1 Nao profet i talem long ol man blong hem se, "Olgeta. I nogud yufala i stap ting se Hae God i no gat paoa, mo hem i no save sevem yufala. Mo i nogud yufala i stap talem se sora blong hem i fas, mo sipos yufala i krae long hem, bambae hem i no save harem yufala. 2 !I no olsem! !Ol sin blong yufala nomo oli mekem yufala i stap longwe long hem! !Ol rabis fasin blong yufala nomo oli mekem hem i tanem fes blong hem i gowe long yufala, nao yufala i no moa save luk hem! !From ol samting ya nomo, hem i no moa save lesin long yufala! 3 !Yufala i man blong giaman, mo yufala i man blong tok nogud! !Yufala i man blong faet, mo yufala i man blong kilim man i ded!

4 "Yufala i stap go long kot, be i no from we yufala i save se sipos jaj i mekem i stret, bambae yufala i save win. Oltaem yufala i stap talem ol giaman toktok, mo yufala i stap mekem ol giaman fasin, blong yufala i save win. Oltaem yufala i stap mekem plan blong spolem ol narafala man, mo yufala i stap gohed blong folem ol plan ya. 5,6 Ol rabis plan ya blong yufala oli samting blong kilim man nomo. Oli olsem eg blong rabis snek ya we taem i kakae man, man i ded from. Sipos man i kakae eg ya, bambae hem i ded. Sipos wan man i brekem wan eg olsem, bambae rabis snek ya i kamaot. Be ol rabis plan ya blong yufala oli no save mekem yufala i win. Oli olsem klos we man i somap long tred blong nes blong spaeda nomo. 7 ✝Oltaem, yufala i stap mekem plan blong mekem ol fasin nogud, mo oltaem, yufala i stap taetem yufala, blong yufala i no gohed long olgeta wantaem. Yufala i save kilim man i ded we i no mekem i nogud long yufala, we yufala i no tingbaot samting ya, yufala i gohed nomo. Long evri ples we yufala i pas long hem, yufala i stap spolem evri samting, we oli kam nogud olgeta. 8 Yufala i no save stap gud wetem ol narafala man. Olgeta fasin blong yufala i no stret, mo neva yufala i save mekem i stret long narafala man. Yufala i stap folem wan rod we i kruked olgeta, mo i no gat man we i folem rod ya, i save stap gud."

9 Nao ol man oli talem se, "!Hae God! Naoia nomo, mifala i luksave from wanem yu yu no tekemaot mifala long han blong olgeta ya we oli stap mekem i strong tumas long mifala, yu no sevem mifala. Mifala i wantem tumas blong wokbaot long delaet, be tudak nomo i stap. 10 Nao mifala i stap pusum han blong mifala i go olbaot, olsem man we ae blong hem i blaen. Mifala i stap wokbaot long medel dei, be mifala i stap folfoldaon olsem we mifala i stap wokbaot long medel naet, no long Hom* blong ol Dedman, we i tudak olgeta. 11 Mifala i stap harem nogud tumas, we oltaem mifala i stap singaot bigwan from. Ol narafala man oli stap mekem i strong tumas long mifala, mo oli stap mekem i nogud long mifala. Oltaem, mifala i wantem tumas blong yu yu sevem mifala, be i no gat wan samting i kamtru.

12 "Hae God. Plante taem, mifala i brekem ol loa blong yu. Oltaem ol fasin nogud blong mifala oli stap jajem mifala. Mifala i savegud olgeta evriwan. 13 Mifala i girap agens long yu, mifala i tanem baksaed long yu, nao mifala i no moa folem yu. Mifala i gowe olgeta long yu, mo mifala i stap mekem i strong tumas long ol narafala man. Ol tingting blong mifala, mo ol tok blong mifala, olgeta evriwan i blong giaman nomo. 14 Fasin ya we man i mekem i stret long narafala man, mifala i ronemaot finis, mo fasin we i stret long fes blong yu, hem i no moa save kam klosap long mifala. Long ples blong jajem man, trutok i no moa stanap, hem i foldaon finis, mo fasin ya we man i talem trutok hem i no moa gat ples blong hem. 15 Naoia, i no moa gat stret fasin i stap long ples ya, mo sipos wan man i lego ol rabis fasin, wantaem nomo, bambae hem i luk we ol narafala man oli stap spolem hem."

Nao profet i talem long ol man blong hem se, "Olgeta. Hae God i luk ol samting ya, mo hem i no glad nating, from we fasin ya we man i stap mekem i stret long narafala man, hem i no moa gat. 16 ✝Hem i sapraes tumas blong luk we i no gat man we i save givhan long olgeta we ol man oli stap mekem i strong tumas long olgeta, oli stap spolem olgeta. From samting ya, hem bambae i kam long paoa blong hem, mo long stret fasin blong hem, nao i winim olgeta we oli stap spolem ol man long fasin ya, mo i sevem olgeta ya we ol man oli stap spolem olgeta. 17 ✝Fasin blong hem blong mekem i stret long ol man, bambae i olsem spesel klos blong faet blong hem, mo paoa blong hem blong sevem man, bambae i olsem hat blong faet blong hem. Mo tingting blong hem we hem i wantem tumas blong stretem ol fasin we i no stret, mo blong givimbak ol fasin nogud we ol man oli stap mekem long ol narafala man, bambae i olsem klos blong hem. 18 Nating we ol enemi blong hem, sam long olgeta oli stap long ol narafala kantri we i longwe, be bambae hem i panisim olgeta, stret long mak blong ol samting we oli mekem. 19 I stat long saed i go long is, go kasem long saed i go long wes, bambae olgeta man oli fraet long hem, mo long bigfala paoa blong hem. Hem bambae i kam olsem wota we i ron bigwan, no bigfala win we i blu strong tumas.* i kam olsem wota we i ron bigwan, Spirit blong Hae God bambae i ronemaot hem.

20 ✝"Be yumi ya, yumi ol laen* blong Isrel,* yumi ol man blong Hae God, mo hem i talem long yumi se, ‘!Ol man blong mi! Bambae mi mi kam long taon ya Jerusalem,* blong blokemgud yufala, mo blong sevem yufala we i tanem tingting blong yufala from ol sin blong yufala, blong mekem yufala i fri. 21 !Yu luk! Naoia mi mi mekem promes* wetem yufala. Mi mi putum Spirit blong mi i stap finis long yufala, mo mi tijim yufala finis long tok blong mi, mo tufala samting ya bambae i stap olwe long yufala mo long ol pikinini blong yufala, mo long olgeta we bambae oli stap kamaot biaen long yufala, gogo i no save finis.* blong mi i stap finis long yufala, mo mi tijim yufala finis long ol tok blong mi, mo tufala samting ya bambae i stap olwe long yufala. Be bambae yufala i mas obei long mi, mo yufala i mas tijim ol pikinini blong yufala, wetem olgeta we bambae oli stap kamaot biaen long yufala blong oli obei long mi gogo i no save finis. Mi mi Hae God, mo hemia tok blong mi.’ "