10 Mo Hae God i talem se, "Bambae yufala i mas wokem wan Bokis long wud ya kasis.* Longfala blong hem bambae i kasem wan handred fiftin sentemeta, mo bigfala blong hem bambae i kasem klosap seventi sentemeta mo hae blong hem tu bambae i kasem klosap seventi sentemeta. 11 Long insaed blong hem mo long afsaed blong hem, bambae yufala i blokem ol wud blong hem long gol we i klin gud, i beswan, mo bambae yufala i wokem wan smol strap tu long gol, i goraon long hem bakegen long saed blong hem antap blong flasem. 12 Bambae yufala i wokem fo ring blong hem long gol, mo bambae yufala i hangem olgeta long ol fo leg blong Bokis ya, tu long wan saed, tu long wan saed. 13 Mo bambae yufala i wokem tu stik blong karem, long wud ya kasis, mo yufala i blokem tufala tu long gol, 14 nao yufala i pusum tufala i gotru long ol fo ring ya, wan long wan saed, wan long wan saed. 15 Mo taem yufala i pusum tufala stik ya i go, bambae yufala i no moa tekemaot tufala bakegen, bambae tufala i stap olwe long ol ring ya. 16 Mo tufala flat ston ya we mi raetem ol tok blong mi long tufala finis mo we bambae mi givim long yu, bambae yu putum tufala insaed long Bokis ya.

17 ✝"Lid blong Bokis ya, i Ples we bambae mi mi Tekemaot Sin blong yufala long hem. Bambae yufala i wokem long gol we i klin gud, i beswan. Longfala blong hem bambae i kasem wan handred fiftin sentemeta, mo bigfala blong hem bambae i kasem klosap seventi sentemeta. 18,19 Bambae yufala i hamarem gol long tufala en blong Lid ya, blong wokem tu pija blong jerubim* long hem we tufala i stanap, wan long wan en, mo wan long nara en, we tufala i haf blong Lid ya nomo. 20 Bambae yufala i mekem we tufala pija ya i stap lukluk i go long tufala, mo we tufala i pusum wing blong tufala i kam long tufala, nao wing blong tufala i kavremap Bokis ya antap. 21 Bambae yu tekem tufala flat ston ya we bambae mi givim long yu, yu putum i go insaed, nao yu tekem Lid ya blong hem, yu satem.