1 Bifo i gat wan man i stap we nem blong hem Job, mo hem i stap long kantri ya Uj. Hem i stap mekem wosip long God, mo oltaem i stap bilif strong long hem we tingting blong hem i no foldaon nating. Hem i wan gudfala man, mo oltaem i stap lukaot gud blong i no mekem wan samting we i nogud. 2 Hem i gat seven pikinini boe blong hem mo tri dota blong hem, 3 mo i gat seven taosen sipsip, mo tri taosen kamel, mo wan taosen buluk, mo faef handred dongki. Mo hem i gat plante man blong wok blong hem, mo i rij we i rij, i winim olgeta man long ol ples ya long is.

4 Oltaem ol pikinini boe blong hem oli stap mekem lafet, we wan i mekem finis, biaen narawan, biaen narawan bakegen, gogo olgeta evriwan oli gat janis blong mekem lafet. Oltaem olgeta brata ya evriwan oli stap kam long ol lafet ya, mo oli stap singaot trifala sista blong olgeta tu oli kam. 5 Mo biaen long evri lafet ya, Job i stap girap long eli moning blong mekem sakrefaes blong ol pikinini ya blong hem wanwan, blong mekem olgeta oli klin long fes blong God. Oltaem hem i stap mekem samting ya, from we hem i ting se maet wan long olgeta i mekem sin long tingting blong hem we i spolem God.

6 ✝Nao wan dei, olgeta long heven oli kam stanap long fes blong Hae God, mo long dei ya, Setan* tu i kam wetem olgeta. 7 Nao Hae God i askem long hem se, "?Setan, yu kam wea?"

Mo hem i talem se, "Mi mi stap long wol. Mi stap go olbaot long evri haf blong hem."

8 Nao Hae God i askem long hem se, "?Yu luk fasin blong Job, man ya blong wok blong mi? I no gat narafala man long wol ya we i olsem hem. Hem i wan gudfala man we tingting blong hem i stap strong long mi. Oltaem hem i stap mekem wosip long mi, mo i stap lukaot gud blong i no mekem wan samting we i no stret."

9 ✝Be Setan i talem se, "No, be hem i stap mekem wosip long yu from we yu yu stap givhan gud long hem. 10 Oltaem yu stap lukaot gud long hem wetem ol pikinini blong hem mo olgeta samting blong hem, mo yu stap blokemgud olgeta. Evri samting we hem i stap mekem, be yu yu stap blesem olgeta, mo ol anamol ya we yu givim long hem, kantri ya i fulap gud long olgeta. 11 Be sipos yu tekemaot ol samting ya, bambae hem i tok nogud long yu, stret long fes blong yu."

12 Nao Hae God i talem long hem se, "Oraet, evri samting we hem i gat, naoia i stap long han blong yu, be yu no mas spolem bodi blong hem." Nao Setan i aot long fes blong hem, i gowe.

13 Nao wan dei, taem ol pikinini blong Job oli stap mekem lafet long haos blong fasbon brata blong olgeta, 14 wan man blong wok blong Job i resis i kam long hem, i talem se, "!Masta! Mifala i stap wok long garen,* mifala i stap yusum ol buluk blong yu blong pulum plao blong brebrekem graon, mo ol dongki blong yu oli stap kakae klosap long mifala. 15 Nao wantaem nomo, ol man Seba oli kam mekem faet long mifala, nao oli kilim olgeta man blong wok blong yu oli ded, mo oli tekem olgeta anamol blong yu, oli karem i blong olgeta. Mi wan nomo mi ronwe, nao mi kam blong talemaot trabol ya long yu."

16 Mo taem hem i stap toktok yet, wan narafala man blong wok i kamtru, i talem se, "!Masta! Ol sipsip blong yu mo ol man blong lukaot long olgeta, laetning i kilim olgeta evriwan i ded. Mi wan nomo mi ronwe, nao mi kam blong talemaot trabol ya long yu."

17 Mo taem hem i stap toktok yet, wan narafala man blong wok i kamtru, i talem se, "!Masta! Ol man Koldia oli mekem tri grup, nao oli kam mekem faet long mifala. Oli kilim olgeta man blong wok blong yu oli ded, mo oli tekem olgeta kamel blong yu, oli karem i blong olgeta. Mi wan nomo mi ronwe, nao mi kam blong talemaot trabol ya long yu."

18 Mo taem hem i stap toktok yet, wan narafala man blong wok i kamtru, i talem se, "!Masta! Olgeta pikinini blong yu oli stap mekem lafet long haos blong fasbon pikinini boe blong yu, 19 nao wan bigfala win i kamaot long draeples, i kam kilimdaon haos ya we i flatemgud, mo i kilim olgeta man insaed oli ded. Mi wan nomo mi ronwe, nao mi kam blong talemaot trabol ya long yu."

20 Nao Job i stanap, i terem* klos blong hem, mo i katemaot hea blong hem from we i harem nogud tumas. Nao i sakem hem i go long graon we fes blong hem i godaon, nao i presem Hae God, 21 i talem se, "Hae God. Taem mi mi bon, mi no karem wan samting i kam, mo sipos mi ded, bambae mi no save karem wan samting i go. Yu nomo yu givim ol samting ya long mi, mo naoia yu tekemaot olgeta bakegen. Mi mi presem nem blong yu."

22 Nating we ol trabol ya i kasem Job olsem, be hem i no mekem sin nating, mo i no tok nogud long God from ol samting ya.