1 Long taem ya ol man Jeriko oli satemgud ol doa* blong bigfala stonwol blong taon ya, mo ol gad oli stap lukaot blong blokem Josua olgeta oli no save go insaed. Nao i no gat man i save go insaed, mo i no gat man i save go afsaed tu. 2 Nao Hae God i talem long Josua se, "Naoia mi mi putum taon ya Jeriko long han blong yu. King* blong hem, wetem ol soldia blong hem we oli strong man blong faet, mi mi putum olgeta evriwan long han blong yu finis. 3 Evri dei, yu wetem ol soldia blong yu, bambae yufala i mas maj i goraon long taon ya wan taem, gogo kasem sikis dei. 4 Bambae seven pris* we oli holem pupu we oli wokem long hon blong sipsip oli mas maj wetem yufala, mo ol pris ya we oli stap karem Bokis ya we i Saen blong Promes* blong mi bambae oli mas go biaen long olgeta. Nao long namba seven dei, bambae yufala i mas maj i goraon long taon ya seven taem. Mo long taem ya, ol pris ya bambae oli mas stap blu long pupu blong olgeta. 5 Nao taem yufala i harem we oli blu bigwan mo oli pulum i longfala, long semtaem, bambae yufala evriwan i mas singaot bigwan. Nao bigfala stonwol blong taon ya bambae i brobrok i foldaon. Nao olgeta soldia blong yu bambae oli save go insaed wantaem nomo long taon ya."

6 Nao Josua i singaot ol pris,* i talem long olgeta se, "Olgeta. Naoia bambae yumi go. Bambae yufala i karem Bokis ya we i Saen blong Promes* blong Hae God, mo seven long yufala bambae oli holem pupu we oli wokem long hon blong sipsip, oli wokbaot fastaem long Bokis ya." 7 Mo hem i talem long ol soldia blong hem se, "Naoia bambae yumi maj i goraon long taon ya. Haf blong yufala bambae i wokbaot fastaem long ol pris we oli karem Bokis ya."