1 ✝Nao King Solomon i singaot ol hed blong ol twelef laen* blong Isrel,* wetem ol hed blong ol famle blong olgeta, mo ol narafala lida blong olgeta, blong oli kam wanples wetem hem long Jerusalem.* Olgeta ya oli kam blong luk we ol pris bambae oli go long Saeon,* oli tekemaot Bokis ya we i Saen blong Promes* blong Hae God, oli karem i go antap, long haos* blong Hae God. Long taem ya, Saeon i narafala nem blong haf ya blong Jerusalem we nem blong hem "Taon* blong King Deved". 2 ✝Mo olgeta ya evriwan oli kam wanples long fes blong king, long taem blong Lafet* ya blong Wokem ol Wansaed Haos, long manis ya Etanim* we i namba seven manis long yia blong olgeta. 3 Nao taem olgeta oli kam wanples finis, ol pris oli tekem Bokis ya, 4 mo ol narafala pris wetem ol Livaet,* oli tekem Haos Tapolen ya we olgeta oli stap go long hem blong mit wetem Hae God, wetem ol narafala samting blong hem, nao oli karem ol samting ya evriwan i go long haos blong Hae God. 5 Nao king wetem olgeta man ya oli kam wanples long fran blong Bokis ya, mo oli stap mekem sakrefaes we oli stap kilim ol sipsip mo ol buluk we oli plante we plante, man i no save kaontem. 6 Nao ol pris ya oli karem Bokis ya i go insaed long haos blong Hae God, mo oli putum insaed long Rum ya we i Tabu we i Tabu, aninit long wing blong tufala pija ya blong jerubim.* 7 Nao wing blong tufala jerubim ya i blokemgud bokis ya, wetem tu longfala stik blong hem we oli stap karem long hem. 8 Tufala stik ya i longfala, nao sipos man i stanap long bigfala Rum ya we i Tabu, stret long doa blong Rum ya we i Tabu we i Tabu, hem i save luk en blong tufala, be sipos i stanap afsaed, hem i no save luk. Tufala stik ya i stap yet long ples ya, kam kasem tede. 9 ✝Insaed long Bokis ya, i no gat narafala samting, tufala flat ston ya nomo i stap we Moses i bin putum bifo olgeta. Taem Moses olgeta oli aot long Ijip oli kam, Hae God i mekem wan promes wetem olgeta long hil ya Sinae, nao long taem ya, Moses i putum tufala ston ya long Bokis ya.

10,11 ✝Nao ol pris oli aot long bigfala Rum ya we i Tabu, mo taem oli kam afsaed, wantaem nomo, klaod we i saen we i saen we i soemaot we Hae God i stap, hem i fulumap haos ya, nao oli no moa save mekem wok blong olgeta from samting ya.