1 Nao Job i talem se,

2 "Hae God.

Mi save we yu yu gat olgeta paoa,

mo yu save mekem olgeta samting

we yu wantem.

3 ✝Fastaem yu yu tok long mi

se mi mi no gat hed nating.

Mo yu talem se mi no naf

blong talem se yu yu no waes.

Be sore,

mi mi stap tokbaot ol samting

we mi no save.

Mi stap talem ol bigbigfala samting,

we i bitim save blong mi.

4 ✝Yu talem long mi blong mi lesin

taem yu yu tok,

mo blong mi traem givim ansa

long ol kwestin blong yu.

5 Fastaem, ol narafala man nomo

oli stap tokbaot yu long mi,

be naoia, mi mi luk yu

stret long ae blong mi.

6 From samting ya,

mi mi sem tumas long ol samting ya

we mi stap talem,

mi harem nogud tumas from.

Naoia mi tanem tingting blong mi,

mi lego ol fasin ya finis,

mo mi stap sidaon long asis blong graon,

mo long asis faea."

7 Nao taem Hae God i talem ol tok ya long Job finis, hem i tok long Elifas, i talem se, "Mi mi kros long yu mo long tufala fren ya blong yu, from we taem yufala i tokbaot mi, tok blong yufala i no tru nating, i no olsem tok blong Job. Hem i man blong wok blong mi, mo tok blong hem i tru. 8 From samting ya, naoia yufala i mas tekem seven bul wetem seven man sipsip, yufala i mas go luk hem. Bambae yufala i kilim ol anamol ya blong mekem sakrefaes ya we i blong bonem i bon evriwan. Nao hem bambae i prea from yufala, mo mi bambae mi harem prea blong hem. I stret nomo blong mi mekem yufala i sem bigwan, be bambae mi no mekem olsem. Taem yufala i tokbaot mi, tok blong yufala i no tru nating, i no olsem tok ya blong Job we i tru."

9 Nao Elifas, mo Bildad mo Jofara, trifala i mekem olsem we Hae God i talem, mo hem i harem prea blong Job.

10 ✝Nao taem Job i prea finis from trifala ya, Hae God i mekem hem i kam rijman bakegen, we i givim jenis long hem long olgeta samting we hem i gat fastaem, be i dabolem evriwan. 11 Nao ol brata blong Job wetem ol sista blong hem, mo ol fren blong hem blong bifo, oli kam luk hem, mo oli mekem lafet long haos blong hem. Olgeta oli talemaot we oli harem nogud wetem hem, mo oli leftemap tingting blong hem from ol trabol ya we Hae God i bin putum long hem. Mo olgeta wanwan oli givim mane mo gol ring long hem.

12 Nao long las haf blong laef blong Job, Hae God i stap blesem hem moa i winim we i stap blesem hem fastaem. Job i gat fotin taosen sipsip, mo sikis taosen kamel, mo tu taosen buluk, mo wan taosen dongki. 13 Mo hem i gat seven pikinini boe blong hem bakegen, wetem tri dota blong hem. 14 Hem i putum nem blong fasbon dota blong hem se Jemima, mo sekenbon, Kejia, mo lasbon, Kerenapuk. 15 Mo olbaot long wol ya, i no gat gel we i naes we i naes olsem trifala ya. Mo hem i makemaot ol haf blong olting blong hem blong givim i go long trifala, stret olsem we i makemaot blong givim long ol brata blong trifala.

16 Biaen long taem ya, Job i stap wan handred foti yia bakegen. Hem i stap gogo i luk ol smol bubu blong hem, wetem ol pikinini blong olgeta tu, 17 nao hem i ded we i olfala we i olfala.