1 ✝Nao Profet Aesea i talem long ol man blong hem se, "Olgeta. Naoia, laen* blong King Deved i olsem stamba blong wan tri we man i katemdaon finis. Be oltaem, stamba olsem i gat niufala gru i save kamaot long hem. Mo long sem fasin, bambae i gat wan niufala king i kamaot long stamba ya.

2 "King ya,

Spirit blong Hae God bambae i stap long hem,

i mekem hem i waes,

mo i mekem hem i man blong save.

Spirit ya

bambae i givim gudfala toktok long hem,

mo i mekem hem i gat paoa.

Bambae hem i mekem hem i save ol samting

we Hae God i wantem,

mo i mekem hem

i man blong ona long Hae God.* blong Hae God bambae i stap long hem, i mekem hem i waes, mo i mekem hem i man blong save. Hae God bambae i givim gudfala toktok long hem, mo i mekem hem i gat paoa. Bambae hem i mekem we king ya i save ol samting we hem i wantem, mo i mekem we hem i man blong ona long hem.

3 Oltaem nomo,

king ya bambae i glad tumas

blong obei long Hae God.

Sipos hem i jajem man,

bambae hem i no save luk

long ol samting ya nomo

we ol man oli save luk

long ae blong olgeta,

bambae hem i no save tingbaot

ol samting ya nomo

we ol man oli stap talem long hem.

4 ✝Bambae hem i stretem bisnes blong ol man

we trabol i kasem olgeta,

mo bambae i mekem long fasin we i stret olgeta.

Bambae hem i mekem rod

blong ol puaman oli save kasem

ol samting we oli gat raet blong kasem.

Bambae hem i tok,

nao ol man bambae oli kasem panis.

Long ol strong tok ya blong hem,

bambae hem i kilim ol man nogud oli ded.

5 ✝"Fasin blong hem

blong i rul long ol man blong hem,

oltaem bambae hem i stap mekem

i stret nomo,

mo fasin blong hem blong jajem man

bambae i stap sem mak oltaem.

6 ✝"Taem hem i rul,

wael dog mo pikinini blong sipsip

bambae tufala i save stap wanples nomo,

we tufala i fren gud.

Bigfala puskat ya leped*

we i stap kakae nani,

bambae i save go ledaon

wetem pikinini blong nani,

we tufala i save slip gud

long wan yad nomo.

Ol pikinini blong buluk

mo ol pikinini blong laeon

bambae oli stap kakae wanples nomo,

mo smol pikinini nomo bambae i naf

blong lukaot long olgeta.

7 Ol kao mo ol bea

bambae oli kakae wanples,

mo ol pikinini blong olgeta

bambae oli slip kwaet long wan yad nomo,

mo laeon bambae i kakae gras nomo,

olsem buluk.

8 Snek we sipos i kakae man,

bambae man i ded from,

be long taem ya,

bambae smol pikinini nomo

i save go klosap long hem,

i save go pleplei stret long ples

we snek i stap long hem.

9 ✝Long Saeon* ya,

tabu hil blong Hae God,

bambae i no moa gat man

we i save mekem i nogud long narafala man,

mo i no moa gat wan samting

we i save spolem man.

Kantri ya bambae i fulap gud long ol man

we oli savegud Hae God,

olsem we solwota i fulap gud

long ples blong hem.

10 ✝Long taem ya,

king ya bambae i stanap olsem flaeg,

blong ol man blong ol narafala kantri

oli kam hivap raon long hem.

Olgeta ya

bambae oli kam blong lukaot hem,

blong oli ona long hem,

from we hem i king,

mo from we ples blong hem i gudfala tumas."

11 Nao Profet Aesea i talem se, "Long taem ya, Hae God we i Masta* blong yumi bambae i yusum paoa blong hem bakegen, blong tekem ol man ya blong hem we oli stap long ol narafala kantri, oli kamhom bakegen. Hemia haf ya blong ol man blong hem we bambae oli stap laef yet, we bambae oli stap long Asiria, mo Ijip, mo Patros, mo Itiopia, mo Elam, mo Babilonia, mo Hamat, mo long ol kantri ya daon klosap long solwota, mo long ol aelan ya tu long medel solwota. Olgeta ya bambae oli aot, oli kambak bakegen long ples blong olgeta. 12 Long taem ya, Hae God bambae i pulum wan flaeg blong soemaot long ol man blong ol narafala kantri, se hem bambae i stap tekembak ol man Isrel* wetem ol man Juda* we oli stap wanwan olbaot long evri ples. Bambae oli aot long ol fo kona long wol, blong kambak bakegen long ples blong olgeta. 13 Long taem ya, jalus blong ol man Isrel bambae i finis, mo kros blong ol man Juda bambae i lus. Bambae ol man Isrel oli no moa jalus long ol man Juda, mo bambae ol man Juda oli no moa kros long ol man Isrel, bambae olgeta oli stap gud. 14 Nao biaen, tufala kantri ya bambae i joen wanples blong go mekem faet long ol man Filistia long saed long wes, mo blong go mekem faet long ol narafala man long saed long is, blong tekemaot olting blong olgeta. Tufala bambae i go mekem faet long ol man Edom mo ol man Moab, we bambae tufala i winim olgeta, mo ol man Amon tu bambae oli obei long tufala. 15 ✝Hae God bambae i mekem solwota long Sues Bei i kam drae olgeta, mo bambae i mekem hot win i blu long Yufretes Reva, gogo reva ya i kam drae olgeta. Bambae i gat seven smosmol fok nomo blong reva ya i stap, we wota i stap ron smosmol nomo long olgeta, mo ol man oli save wokbaot, oli save gokros isi nomo long olgeta. 16 Mo bambae i gat wan gudfala rod i aot long Asiria, i kam kasem ples ya blong yumi. Nao smol grup ya blong ol man blong Hae God, we bambae oli stap long taem ya, bambae oli save wokbaot long gudfala rod ya blong kamhom, olsem we ol bubu blong yumi bifo we oli aot long Ijip oli wokbaot i kam, oli stap folem gudfala rod blong olgeta."