1 Bakegen, Profet Aesea i talem long ol man blong ol narafala kantri se, "Olgeta. !Yufala i kam klosap, yufala i lesin! Yufala evriwan long wol ya, wetem evri samting we i stap long hem, yufala i kam long ples ya, yufala i lesin gud. 2 Hae God i kros finis long yufala, mo long olgeta soldia blong yufala. Hem i jajem olgeta evriwan finis, se bambae oli mas ded. 3 Mo long taem ya, bambae i no gat man i stap blong berem* ol dedbodi blong olgeta, bambae oli stap roten olbaot nomo, oli stap sting. Ol bigbigfala hil bambae oli red long blad blong olgeta. 4 ✝Long skae, san mo mun mo ol sta bambae oli brobrok, oli kam olsem asis blong graon nomo. Skae bambae i lus olsem kaliko we man i rolemap, mo ol sta bambae oli stap folfoldaon wanwan, olsem ol lif blong grep,* mo ol lif blong figtri.*

5 ✝"Hae God i mekem naef blong faet blong hem i rere finis long heven, nao bambae i yusum naef ya blong kilim ol man Edom oli ded, from we hem i jajem olgeta finis, se oli mas lus olgeta. 6 Blad mo gris blong olgeta bambae oli stap olbaot long naef ya, olsem blad mo gris blong sipsip mo nani we pris* i kilim blong mekem sakrefaes long hem. Hae God bambae i mekem sakrefaes ya long bigfala taon ya Bojeraha. Long kantri ya Edom, bambae hem i kilim plante man oli ded. 7 Ol man ya bambae oli foldaon olsem wael buluk, no smol bul we man i kilim i ded, nao graon bambae i red long blad blong olgeta, mo gris blong olgeta bambae i kavremap olgeta ples. 8 Long taem ya nao, Hae God bambae i sevem ol man Saeon,* mo bambae i givimbak ol samting ya we ol enemi oli mekem long olgeta.

9 "Long taem ya, wota blong ol reva long Edom bambae i kam kolta, mo asis blong graon blong hem bambae i kam salfa,* nao olbaot long evri ples, kantri ya bambae i kam kolta we i stap bon. 10 ✝Long dei mo long naet, kantri ya bambae i stap bon, mo smok blong hem bambae i stap go antap, gogo i no save finis. Bambae kantri ya i stap nating longtaem we longtaem, we neva bambae i gat man i wokbaot, i pastru long ples ya bakegen. 11 Ol hoknaet mo ol reven* bambae oli stap long ples ya, mo bambae oli mekem i kam ples blong olgeta. Hae God bambae i mekem kantri ya i kam nogud, nao ples ya bambae i stap olsem we wol i stap fastaem, long taem ya we hem i no wokem ol samting blong hem yet. 12 Bambae i no moa gat king i rul long kantri ya, mo ol haeman blong ples ya bambae oli lus olgeta. 13 Naoia, ol lida blong kantri ya oli gat ol bigfala haos blong olgeta, mo ol taon blong olgeta oli gat ol bigfala stonwol i goraon long olgeta, be ropnil mo grasnil bambae oli gru olbaot insaed long ol ples ya, mo ol wael dog mo ol hoknaet bambae oli kam stap long ol taon ya. 14 Ol wael anamol bambae oli stap wokbaot long ol ples ya, mo ol wael nani bambae oli stap singsingaot long olgeta, mo blak pijin ya we i stap wokbaot long naet, bambae i kam lukaot ples blong spel long ples ya.* bambae oli stap singsingaot long olgeta bakegen, mo woman devel ya Lilit we i stap wokbaot long naet, bambae i kam lukaot ples blong spel long ples ya. Tok ya nani, yu luk futnot M long 13.21. Devel ya Lilit, hem i wan woman devel we nem blong hem i stap kamaot long ol kastom stori blong ol man Asiria mo ol man Babilonia bifo. Long tok ya, profet i talem nem ya, blong soemaot we kantri ya Edom bambae i kam nogud, we i nogud olgeta. 15 Long ples ya, ol hoknaet bambae oli wokem nes blong olgeta long hem. Bambae oli putum eg, mo oli stap sidaon long olgeta, mo bambae oli lukaot long ol pikinini blong olgeta, gogo oli kam bigwan. Mo ol bigfala pijin ya valja* bambae oli kam stap long ples ya, we wan woman valja wetem man blong hem, wan wetem man blong hem.

16 "I gud yufala i go luk long buk ya blong Hae God. I gud yufala i ridim tok blong hem. Bambae i no gat wan long ol samting ya we mi mi talem, we bambae i no stap long kantri ya Edom, olgeta ya evriwan bambae oli stap long hem, man wetem woman, tufala tugeta i stap. Hae God nomo i talemaot se bambae i olsem, mo hem nomo bambae i tekem olgeta oli kam long ples ya. 17 Hem nao bambae i seraot ol graon long ples ya, blong olgeta evriwan oli gat ples blong olgeta. Nao bambae olgeta oli stap olwe long ples ya, mo ol pikinini we bambae oli kamaot biaen long olgeta, bambae oli stap long kantri ya gogo i no save finis."