1 "Job, yu traem singaot wan man, blong i kam givhan long yu.

?Yu ting se i gat man

we bambae i save ansa long yu?

?Yu ting se i gat enjel i stap

we bambae yu save luk long hem

blong i givhan long yu?

2 Man we i harem nogud

long trabol we i kasem hem,

hem i save kros long trabol ya

gogo i ded from.

Be hemia i fasin blong man

we i no gat hed,

we i no save tingting gud.

3 Mi mi luk finis man we i no gat hed

we i ting se i stap gud nomo,

be kwiktaem nomo,

trabol i kam long haos blong hem,

i spolem hem.* kwiktaem nomo, mi mi singaot trabol i kam long haos blong hem.

4 Nao ol pikinini blong hem

oli no moa stap gud.

I no gat man i save stanap long kot

blong givhan long olgeta.

5 Mo ol man we oli no gat kakae

oli stap kam karemaot ol kakae

long garen blong hem.

Nating we hem i no bin lukaot gud

long garen blong hem,

mo bus i kam kavremap,

be oli tekemaot evriwan.

Mo olgeta we oli tosta

oli jalus long hem,

oli wantem tumas blong karem

ol gudgudfala samting blong hem.

6 Rabis fasin i no save gru long garen,

mo trabol i no save kamaot long graon,

nogat.

7 Evri taem nomo,

man i stap pulum trabol i kam long hem

olsem we faea i laet i stap go antap.

8 "Sipos mi,

bambae mi mas lukluk i go long God,

mi mas putum trabol blong mi

i stap long han blong hem.

9 Yumi no save luksave ol bigbigfala wok

we hem i stap mekem.

Ol merikel blong hem,

man i no save kaontem.

10 Hem i stap sanem ren i kam long graon,

mo i stap mekem ol garen oli gru gud.

11 Hem nao i stap leftemap ol man

we tingting blong olgeta i stap daon,

mo ol man we oli harem nogud,

oli stap krae,

hem nao i stap mekem olgeta

oli harem gud bakegen.

12 ✝Hem i stap spolem ol plan

blong ol man blong wokem trik,

i stap mekem

we olgeta oli no save win,

13 mo i stap faenemaot ol trik

blong ol waesman,

mo i stap mekem we ol trik ya oli no wok.

14 Nao nating we long medel dei,

be tudak i kavremap olgeta,

mo oli stap lukaot ol samting,

olsem we i medel naet.

15 Be God i stap sevem ol puaman,

blong oli no ded,

mo i stap sevem ol man

we oli trabol,

i stap tekemaot olgeta

long hadlaef.

16 Tingting blong ol puaman,

hem i stap mekem i kam strong,

be ol man nogud,

hem i stap satemgud olgeta.

17 ✝"Olgeta we God i stap stretem

laef blong olgeta,

bambae oli harem gud.

Job.

Sipos hem i tok long yu

from rong blong yu,

be yu no mas kros from.

18 ✝Hem i stap putum meresin

long ol soa we hem i mekem.

Han blong hem

i stap mekem man i karekil,

be han blong hem

i stap mekem man i gud bakegen tu.

19 Oltaem hem bambae i tekemaot yu

long trabol, i sevem yu.

20 Sipos hadtaem i kam

we i no gat kakae nating,

hem bambae i holem yu yu stap laef,

mo sipos faet i kam,

hem bambae i blokemgud yu

blong yu no ded.

21 Sipos man i stap sakem ol giaman toktok

we i save spolem yu,

God bambae i tekemaot yu

long trabol ya.

Sipos bigfala trabol

i kasem ples blong yu,

hem bambae i sevem yu.

22 Long taem blong bigfala trabol,

bambae yu yu harem gud nomo,

mo long taem we i no gat kakae,

bambae yu yu laf.

Mo bambae yu no save fraet

long ol wael anamol.

23 Ples we bambae yu mekem garen long hem

bambae i no gat ston nating long hem,

mo neva ol wael anamol

bambae oli save kam kilim yu.

24 Bambae yu yu save stap long pis

long haos tapolen blong yu,

mo bambae yu save luk

we ol sipsip blong yu oli stap gud nomo.

25 Ol pikinini blong yu,

wetem olgeta

we bambae oli kamaot biaen long yu

bambae oli plante we plante,

olsem ol lif blong gras long open ples.

26 Bambae yu save stap

gogo yu olfala we yu olfala gud,

olsem kakae blong wit* we i raep

we i save stap gud

gogo kasem long taem blong tekemaot.

27 Job,

mifala i stap stadi longtaem

blong faenemaot ol samting ya.

Tok ya blong mi i tru tumas,

mo yu yu mas folem,

blong i givhan long yu."