1 Nao wan dei, olgeta long heven oli kam stanap long fes blong Hae God bakegen, mo Setan tu i kam wetem olgeta. 2 Nao Hae God i askem long hem se, "?Setan, yu kam wea?"

Mo hem i talem se, "Mi mi stap long wol. Mi stap go olbaot long evri haf blong hem."

3 Nao Hae God i askem long hem se, "?Olsem wanem long Job, man ya blong wok blong mi? ?Yu luk fasin blong hem? I no gat narafala man long wol ya we i olsem hem. Hem i wan gudfala man we tingting blong hem i stap strong long mi. Oltaem, hem i stap mekem wosip long mi, mo i stap lukaot gud blong i no mekem wan samting we i nogud. Yu yu pusum mi blong mi letem yu yu spolem hem be blong nating nomo. Tingting blong hem i stap strong long mi yet olsem fastaem."

4 Be Setan i talem se, "Hem i save lego olgeta samting we hem i gat blong i sevem laef blong hem. 5 Be sipos yu spolem bodi blong hem, bambae hem i tok nogud long yu, stret long fes blong yu."

6 Nao Hae God i talem long hem se, "Oraet, hem i stap long han blong yu. Be yu no mas kilim hem i ded."

7 Nao Setan i aot long fes blong hem, i gowe, mo i go mekem we ol soa i kam kavremapgud bodi blong Job, i stat long hed blong hem, i go kasem leg blong hem daon. 8 Nao Job i go sidaon long asis long ples blong bonem doti, mo i tekem wan pis graonpot, i stap skrasem ol soa blong hem. 9 Nao woman blong hem i tok long hem, i talem se, "!Ei! ?From wanem tingting blong yu i stap strong yet long God olsem? !I moa gud yu tok nogud long hem blong yu yu ded!* !I moa gud yu tok nogud long hem fastaem, nao yu ded!"

10 Be hem i talem se, "!Yu no tok krangke olsem! Taem God i stap givim ol gudgudfala samting long yumi, yumi glad blong tekem. Mo taem hem i givim trabol long yumi, i no stret blong yumi tok agens long hem from."

Nao nating we hem i stap harem nogud tumas long ol samting ya, be hem i no tok agens long God nating.

11 Nao i gat tri fren blong Job we trifala i harem nius ya we hem i harem nogud tumas, mo oli mekem plan blong kam leftemap tingting blong hem bakegen. Nao oli aot long ples blong olgeta, oli kam blong luk hem. Trifala ya, i gat Elifas we i blong taon ya Teman, mo Bildad we i man Suaha, mo Jofara we i man Nahama. 12 Nao taem oli stap longwe yet, oli luk Job be oli no luksave hem. Mo taem oli luksave hem, oli stat krae, we oli krae bigwan from we oli sore tumas long hem. Oli stap terem* klos blong olgeta, mo oli stap sakem asis i go antap, mo oli sakem i go long hed blong olgeta, blong soemaot we oli harem nogud. 13 Nao oli kam sidaon long graon wetem Job, oli stap seven dei mo seven naet wetem hem we oli no toktok nating, from we oli luk we hem i stap harem nogud tumas.