1 ✝Nao Profet Aesea i talem long ol man blong hem se, "Olgeta. Mi mi luk wan vison,* mo long vison ya, mi luk ol samting we bambae i hapen long Babilon. 2 Mi harem we Hae God i singaot long ol man Media* se, ‘Yufala i mas go antap long wan hil we i no gat tri long hem, yufala i pulum flaeg ya we i saen blong faet. Yufala i mas singaot bigwan long ol soldia blong yufala, mo yufala i mas leftemap han blong yufala blong mekem saen long olgeta. Saen ya i blong soemaot we i taem blong yufala i go mekem faet agens long bigfala taon ya Babilon, we ol haeman blong hem oli stap flas tumas, mo i taem blong ol soldia blong yufala oli kam brekemdaon doa* blong bigfala stonwol blong hem. 3 Ol soldia blong yufala oli man blong faet blong mi, mo mi mi stap singaot olgeta oli kam. Olgeta oli tabu, oli man blong mi. Olgeta oli strong man blong faet, mo oli naf blong panisim olgeta ya we mi mi kros long olgeta. Fasin blong faet blong olgeta i nambawan, mo oli stap smat long hem, nao oli glad tumas blong kam mekem faet.’

4 "Mo bakegen, mi harem we Hae God i talem se, ‘Ol man Babilon.* !Yufala i lesin! ?Yufala i harem noes ya olbaot antap long ol bigbigfala hil ya? Noes ya i noes blong plante man we oli stap kam wanples, we fulap man blong plante kantri oli stap hivap. Mi mi gat olgeta paoa, mo mi stap tekem ol man blong faet blong mi oli kam wanples, blong kam mekem faet long yufala. 5 Olgeta ya oli aot long wan kantri we i stap longwe, olsem we oli aot long narasaed wol oli stap kam. Mi mi kros tumas, mo bambae mi tekem olgeta oli kam blong spolem olgeta ples blong yufala.

6 ✝" ‘!Yufala i krae! !Yufala i singaot bigwan! !Bigfala dei ya blong mi klosap i kamtru nao! Mi mi gat olgeta paoa, mo long taem ya, bambae mi spolem olgeta samting. 7 Nao from samting ya, han blong yufala evriwan bambae oli stap hanghang nomo. Tingting blong yufala evriwan bambae i foldaon olgeta. 8 Bambae yufala evriwan i fraet we i fraet, bambae yufala i harem nogud tumas long bodi blong yufala, olsem woman we i stap bonem pikinini i stap harem nogud tumas long bodi blong hem. Bambae yufala i fraet tumas, yufala i stap lukluk yufala nomo, we fes blong yufala i nogud, from we yufala i sem tumas. 9 Taem ya bambae i wan hadtaem, from we mi mi kros we mi kros, mo mi rere blong jajem olgeta man. Bambae mi jajem olgeta we oli stap mekem sin, mi spolemgud olgeta, mo bambae mi spolem ples blong olgeta tu, mi mekem i stap nating. 10 ✝Ol sta ya we oli stap hivap wanples, mo ol narafala sta ya we oli stap wanwan olbaot, bambae oli no moa saen. Taem san i kam antap, bambae hem i dak, mo mun tu bambae i no moa saen.

11 " ‘Mi bambae mi tekem bigfala trabol i kam kasem olgeta ples long wol ya, mo bambae mi panisim olgeta man nogud from ol sin blong olgeta. Olgeta we oli stap praod, bambae mi daonem tingting blong olgeta, mo olgeta we oli stap flas tumas, mo oli stap mekem i strong tumas long ol man, bambae mi panisim olgeta. 12 Olgeta we bambae oli no ded long taem ya, bambae oli no plante nating, bambae i strong moa blong faenem olgeta, i winim we i strong blong faenem gol we i beswan. 13 Mi mi gat olgeta paoa, mo long taem ya we bambae mi mi kros tumas, bambae mi soemaot paoa blong mi, nao skae bambae i fraet, i seksek, mo graon bambae i seksek gogo, i kamaot long ples blong hem.

14 " ‘Long taem ya, ol man blong ol narafala kantri we bambae oli stap long taon ya Babilon, bambae oli aot, oli gobak evriwan long ol ples blong olgeta. Bambae oli ron wanwan, olsem ol dia* long bus we man blong lukaot mit i faenem olgeta. Bambae oli resis olbaot, olsem ol sipsip we i no gat man blong lukaot long olgeta. 15,16 Ol man blong taon ya bambae oli no save mekem wan samting. Ol soldia blong ol man Media bambae oli smasem ol pikinini blong olgeta oli ded, mo bambae oli tekemaot olting blong olgeta, oli karem i go, mo bambae oli slip wetem ol woman blong olgeta, we oli fosem olgeta nomo, mo ol man blong taon ya bambae oli stap stanap nating nomo, oli stap lukluk olgeta. Mo sipos olgeta oli holem wan man, bambae oli stikim hem i ded.

17 " ‘Olgeta ya oli no wantem silva no gol blong Babilonia, oli no intres nating long ol samting ya. Mi nomo bambae mi pulum olgeta blong oli kam mekem faet long olgeta. 18 Bambae olgeta oli kilim ol yang boe blong ples ya long ol bonara blong olgeta, mo bambae oli kilim ol pikinini mo ol bebi, we bambae oli no gat sore nating. 19 ✝Kantri ya Babilonia, hem i naes moa, i winim olgeta narafala kantri long wol, mo ol man blong ples ya oli glad tumas long hem. Be mi bambae mi spolemgud kantri ya, olsem we mi spolemgud Sodom mo Gomora bifo. 20 Bambae i no moa gat man i stap long ples ya bakegen samtaem. Ol man Arab, we oltaem oli stap muvum ples blong olgeta i go olbaot, be neva bambae i gat wan long olgeta i kam putumap haos tapolen blong hem long ples ya. Mo ol man ya blong lukaot long sipsip, be neva bambae i gat wan long olgeta i tekem ol sipsip blong hem oli kam lukaot kakae long ples ya. 21 ✝Taon ya Babilon bambae i kam ples blong ol anamol ya blong draeples. Bambae i kam ples blong nes blong hoknaet, mo ol bigfala pijin ya ostrij* bambae oli stap mekem ples blong olgeta long ples ya, mo ol wael nani* bambae oli stap klaem olbaot long ol olfala haos blong hem. 22 Ol strongfala haos blong taon ya we oli hae, wetem ol haos blong ol haeman, bambae oli fulap gud long noes blong ol wael dog we oli stap krae bigwan insaed. !Dei blong Babilon klosap i kamtru nao! !Taem blong hem klosap i finis nao!’ "