1 ✝Nao Profet Aesea i talem long ol man blong hem se, "Olgeta. Mi luk wan vison,* mo long vison ya, mi luk we i gat wan kantri i stap longwe, long narasaed long ol reva ya blong kantri ya Itiopia. Long ples ya, i gat fulap mostik i stap, we ples i fulap gud long noes blong wing blong olgeta.* ya, i gat fulap bot we oli spid olsem we oli gat wing. Mo sekenwan i olsem. Long kantri ya i gat wan woman god we i gat wing. 2 Ol man blong karem tok blong gavman blong kantri ya oli aot, oli tekem bot we i laet gud, we oli wokem long waelken, nao oli folem Nael Reva, oli spid i kam.

"Be Hae God i talem long olgeta se, ‘!Ei! Yufala i gat paoa, mo kantri blong yufala i strong, mo yufala i mas gobak long hem. Long ples blong yufala i gat plante reva oli stap ron i go olbaot insaed long hem, mo ol man ples blong yufala oli longlongfala man, we skin blong olgeta i saen gud, mo olbaot long wol, olgeta man oli fraet long yufala. Ale, yufala i go talemaot tok blong mi long ol man ples blong yufala.’ "

3 Nao profet i talem se, "!Olgeta man long wol! !Yufala i lesin! Bambae ol man oli pulum flaeg antap long ol bigbigfala hil. !Yufala i mas rere blong luk samting ya! Bambae oli blu pupu blong mekem saen. !Yufala i mas lesin blong harem samting ya! 4 Hae God i talem long mi se, ‘Mi mi stap long heven, be bambae mi lukluk i kamdaon long yufala, we bambae mi stap kwaet nomo, olsem we wota blong naet i foldaon long graon long hot taem, we i taem blong tekemaot kakae long garen. Bambae mi stap wajem yufala, olsem we san i stap saen i kam long yufala long medel dei. 5 Taem we ol flaoa blong rop ya grep* oli folfoldaon finis, mo frut blong hem i stap raep, be ol man oli no go yet blong tekem i kam, bambae ol enemi oli flatemgud ol man Itiopia, olsem we naef i katemaot han blong rop ya. 6 Ol dedbodi blong ol soldia blong olgeta bambae oli stap olbaot long klia ples nomo, blong ol pijin mo ol wael anamol oli kakae. Oltaem, long hot taem, bambae ol pijin oli stap kakae ol dedbodi ya, mo long koltaem, bambae ol anamol oli kam, oli kakae olgeta.’ "

7 Nao profet i talem se, "Ol man ya blong karem tok, kantri blong olgeta i strong, mo ol man blong hem oli gat paoa. Ples blong olgeta, i gat plante reva oli stap ron i go olbaot insaed long hem, mo ol man blong ples ya oli longlongfala man we skin blong olgeta i saen gud, mo olbaot long wol, olgeta man oli fraet long olgeta. Be i gat taem i stap kam we ol man blong kantri ya bambae oli karem presen i kam long bigfala hil ya Saeon* blong givim long Hae God. Hem i gat olgeta paoa, mo ples ya i prapa ples blong mekem wosip long hem."