaŋ rurɛ kpa maa te duŋ ba rɛ.

20 Yesɔ atɔ abɛ tsene maa, te di:

<<Anu didik ayi abaŋ ndi ba yi ne kinuŋ ba,

Neme kɔb kɛ Arik iyi men.

21 Anu didik ayi ben abaŋ ndi ijɔŋ vuŋ zhin azizaŋa,

Atei duŋ zhin hri.

Anu didik ayi ben abaŋ ndi azhin azizaŋa, te izhin

Tei mlak.

22 Anu didik ayi bǝn abaŋ ndi aner akyak zhin,

Ndi aneshir ate pwar zhin tena yen zhin

Tena kyak asak amin ndi te ben na kɛ mimin,

Ne atu ayi Izu Neshir.

23 <<Nyɛr zhin ne bǝn, te mlak nyɛr, te idǝk min iyi ŋgɔŋ ne gbarshu. Ne me ane naa abɛ bla shar yi Arik.

24 <<Fena zhin zhɔk atu amin izhin abɛ yi ne ki ŋɔk,

Tǝ ne ka yis zhin ayi amin.

25 Zhin zhɔk atu amin izhin abaŋ ndi neka nek zhin lii.

Te ijɔŋ tei vuŋ zhin.

Zhin shur atu min izhin abɛ mlak azizaŋa,

Tǝ izhin tei kɔr asusun tena zhin.

26 Zhin zhɔk atu amin ndi aneshir tetɛk atei lɛ ki didik ne atu min,

Iye mee ane lǝlɛ didik ne atɔ atetɛ min abɛ timu tedi aba bla lɛ kɛ Arik.

27 <<Fena Mbla zhin abaŋ ndi awɔm: Nyer abɛ kyagu, te naa ba ki didik, 28 nek abaŋ ndi ayen zhin anu adidik, ben Arik ne atu abaŋ ndi akyak zhin yi. 29 Inuŋ ate ŋuru ne ŋkɔn ŋa zhiin, kamu kɛ yaa maa. Iwaŋ ndi ate baŋ anklu ami, duŋɔ abaŋ akɛ su kɛ miŋe. 30 Nǝk waŋ ndi ate benu, iwaŋ ndi ate baŋ ki mi duŋ na diu tei ba. 31 Naa nuŋ iki yiŋ ndi udi abɛ nau neyi.

32 <<Izhin tedi izhin ne nyer abaŋ ndi ne nyer zhin ankyak, fe izhin ne baŋ anii? kɔ abɛ <Na zumimin>> A nyer abaŋ ndi a nyer ba. 33 Ne mee te zhin te na ki didik bene abaŋ ndi ana zhin ki didik. Izhin ne ta nii? Amɛ abɛ na zumimin anai. 34 Ate yi ndi izhin kɔb abɛ yaa zhin ihria ankyak, aye nii izhin te shur ayi nai? Amɛ abɛ na <zumimin> A kɔb akpa men tena nek kɛ anenen. 35 Fena nyer abɛ kyak zhin, naa ba ki didik, izhin te kɔb ba duŋ na di zhin ushur ayi te bɛ kama ya zhin ba. Amɛ, idǝk min tei yi ŋgɔŋ, fe izhin tei nayi amun Arik Ŋgɔŋ te awɔ lɔ susun abɛ nyer bǝn abɛ na ki mimin. 36 Lɔ zhin susun abɛ kyak zhin yi, ndi Tetɛɛ min alɔ susun mine.

37 Yesɔ adi <<Duŋ te anuŋ ambuk ba, te ba tei teu ba. Duŋ yik neshir nuŋ ayi kisha ba, te ba tei yigu uyi ki sha ba. Zuk izhu zhɔk, atei na zu gu azhɔk. 38 Nǝk, atei na nǝgu ma. Ikuca kɛ tsar ki, keŋ ndi yi didik ndi ne kpaŋ kɛ, Izhaŋ var hrie, ne a za. Tǝ kuca keŋ ndi utǝ tsar kime, ai kɛ atei tsa ru ma mi yi.>>

39 Yesɔ nena bla ba nkanlɛ yiŋɛ: <<Ineshir ne amfik atei Gli ner ne amfik ge? Iyah mǝne batei zhaku ne dudu kai? 40 Iwaŋ ndi a tsaru ba naŋ ne tsaru ba, fena iwaŋ ndi ne tsa ru ŋgɔŋ atei yi ndi ne tsaru.

41 <<Anii teu tɔ kenkam kɛ iyi zumin te kyak kam tɔ ikɛ iyi mi? 42 U na kikin te di zumin, <Zumɔr, duŋ me ntunu mkpɔk kenkam kɛ yi mi,> Ndi bau ne tun kɛ yi mi kai? Izhin abɛ na yik ayi, kuti tun mkpɔk kǝŋkam ndi yi ne yi mi baliŋ, ayemi atei ka laŋ atɔ iyi kɛ zumin te ka tunu maa.

43 <<Nkunkun didik ba gli dɔ mimin rumɔ ba, amɛ kuŋkun mimin ba Gli dɔ didik rumɔ ba. 44 Azhi tiŋ nkunkun ne dɔ maa. Aneshir batei kyaŋ dɔ Lambwe ne tiŋ azaa ne zizik ba, kai kyaŋ inabi ne tiŋ ncɔŋ ba. 45 Ineshir didik a gli ki didik arumɔ ne susun maa, amɛ ineshir mimin a gli ki mimin a rumɔ ne susun maa. Ikiyiŋ ndi iyi ne miŋ ne ai yi ru nenu.

46 <<Ai ni duŋ zhin zhɔm, <Ŋgɔŋ, Ŋgɔŋ,> Tǝ kyak na zhin kiyiŋ ndi Mblai? 47 Mtei tsar zhin ndi ayi ndi waŋ ndi ne nyɛ bene bam te wɔ lɛ muŋ te na ndum ne kǝ me. 48 Ayi ndi neshir waŋ ndi ne mee kɔb, ne ka ŋlɔ ntanda ayir min ne tu yaŋ. Anca ne ru, amashire ne gara zǝ kɔbɔ, bane zǝr ba, te ne mee kɛ ne tu yaŋ. 49 Fena iwaŋ ndi ne wɔ lɛ muŋ te kyak na ndum ne kǝ, ayi ndi iner waŋ ndi ne sak ntanda ne tu ablubluk te kyak ka ŋlɔ mkpaŋ tiŋe. Ndi nguŋgu ngɔŋ ne fuk, ikɔbɔ ne zhaku izhaku mimin.>>