1 "Job.

Yu mas lesin gud long olgeta tok

we bambae mi mi talem.

2 Naoia mi rere

blong talemaot tingting blong mi.

3 Mo ol tok we mi wantem talem i tru,

bambae mi no save giaman.

4 God i gat olgeta paoa.

Spirit blong hem i mekem mi,

mo i stap givim laef long mi.* i mekem mi long paoa blong hem, mo hem i stap givim laef long mi.

5 "Sipos yu save givim ansa long mi,

i gud yu mekemrere ol tok blong yu.

6 Yu luk.

Long fes blong God,

yumitufala i sem mak nomo.

Mi tu,

God i mekem mi long red graon,

stret olsem we i mekem yu.

7 I no gat wan samting

blong mekem yu yu fraet long mi.

Mi mi no save mekem i strong long yu

blong winim yu.

8 "Job, mi harem we yu stap talem

9 se yu no mekem wan samting nogud,

mo yu no rong.

Yu stap talem se yu no mekem sin,

yu stret nomo,

10 be God i stap pikimap ol poen

blong i agens long yu blong nating nomo.

Mo yu talem se hem i stap mekem long yu,

olsem we yu yu wan enemi blong hem,

11 ✝we hem i fasem leg blong yu long jen,

mo i stap wajem yu oltaem nomo

long weples yu yu pas long hem.

12 "Be mi mi wantem talem long yu

se yu yu rong.

God i hae moa, i winim man.

13 ?From wanem yu talem

se hem i no save ansa

long tok blong man we i harem nogud?

14 Oltaem hem i stap tok

long plante fasin,

be man i no luksave.

15 ✝Long naet, taem man i slip,

God i stap tok long hem

long drim mo long vison.*

16 Hem i stap mekem ol man

oli lesin long ol samting

we hem i stap talem,

nao oli fraet long ol tok

we hem i talem

blong givim woning long olgeta.

17 Hem i stap tok

blong mekem olgeta oli no moa mekem sin,

mo blong blokem olgeta oli no kam praod.

18 Oltaem hem i stap sevem

laef blong olgeta,

i stap blokemgud olgeta

blong oli no ded long faet.

19 Hem i stap sanem sik i kam long man,

mo i stap mekem bodi blong hem

i soa tumas,

be hemia i blong stretem laef blong hem.

20 Plante taem, man we i sik olsem

i no moa save harem we i hanggri,

nating we nambawan kakae,

be hem i luk olsem we i rabis

nomo.

21 Bodi blong hem i kam bunbun olgeta,

we man i save luk ol bun blong hem,

22 mo klosap hem i go

long Hom* blong ol Dedman.

23 "Be God i gat

plante taosen enjel blong hem,

we oli stap mekem ol man

oli tingbaot ol wok blong olgeta.

Maet samtaem wan long ol enjel ya

24 i save sore long man olsem,

i save tok long saed blong hem long fes blong God,

i talem se, ‘God.

!Hemia nao praes blong pemaot man ya i go fri!

!Plis yu lego hem!

Yu no letem hem i godaon

long Hom blong ol Dedman.’

Mo sipos wan enjel i tok olsem,

25 bambae bodi blong man olsem

i save kam gud bakegen,

i save kam strong

olsem we i yangfala nomo.

26 Nao sipos man olsem i prea,

bambae God i save harem hem.

Mo sipos hem i mekem wosip long God,

bambae hem i glad we i glad,

from we God i stap stretem

laef blong hem bakegen.

27 Man olsem bambae i talemaot

long fes blong ol man se,

‘Mi mi no wan stret man,

mi stap mekem sin,

be God i gat sore long mi i sevem mi.

28 Klosap mi godaon long Hom blong ol Dedman,

be hem i blokem mi,

nao mi mi stap, mi laef yet.’

29 "Oltaem nomo

God i stap mekem ol samting ya.

30 Oltaem hem i stap sevem

laef blong man,

mo i stap mekem man i glad

from we i stap laef.

31 "Job,

plis yu lesin long ol samting ya

we mi mi stap talem.

Yu stap kwaet, yu letem mi mi tok.

32 Be sipos yu gat samting blong talem,

yu talem blong mi mi harem.

Sipos tok we yu stap talem i stret,

bambae mi mi glad nomo.

33 Be sipos yu no gat samting blong talem,

i gud yu stap kwaet,

yu lesin long mi.

Bambae mi tijim yu long rod

we i save mekem yu yu kam waes."