Romanos 4

Zǝ nkɔŋ kɛ Ibrai

1 Ta tei di kikin, ne yiŋɛ, Ibrai, ntsǝntsǝm ayou atsintsim amɔr? Ayi anii ne yigǝ? 2 Ate yi ndi Arik ne ta Ibrai ne iki didik iyi na maa, abɛ yi ne iki ŋur asa amaa ba ne ti kɛ Arik ba. 3 Ilɛ kɛ Arik ne di, <<Ibrai ne tanyɛme ben Arik, fe ne tanyɛme maa Arik ne tau te ai nɛr tsetser.>> 4 Aner abaŋ ndi ana ndum aya ba idǝk men, ama bai tɔ ba ndi ne dik kɛ anek ba isha ba; ayi ne ki yiŋ ndi nena te atakǝ. 5 Ama abaŋ ndi ne zhik ne tanyɛmɛ men, bane iki iyi na men ba, tena tanyɛme ben Arik awaŋ ndi abɛ te sǝsǝk ayi bǝ yaŋ zhi, ai tanyɛme yi Arik atɔi te duŋ neshir ayi ne angus amaa. 6 Waŋa ayi ki yiŋ ndi Doda ne lɛ tedi iner waŋ ndi Arik ne tanyɛmɛ bene bɔu ne nyer maa, ama bai ndum kɛ na maa ba:

7 <<Nyer iyi ben abaŋ ndi ne zuk ba shur ne lalɛ men,

Abaŋ ndi bane gli ba ne lalɛ men ba!

8 Nyɛr iyi ne atu yi waŋ ndi Arik ba tei kpa lalɛ maa aŋyak ba!>>

9 Kiki yiŋ ndi Doda ne lɛ ma ne atu abaŋ ndi ne kɔk ba zǝk akyak gǝ? Ɔɔ! Inayi aner abaŋ ndi bane kɔk ba zǝk ba. Tǝ tane yik ne cɛr ilɛ kɛ Arik, Ibrai ne tanyɛme ben Arik, netu ayi tanyɛme maa Arik ne tau ne tsetser maa.>> 10 Iki yiŋɛ ne yi atentai? Nǝ yi gɔŋ keŋ ndi ne kɔk Ibrai zǝk yi? Nǝ kuti, ba neyi gɔŋ maa ba. 11 Ne kɔgu zǝk ne gɔŋ kɛ tanyɛmɛ maa, ikɔk zǝk maa ne duŋ Arik atau ne tanyɛmɛ maa teshe kɔgu zǝk. Ankyak Ibrai ne yi tetɛɛ ayou abaŋ ndi ne tanyɛmɛ bǝn Arik, ndi bane kɔk ba zǝk ba. 12 Ana yi tetɛɛ ben abɛ kɔk zǝk, na yi ben abaŋ ndi ne kɔk ba zǝk, fena, ben abaŋ ndi, te na zǝ ankɔŋɔ zhiin ben abɛ tanyɛme yi tetɛɛ Ibrai ne yime te shi kɔgu zǝk.

13 Ndi Arik ne kpa aŋyak Ibrai ben nga maa tedi gɔŋmimi tei yi maa, nena amɛ, bane yi netu yiŋ ndi Ibrai ne zǝ kpa nyak maa ba, ama ne yi ne atu yi tanyɛme te duŋ Arik ne tau ne tsetser maa. 14 Fe ate yi ndi ikpa nyak aye Arik iyi nek abaŋ ndi azǝ kpa nyak maa, ankyak itanyɛme ba yi kinuŋ ba fe ilɛ maa ba na yi ikinuŋ ba. 15 Fe Icɛr Musa igli mfu kɛ Arik nyɛmɛ; ama amkpa waŋ ndi Icɛr yi Musa ba yime ba ilalɛ ba yime ba, yaŋ zǝ cɛr yi Musa ba yime ba.

16 Ankyak ikpa nyak iyi ne miŋ kɛ tanyɛme, te abɛ duŋ kpa nyak bǝ yi ankɔŋ ne ta iki didik yi Arik te gar nŋli kɛ Ibrai ba yi abaŋ ndi azǝ icɛr yi Musa ankyak ba, ama iyi abaŋ ndi ne tanyɛme ne susun ir keŋ ndi Ibrai nena. Tǝ Ibrai wa ne yi tetɛɛ ane bǝ tanyɛme bɔbɔk; 17 ir keŋ ndi ilɛ kɛ Arik ne bla, <<Mǝ ne duŋu uyi tetɛɛ ne ayu aneshir tetɛk abɛ gɔŋmimi.>> Fe ikpa nyaga ne rɛ ne ti kɛ Arik, waŋ ndi Ibrai ne tanyɛme ben abɔu Arik waŋ ndi a duŋ abɛ ku akama lu ilɛ maa na Gli iki yiŋ ndi bane yeme ba tǝ bɛ yime. 18 Ibrai ne tanyɛme te na zhɔk susun, ndi ankɔŋ ane zhɔk susun ba ne yime ba, neyi amɛ <<neyi tetɛɛ ne gɔŋmimi.>> Ir keŋ ndi icɛr ne blama, <<Nŋli mi itei kli du ir keŋ ndi ncinces yime.>> 19 Ibrai ne yar ase amkplik azhiin; ama itanyɛme maa bane duŋ kpa maa sik ba ndi itanyɛme maa ne ka dɔ, ndi Saratu wa maa ba tei na ŋli amumun ba. 20 Itanyɛme maa bane duŋu ba, bane glak kpa nyak yi Arik ba itanyɛme maa ne duŋu shaga ne mgbyamgbyaŋ, tena duŋu agbar Arik asak. 21 Neme Ibrai ne tanyɛme ne susun maa tedi Arik atei na ki iyi kpa nyak maa. 22 Nǝ tanyɛme iyi Ibrai, ne yi tsetser ben Arik,<<Arik ne ta tsetser maa.>> 23 Nkan lǝlɛmɛ <<ne tau ayi tsetser>> ba ne cɛr wa kiki maa ba. 24 Ne na cɛr taba abaŋ ndi atei ta ta abɛ yi tsetser, abaŋ ndi ne tanyɛme ben waŋ ndi ne lik Yesɔ Ngɔŋ mɔr ne bɛ. 25 Ankyak netu ayi lalɛ mɔr Yesɔ ne nek tu maa te ku, ne na lɛgu te tabǝ ta shur bǝn Arik.