1 Nao Elihu i gohed, i talem se,

2 "Yu mas mekem tingting blong yu i longfala,

yu mas lesin lelebet bakegen

blong harem ol tok blong mi

we bambae mi talem long saed blong God.

3 God i mekem mi,

mo mi save plante samting moa,

we bambae mi save talemaot

blong soemaot we fasin blong hem i stret.

4 Ol tok ya we bambae mi talem long yu

i tru nomo, mi mi no save giaman.

Mi ya we mi stap long fes blong yu,

mi mi wan waesman tru.

5 "God i hae we i hae,

be hem i no save lukluk rabis long man,

se i wan samting nating nomo.

Hem i strong we i strong,

mo i save olgeta samting.

6 Hem i no save letem man nogud i stap

gogo i kam olfala,

be oltaem i stap mekem i stret

long ol puaman.

7 Oltaem hem i stap lukaot long ol man

we laef blong olgeta i stret,

i stap letem olgeta oli kam king,

mo i stap mekem

we ol man oli stap ona long olgeta oltaem

gogo i no save finis.

8 Be i gat ol man i stap

we trabol i kasem olgeta,

mo i stap holemtaet olgeta

olsem we jen i fasemgud

han mo leg blong olgeta,

mo i mekem olgeta oli harem nogud tumas.

9 Ol man olsem,

God i stap soemaot long olgeta

we oli bin mekem sin.

Hem i stap mekem olgeta oli save

we oli mekem sin ya

we oli praod tumas.

10 Hem i stap mekem olgeta

oli lesin long tok blong hem

we i blong wekemap olgeta.

Hem i stap talem long olgeta

se oli mas tanem tingting blong olgeta

from ol rabis fasin blong olgeta.

11 Sipos oli obei long hem

mo oli stap wok blong hem,

bambae oli stap win gud

long laef blong olgeta,

mo bambae oli stap long pis

gogo oli olfala.

12 Be sipos oli no harem tok blong hem,

bambae oli ded long faet,

we oli no gat save yet.* we oli no gat save yet, mo bambae oli go long Hom blong ol Dedman.

13 "Olgeta we oli no bilif long God,

oli gohed, oli stap kros oltaem

from laef blong olgeta.

Nating we oli stap kasem panis,

be oli no save prea long hem

blong hem i givhan long olgeta.

14 Oli stap ded taem oli yangfala yet.

Oli stap lus

from we oli stap mekem fasin nogud

wetem ol pris blong ol narafala god,

we i fasin blong sem nomo.

15 Be God i stap letem

trabol i kam kasem ol man,

mo hem i mekem olgeta oli harem nogud.

Hem i stap yusum ol trabol ya

blong tijim olgeta,

mo blong openem ae blong olgeta.

16 "Fastaem,

hem i tekemaot yu long trabol,

mo i mekem yu yu glad,

from we yu yu sef,

mo oltaem nomo, kakae i fulap

long tebol blong yu.

17 Be naoia yu stap kasem panis

we i stret nomo blong yu yu kasem.

18 Yu mas lukaot gud blong yu no foldaon

long fasin ya we man i pem yu

blong yu mekem samting

we yu save se i nogud.

Maet yu wantem kasem plante mane,

be yu no mas letem mane

i pulum yu yu gowe long God

long rod we i no stret.

19 I nogud yu stap krae

blong man i givhan long yu.

Naoia paoa blong yu i no naf

blong tekemaot yu long trabol ya.

20 I nogud yu stap wantem tumas

blong tudak i kam.

Long tudak ya,

olgeta man bambae oli lus.

21 Yu mas lukaot gud

blong yu no folem ol rabis fasin.

God i stap mekem yu yu harem nogud

blong yu no moa folem ol fasin ya.

22 "!Yu luk!

God i hae we i hae, mo hem i gat paoa.

Hem i wan nambawan tija,

i winim olgeta narafala tija.

23 I no gat man

i save talem samting long hem

blong hem i mekem,

no i save tok long hem, i talem se,

‘!Yu yu mekem i no stret!’

24 Oltaem ol man oli stap sing

blong presem hem

from ol wok blong hem,

mo yu tu yu mas presem hem.

25 Yumi evriwan i stap luk

ol wok blong hem,

be i no klia,

i olsem we yumi stap luk wan samting

we i stap longwe.

26 Neva bambae yumi save makem

paoa blong hem,

mo yumi no save kaontem ol yia blong hem.

27 "Hem i stap tekem wota long graon,

i tanem i kam ren.

28 Mo hem i stap letem ren ya

i kamaot long klaod, i folfoldaon,

blong olgeta man bambae oli gat wota.

29 I no gat man i save

olsem wanem ol klaod oli stap muv,

no olsem wanem tanda i stap faerap

olbaot long skae ya we God i stap long hem.

30 !Yufala i luk!

Oltaem God i stap mekem laetning i laet

olbaot long skae,

be insaed long dipsi,

tudak nomo i stap.

31 Long fasin ya nao,

hem i stap rulum olgeta man long wol,

mo i stap givim kakae long olgeta

we i plante we plante.

32 Hem i stap holem laetning

olsem spia long han blong hem,

mo i talem long hem blong i laet

i go kasem mak blong hem.

33 Tanda i stap talemaot

we big ren i stap kam,

mo ol buluk tu oli save

we badtaem i klosap.