1 Nao Job i prea, i talem se,

"God.

Mi mi taed finis long laef ya,

mi no laekem nating.

Mi stap harem nogud tumas.

Plis yu lesin long tok blong mi.

2 Plis yu no talem se mi mi rong.

I moa gud yu talemaot long mi

ol poen ya we yu yu gat long mi.

3 Yu yu stap mekem

i strong tumas long mi.

?Yu ting se fasin ya i stret?

Yu nao yu mekem mi,

be naoia yu stap lukluk nogud long mi.

?Yu ting se hemia i gudfala fasin?

Ol man nogud oli stap mekem plan

agens long mi,

be yu yu stap glad

long tingting blong olgeta.

4 Mifala i no save lukluk ol samting

olsem we yu yu stap lukluk.

Lukluk blong mifala

i no olsem lukluk blong yu.

5 Laef blong mifala i sotfala nomo,

i no olsem laef blong yu.

6 ?From wanem yu stap lukaot

ol sin blong mi?

?From wanem yu stap traem faenemaot

ol smosmol poen long laef blong mi?

7 Yu yu save finis

we mi mi no mekem wan samting nogud,

mo we i no gat man i save tekemaot mi

long han blong yu.

8 "Yu nomo yu wokem mi

long han blong yu,

mo naoia,

sem han ya nomo blong yu

i stap spolem mi.

9 Yu mas tingbaot

we yu nao yu tekem graon,

yu wokem mi long hem.

?Olsem wanem?

?Bambae yu yu smasem mi,

mi kam asis blong graon bakegen?

10 Yu yu givhan long papa blong mi

blong i tekem mama blong mi,

mo yu mekem mi mi gru

insaed long bel blong mama blong mi.

11 Yu nomo yu mekem bodi blong mi,

we yu joenem ol bun blong mi

mo ol string blong mi

oli fas wanples,

nao yu kavremap ol bun ya

long mit blong mi

mo skin blong mi.

12 Yu yu givim laef long mi,

mo oltaem yu yu lavem mi.

Yu yu stap lukaot gud long mi,

mo oltaem, yu stap mekem

we laef blong mi i stap gud.

13 Be naoia mi mi luksave

se long olgeta samting ya,

yu yu stap folem wan plan we i haed,

se bambae yu spolem mi.

14 Oltaem yu yu stap wajem mi

blong luk se mi mi mekem sin,

mo sipos yu luk we mi mi mekem,

bambae yu no save fogivim mi.

15 Taem mi mi mekem sin,

mi kam nogud long fes blong yu.

Be taem mi mekem i stret,

mi no kasem wan gud samting from.

Tingting blong mi i kam nogud finis,

mo oltaem mi mi sem tumas.

16 Taem we laef blong mi i stap ron gud,

be yu yu kam olsem laeon,

yu lukaot mi blong yu spolem mi.

Mo taem yu wantem spolem mi,

yu yu rere blong soemaot

bigfala paoa blong yu.

17 Oltaem yu yu gat ol witnes

we oli agens long mi.

Oltaem kros blong yu

i stap kam bigwan moa long mi.

Mo oltaem yu stap mekem niufala plan

blong kam mekem faet long mi.

18 "?God, from wanem yu letem mi mi bon?

Sipos mi mi ded taem man i no luk mi yet,

bambae i moa gud.

19 Sipos mi kamaot long bel blong mama blong mi,

mi go stret long beregraon,

hemia bambae i gud,

i sem mak nomo

olsem we neva mi mi bon.

20 Plis yu no moa mekem wan samting long mi.

Taem blong mi klosap i finis.

Plis yu letem mi mi glad

long smol taem ya we i stap.

21 Klosap mi mi go nao,

mo neva bambae mi kambak bakegen.

Bambae mi go long ples ya we i tudak,

we i no gat laet nating long hem.

22 Hem i ples blong tudak,

we i tudak olgeta,

mo evri samting long ples ya i olbaot,

i paspas gud.

Long ples ya, i no gat laet nating,

tudak nomo i rul."