1 Bakegen, Profet Aesea i talem long ol man blong hem se,

"Olgeta.

I gat taem i stap kam,

we draeples bambae i harem gud,

i glad.

Ples we ol samting i no save gru long hem,

ol flaoa bambae oli stap gru long hem.

2 Draeples bambae i glad, i singsing,

bambae hem i glad tumas,

we i stap singaot bigwan from.

Ples ya bambae i jenis,

i kam naes we i naes,

olsem ol hil long kantri ya Lebanon,

mo graon blong ples ya

bambae i kam nambawan,

olsem gudfala graon ya blong garen

klosap long hil ya Kamel,

mo long levelples ya Saron.

Hae God i God blong yumi,

mo long taem ya,

bambae olgeta man oli luk

ol gudgudfala samting blong hem.

Bambae oli luk

we hem i hae we i hae,

mo we i gat olgeta paoa.

3 ✝Ol man we han blong olgeta i taed finis,

oli no moa save leftemap,

yufala i mas mekem han blong olgeta

i strong bakegen.

Mo olgeta we ni blong olgeta i stap seksek,

oli no moa save nildaon,

yufala i mas mekem ni blong olgeta

i strong bakegen.

4 Mo olgeta we oli fraet,

yufala i mas talem long olgeta se,

‘!Yufala i no fraet!

!Tingting blong yufala i mas strong!

!Naoia God blong yumi bambae i kamtru!

!Hem bambae i sevem yufala,

mo bambae i panisim ol enemi blong yufala!’

5 ✝"Long taem ya,

ol blaen man bambae oli save lukluk,

mo olgeta we sora blong olgeta i fas,

sora blong olgeta bambae i open bakegen.

6 Olgeta we leg blong olgeta i nogud,

bambae leg blong olgeta i kam gud bakegen,

nao oli jamjam olbaot, oli danis,

mo olgeta we oli no save toktok,

bambae oli toktok,

nao bambae oli glad,

oli stap singsingaot from.

Long draeples,

ol springwota bambae oli kamkamaot,

nao i mekem

we bambae i gat ol reva oli stap ron long hem.

7 Mo long ples we i sanbij nomo,

we i hot tumas,

bambae i gat bigfala lugun

i stap long hem.

Long graon we i drae we i drae,

ol springwota bambae oli kamaot long hem.

Mo long ples we fastaem,

i gat ol wael dog nomo i stap long hem,

bambae i gat fulap waelken,

mo ol longfala gras blong wota long hem.

8 "Bambae i gat wan bigfala rod i stap,

we nem blong hem

‘Rod we i Tabu, i Blong Hae God’.

Man blong mekem sin

bambae i no save wokbaot long rod ya,

mo man nogud we i no gat hed,

bambae i no save pas long hem,

ol stret man nomo

bambae oli save folem.* stret man nomo bambae oli save folem, mo man we hed blong hem i krangke i no save gowe long hem.

9 Bambae i no gat laeon

i save stap long rod ya,

mo ol anamol blong kakae man

bambae oli no save pas long hem.

Ol man we fastaem oli slef*

be Hae God i pemaot olgeta,

i mekem olgeta i fri,

olgeta ya nomo

bambae oli wokbaot folem rod ya

10 blong kambak long hom blong olgeta.

Bambae olgeta ya oli kam long Saeon*

we oli stap singsing,

bambae oli kamtru

we oli hapi tumas.

Long ples ya,

bambae oli no moa save krae,

bambae oli no moa save harem nogud,

bambae oli stap harem gud olwe,

oli glad we i glad,

gogo i no save finis."