1 Nao Job i talem se,

2 "Trifala.

Plante trabol i kasem mi,

i mekem mi mi harem nogud tumas.

Sipos man i save skelem olgeta long skel,

3 bambae oli hevi moa

i winim hevi blong sanbij.

From samting ya,

i nogud yutrifala i sek long ol tok ya

we mi mi stap sakem.

4 God i gat olgeta paoa,

mo hem i stap sutum mi

long ol ara blong hem,

nao posen blong olgeta

i stap go olbaot long bodi blong mi.

Ol trabol ya we oli stap spolem mi

oli kamaot long God.

Hem i laenemap olgeta

blong oli mekem mi mi fraet.

5 "Taem dongki i stap kakae gras,

hem i save harem gud,

mo taem buluk i gat kakae blong hem,

hem i save stap kwaet.

6 ?Be hu i save kakae kakae

we i no gat tes blong hem,

mo we i no gat sol long hem?

Waet kakae blong eg

i no gat tes blong hem,

mo mi mi no wantem nating.

7 Mi mi no hanggri

blong kakae ol samting olsem.

Olgeta samting ya we mi stap kakae

oli mekem mi mi wantem traot nomo.

8 "?From wanem God i no save givim

samting ya we mi mi askem?

?From wanem hem i no save givim

ansa long prea blong mi?

9 Sipos hem i kilim mi mi ded,

hemia bambae i moa gud long mi.

10 Sipos mi savegud

se bambae hem i mekem olsem,

nating we mi mi harem nogud tumas,

be bambae mi glad

we mi stap jamjam from.

Mi mi save we God i tabu,

fasin blong hem i stret olgeta,

mo neva mi mi agensem

ol tok blong hem.

11 ?Be from wanem bambae mi stap laef?

Mi mi no moa strong.

?From wanem bambae mi stap?

Tingting blong mi i foldaon finis.

12 God i no mekem mi long ston.

Hem i no wokem bodi blong mi long bras.

13 Naoia mi mi no moa strong

blong sevem laef blong mi.

Mo i no moa gat wan samting i stap

we i save givhan long mi.

I no moa gat wan samting

we mi save putum

tingting blong mi i stap long hem.

14 "!Trifala!

Long taem blong trabol olsem,

nating we mi lego God no nogat,

be mi mi wantem luk ol man

we oli tru fren blong mi.

15 Be yufala ya i stap giaman nomo long mi.

Tok blong yufala i olsem wan krik,

we taem i no gat ren, i stap kam drae.

16 Taem sno* mo aes antap long hil

i ronaot,

krik olsem i fulap long wota,

i stap ron bigwan.

17 Be long taem blong bigsan,

wota ya i finis,

nao krik olsem i kam drae olgeta,

i no moa gat wota long hem.

18 Oltaem ol bisnes man

we oli stap wokbaot long kamel

oli lego rod blong go lukaot wota,

be oli lusum rod long draeples,

nao oli stap wokbaot gogo oli ded.

19 Ol bisnesman blong kantri ya Seba,

mo olgeta blong kantri ya Tema,

oli go lukaot wota,

20 be tingting blong olgeta i foldaon nomo

long saed blong ol krik olsem

we oli drae olgeta.

21 Fasin blong tok blong yufala

i olsem krik ya nomo,

i no givhan long mi nating.

Yufala i luk bigfala trabol ya

we i kasem mi,

nao yufala i fraet.

22 Be neva mi mi talem long yufala

blong yufala i givim presen long mi,

no blong yufala i yusum

mane blong yufala,

blong pem wan man nogud

blong i haedem ol rong blong mi.

23 Neva mi mi talem long yufala

blong yufala i kam pemaot mi

long han blong ol enemi blong mi,

no long han blong wan king

we fasin blong hem i strong tumas.

24 "Oraet, yufala i traem tijim mi.

Yufala i traem talemaot ol rong blong mi,

blong mi mi harem.

Bambae mi stap kwaet,

mi lesin long yufala.

25 Tok we i klia,

i no save haedem problem,

hem i save mekem man i bilif,

be tok ya blong yufala

hem i krangke nomo.

26 Yufala i ting

se tok blong mi i olsem win nomo.

?Be sipos i olsem,

from wanem yufala i stap givim ansa

long ol tok ya we mi stap sakem

from we tingting blong mi i foldaon?

27 Fasin blong yufala,

yufala i save plei daes

from ol pikinini we oli no gat papa,

blong oli kam slef* blong yufala.

Mo yufala i save salem

ol besfren blong yufala

blong yufala i kam rij moa.

28 !Yufala i lukluk i kam long fes blong mi!

Mi mi no save giaman.

29 Tingting blong yufala

i go longwe tumas ya.

!I naf! !Fasin ya i no stret!

I nogud yufala i stap talem

se mi mi rong.

!Mi mi stret nomo!

30 !Be yufala i ting se mi mi giaman!

!Yufala i ting se mi mi no save

makem fasin we i stret

mo fasin we i no stret!