1 ✝Bakegen, profet i talem long ol man blong hem se, "Olgeta. I gat wan man i aot long taon ya Bojeraha long Edom, i stap wokbaot i kam. Klos blong hem i red we i red, mo i flas gud, mo fasin blong wokbaot blong hem i soemaot we hem i strong, i gat paoa. ?Be hu ya?

"Nao Hae God i talem se, ‘!Mi ya mi stap kam! !Mi mi gat paoa, mi save sevem yufala! !Mo mi stap kam blong talemaot we mi mi win, from we fasin blong mi i stret olgeta!’

2 "Nao mi mi askem long hem se, ‘?Be from wanem klos blong yu i red olsem klos blong man we i stap purumpurumbut long frut blong grep* blong mekem waen long hem?’

3 ✝"Mo hem i talem se, ‘Mi mi stap flatemdaon ol man blong ol narafala kantri, olsem we man i stap purumbut long ol frut blong grep. Mi mi mekem samting ya mi wan, i no gat man i givhan long mi. Mi mi flatemgud olgeta, from we mi kros tumas long olgeta, mo blad blong olgeta i mekem klos ya blong mi i red. 4 Mi mi luk se stret taem i kam finis, blong mi sevem ol man blong mi, mi mekem olgeta oli fri, mo blong mi panisimgud ol enemi blong olgeta. 5 ✝Taem mi luk we i no gat man blong givhan long mi, mi mi sek, mi sapraes tumas. Be kros blong mi i mekem mi mi girap, nao mi wan nomo mi winim olgeta long paoa blong mi. 6 Mi mi kros tumas, nao long plante kantri, mi mi flatemdaon olgeta man, we mi smasemgud olgeta, mi kilim olgeta oli ded, mo mi kafsaedem blad blong olgeta i ron i go long graon.’ "

7 Nao profet i prea, i talem se,

"Hae God.

Oltaem bambae mi mi talemaot

we fasin ya blong yu

we yu yu stap lavem man,

hem i no save lus.

Bambae mi mi presem yu

from ol samting ya we yu yu mekem

blong givhan long mifala.

Mifala ol laen* blong Isrel,*

yu yu stap mekem i gud tumas long mifala,

from we yu gat sore long mifala,

mo oltaem yu stap lavem mifala tumas.

8,9 "Yu yu talem se, ‘!Olgeta ya oli man blong mi! !Oli no save giaman long mi!’ From samting ya, yu nomo yu tekemaot mifala long ol samting ya we oli stap mekem mifala i harem nogud tumas, yu stap sevem mifala. I no wan enjel blong yu we i mekem samting ya. Yu nomo yu kam, yu sevem mifala.* Long ol samting ya we oli stap mekem mifala i harem nogud tumas, yu tu yu stap harem nogud, nao enjel ya we oltaem i stap wetem yu, hem i kam sevem mifala. Yu yu lavem mifala, mo yu gat sore long mifala, nao yu kam sevem mifala, yu mekem mifala i fri. Longtaem finis, oltaem yu yu stap lukaot gud long mifala, 10 be long taem ya we mifala i girap, mifala i agens long yu, mifala i mekem we Tabu Spirit blong yu i harem nogud.* Nao from ol samting ya, yu yu kam enemi blong mifala, mo yu faet agens long mifala.

11 "Nao mifala i tingbaot taem ya blong Moses, man ya blong wok blong yu bifo. Mo mifala i talem se, ‘Bifo, Hae God i sevem ol lida blong ol man blong hem, i tekemaot olgeta long solwota. Be naoia, yumi no moa save faenem hem. Bifo, hem i givim Tabu Spirit blong hem long Moses blong givim paoa long hem.* blong givim paoa long olgeta. Mo narawan i talem se, Bifo, hem i givim paoa blong hem long Moses, blong mekem hem i strong. Be naoia, yumi no moa luk paoa blong hem. 12,13 ✝Bifo, Hae God i yusum Moses blong mekem ol bigbigfala wok long paoa blong hem. Hem i mekem dip solwota i seraot, mo i lidim ol man blong hem oli pastru long ples ya, mo from ol samting ya, nem blong hem i hae we i hae, mo neva i save lus. Be naoia, hem i no moa stap. Taem hem i stap lidim ol man blong hem, olgeta oli stap wokbaot gud nomo. Olgeta oli olsem wael hos, we neva i stambol, i foldaon.’

14 "Hae God. Yu yu tekem ol man blong yu bifo, oli kam long ples blong spel, olsem we man blong lukaot long buluk i tekem ol buluk oli go stap long levelples klosap long reva, we gudfala gras i stap long hem.* i tekem ol man blong yu bifo, oli kam long ples blong spel, olsem we man blong lukaot long buluk i tekem ol buluk oli go stap long levelples klosap long reva, we gudfala gras i stap long hem. Yu yu lidim ol man blong yu i kam, mo fasin we yu yu lidim olgeta i mekem ol man oli ona long nem blong yu.

15 "Hae God. Yu yu stap long heven. Ples blong yu i tabu we i tabu, mo yu yu King we yu hae we yu hae. Plis yu lukluk i kam long mifala. Mifala i no moa save luk we yu yu stap tingting long mifala. Mifala i no moa save luk bigfala paoa blong yu. Mifala i no moa save luk we yu yu lavem mifala, mo yu gat sore long mifala. !Plis yu no tanem baksaed long mifala! 16 !Yu yu Papa blong mifala! Olfala bubu blong mifala bifo, Jekob,* mo bubu blong hem Ebraham, tufala i no moa stap, be sipos tufala i stap, tufala i no moa save talem se mifala i kamaot biaen long tufala. Be yu yu Papa blong mifala, mo oltaem yu stap sevem mifala, yu stap mekem mifala i fri. 17 !Oltaem mifala i stap gowe long rod blong yu! ?From wanem yu letem mifala i mekem olsem? ?Weswe yu mekem mifala i stronghed, nao mifala i stap tanem baksaed long yu? !Mifala i man blong wok blong yu! !Mifala i man blong yu, i stat bifo olgeta, kam kasem tede! !Plis yu kambak, yu givhan long mifala! 18 Mifala i tabu, mifala i blong yu nomo. Be ol enemi blong mifala oli ronemaot mifala, oli mekem mifala i go stap longwe, mo oli stap purumbut long tabu ples blong yu. 19 Mo yu yu stap mekem i narafala olgeta long mifala, olsem we neva yu yu King blong mifala, mo neva mifala i man blong yu.