1 * I gat ples i stap we man i save digim graon,

blong tekem ston blong silva

we oli wokem silva long hem.

Mo i gat ples i stap

we oli stap bonem gol long faea

blong tekemaot gol we i klin gud.

2 I gat ples tu

we ol man oli save digim graon,

blong tekemaot aean long hem,

mo ples we oli stap bonem ston blong bras,

blong bras i ronaot long hem.

3 Ol man oli stap digim hol

we i godaon olgeta insaed long

graon,

nao oli stap digim ol ston

long ples ya we i tudak.

Oli stap go long ol ples

we i tudak we i tudak olgeta,

blong lukaot ol gudfala samting

we i stap long ol ples ya.

4 Oli stap digim hol

blong mekem rod i go insaed long graon

blong oli save go tekemaot

ol gudgudfala samting

long ples we i longwe

long ples blong ol man,

mo we i no gat man i stap go long hem.

Nao oli stap wok insaed long ol hol ya,

we oli stap holemtaet ol rop nomo

blong faenem rod blong kamaot bakegen.

5 Olbaot antap long graon,

ol man oli stap tekemaot kakae

long graon,

be insaed long sem graon ya,

ol man oli stap digdigim graon,

mo oli stap brebrekem ol ston

blong tekemaot ol gudgudfala

samting.

6 Insaed long graon ya,

i gat ol flas ston ya safaea,*

we ol man oli save tekemaot

long ol narafala ston bakegen,

mo long asis blong graon ya,

i gat gol tu i stap.

7 Nating we pijin ya hok* we i gat gud ae,

we i save luk ol smosmol samting,

be i no gat wan long olgeta

we i save luk ol rod ya

we ol man oli digim

i go insaed long graon.

Mo bigfala pijin ya valja* tu

we i flae i pas antap,

be i no save luk ol rod ya.

8 Mo i no gat laeon

no narafala wael anamol olsem

we i stap pas long ol rod ya.

9 Nating we ston i strong tumas,

be ol man oli stap digim hol

blong go insaed long hem,

mo ol bigbigfala hil,

be olgeta oli stap digimaot

stamba blong olgeta daon.

10 Taem oli digim hol blong mekem rod

blong go insaed long graon,

oli stap faenem ol flas ston

we oli gat kala.

11 Oli stap digim i go kasem

ol stamba blong reva daon,

mo oli stap tektekemaot ol samting

we i stap haed,

i kamaot long klia ples.

12 ?Be weples nao

bambae yumi save faenem waestok

long hem?

?Weples nao

bambae yumi save pas long hem

blong kasem gudfala tingting?

13 Sipos yumi traem lukaot waestok

long man,

bambae yumi no save faenem.

I no gat man i save makem

praes blong hem.

14 Solwota i stap talem se,

"Waestok i no stap long mi,"

Mo ol dip ples long solwota oli stap talem se,

"Waestok i no stap long mifala."

15 Man i no save pem waestok

long silva no long gol.

16 Gol we i beswan no ol flas ston

oli no naf blong pem waestok long

hem.

17 Praes blong hem i antap moa,

i winim gol

no gudfala botel we oli wokem long gol

we i blong putum flaoa long hem,

no ol gudgudfala samting

we oli wokem long glas, we oli flas we i flas gud.

18 Praes blong waestok ya i antap moa,

i winim praes blong flas korel,*

no blong glas we i beswan,

no blong ol flas ston ya rubi*

we oli red gud.

19 Nambawan flas ston ya topas,*

no gol we i klin we i klin gud,

be praes blong hem i no naf

blong pem waestok.

20 ?Be stamba blong waestok i stap wea?

?Yumi save pas long weples nao

blong kasem gudfala tingting?

21 I no gat wan laef samting long wol ya,

we i save luk waestok.

Nating we pijin we i flae antap olgeta,

be hem i no save luk.

22 Samting ya "Ded",

mo fasin ya "Spolem Ol Samting",

be tufala i stap talem se,

"!Sore!

Mitufala i no kasem stret toktok blong hem nating."

23 God nomo i save

rod blong kasem waestok ya.

Hem i save ples ya

we yumi save go faenem samting ya long hem,

24 from we hem i stap luk ol mak

we wol ya i go finis long hem,

mo i stap luk evri samting

aninit long skae ya.

25 Long taem ya we hem i givim paoa long win,

mo i putum ol mak

we solwota bambae i go finis long hem,

26 mo i stap makem weples

ren bambae i foldaon long hem,

mo i stap putum rod we klaod blong tanda bambae i pas long hem,

27 long taem ya nao, hem i luk waestok,

mo i traem faenemaot se i gud no i nogud,

nao i faenemaot we i gud we i gud, mo i talemaot we hem i glad long hem.

28 ✝Nao hem i talem long yumi se,

"Mi mi Hae God.

Sipos yufala i wantem kasem waes,

bambae yufala i mas ona long mi,

mo sipos yufala i wantem kasem gudfala tingting,

yufala i mas tanem baksaed

long ol fasin nogud."