1 ✝Nao Profet Aesea i talem long ol man blong hem se, "Olgeta. Mi mi luk wan vison,* mo long vison ya, mi luk ol samting we i hapen long Siria. Mo long vison ya, Hae God i talem se, ‘Naoia, taon ya Damaskes i wan bigfala taon, be bambae i no moa stap olsem. Bambae hem i fulap long ol hip nomo blong ol haos we oli brobrok olgeta. 2 Mo ol narafala taon long Siria bambae oli emti, bambae oli no moa gat man i stap long olgeta bakegen samtaem. Bambae ol sipsip mo nani nomo oli stap kakae olbaot long ol taon ya, mo bambae i no moa gat man blong ronem olgeta. 3 Long Damaskes, kaptel blong Siria, bambae i no moa gat king i stap, mo smol haf blong ol man Siria we bambae oli ronwe, bambae oli lus evriwan, olsem kantri ya Isrel,* we bambae i no moa gat taon we i gat bigfala stonwol blong hem, mo ol gudgudfala samting blong kantri ya bambae oli lus olgeta. Mi mi Hae God, mi gat olgeta paoa, mo hemia tok blong mi.’

4 "Mo bakegen, Hae God i talem se, ‘Naoia, kantri ya Isrel i gat plante gudgudfala samting blong hem, be i gat taem i stap kam we ol gudgudfala samting ya bambae oli lus. Naoia, ol man blong hem oli fatfat gud, be long taem ya, bambae oli bunbun olgeta. 5 Long taem ya, kantri ya bambae i kam olsem wan garen we man blong hem i go tekemaot olgeta kakae blong hem finis. Bambae hem i stap nating nomo, olsem ol garen ya blong yufala long gudfala graon ya daon long Refaem,* we yufala i go karemaot ol kakae blong olgeta i kam, nao i no moa gat wan samting nating i stap long olgeta. 6 Long taem ya, bambae i no moa gat plante man oli stap laef long kantri ya. Bambae hem i kam olsem wan tri ya olif,* we ol man oli tekemaot olgeta frut blong hem finis, tutri frut nomo i stap long top blong hem wetem wanwan frut olbaot long ol han blong hem daon. Mi mi Hae God, mi God blong yufala, mo hemia tok blong mi.’ "

7 Nao profet i talem se, "God ya blong yumi, hem i God blong olgeta ya tu long not. Hem i tabu tumas, mo hem nomo i mekem olgeta man. Mo long taem ya, bambae ol man oli lukluk long hem bakegen, blong i givhan long olgeta. 8 Bambae oli no moa trastem ol samting ya we oli wokem long han blong olgeta nomo. Mo bambae oli no moa tingbaot ol olta ya we oli wokem, mo ol pija blong woman god ya Asera,* wetem ol olta ya we i blong bonem insens* long hem.

9 "Long taem ya, ol taon ya we oli gat bigfala stonwol i goraon long olgeta, bambae oli stap nating, bambae ol man oli ronwe long olgeta. Ol haos blong olgeta, bambae ol man oli brebrekem, oli mekem oli kam nogud olgeta. Nao ol taon ya bambae oli stap nating nomo, olsem ol taon blong ol laen* blong Hivi,* mo ol taon blong ol laen blong Amoro,* we ol man blong olgeta oli ronronwe long olgeta bifo, long taem ya we ol olfala blong yumi oli kam long ples ya fastaem.

10 "Ol man Isrel. God ya blong yumi, we i stap sevem yufala, hem i stap lukaot gud long yufala, hem i stap blokemgud yufala, mo hem i strong sefples blong yufala, be naoia, yufala i fogetem hem finis. Yufala i stap wokem ol tabu garen* long 1.29., blong mekem wosip long ol god blong ol man blong ol narafala kantri, 11 mo sipos ol garen ya oli gru, mo oli karem flaoa long sem dei ya nomo we yufala i planem, be bambae yufala i no save tekem kakae long ol garen blong yufala. Bambae yufala i kasem bigfala trabol nomo long olgeta, we bambae i mekem yufala i harem nogud tumas long bodi blong yufala, we bambae i no gat man i save mekem yufala i gud bakegen."

12 Nao Profet Aesea i talem long ol man blong hem se, "Olgeta. Long vison* ya, mi mi luk we ol man blong ol narafala kantri we oli strong tumas, oli kros tumas long yumi, oli stap tok agens long yumi. Tok blong olgeta i olsem noes blong bigfala solwota we i brok long rif long taem blong hariken. 13 Olgeta ya oli stap resis i kam long yumi, olsem we bigfala solwota i brok, i spid i kam long sanbij, be taem Hae God i tok long olgeta, olgeta evriwan oli tanemraon, oli gobak bakegen. Hem i ronemaot olgeta oli flae, olsem smok blong graon nomo long saed blong hil, olsem drae lif we waelwin i karem i go. 14 Long sapa, olgeta oli mekem yumi fraet, yumi seksek, be long moning, oli no moa stap, oli lus."

Nao hem i gohed, i talem se, "Samting ya bambae i kasem olgeta man we oli kam blong spolem ples blong yumi, mo blong stilim olting blong yumi."