1 Nao Elifas i tok, i talem se,

2 "Job,

sipos mi mi tok,

ating bambae yu yu harem nogud,

be mi harem se mi mas tok.

3 Oltaem yu yu stap tijim plante man,

mo yu stap givhan long olgeta

we oli no strong,

blong mekem olgeta

oli kam strong bakegen.

4 Taem man i taed, i slak,

mo i foldaon,

ol tok blong yu i stap leftemap

tingting blong hem,

i stap mekem hem

i stanap strong bakegen.

5 Be naoia,

taem we trabol ya i kasem yu,

be tingting blong yu i no longfala nating.

Taem trabol ya i kasem yu,

be wantaem nomo, yu yu seksek.

6 Oltaem yu yu stap mekem wosip long God,

mo hem i no gat poen nating

agens long yu.

From samting ya,

i stret blong yu stap trastem hem,

mo blong tingting blong yu

i stap strong long hem.

7 Yu traem tingbaot.

?I gat wan stret man samtaem

we bigfala trabol olsem

i kasem hem?

8 Man we i mekem garen,

mo i planem kakae long hem,

oltaem hem i stap kakae frut blong hem.

Mo mi mi luk finis

we ol man we oli stap mekem sin,

mo oli stap wokem ol fasin nogud,

oltaem oli stap kakae frut blong hem.

9 Oltaem God i kros long olgeta,

i stap spolemgud olgeta,

olsem we hariken i kilim olgeta.

10 Olgeta oli olsem laeon,

we i stap singsingaot bigwan,

be God i mekem hem i kwaet,

mo i brebrekem ol tut blong hem.

11 Nao hem i no moa save kilim anamol

blong i kakae,

nao i no longtaem, hem i ded,

mo ol pikinini blong hem oli go wanwan.

12 "Wan taem, wan tok i kam kasem mi

we i no gat man i harem.

Mi mi harem,

be i no klia nating.

13 ✝Long naet,

hem i spolem slip blong mi,

olsem wan drim

we i mekem mi mi fraet tumas.

14 Mi fraet we mi fraet,

mo bodi blong mi i seksek gud from.

15 Nao mi harem wan smol win

i blu long fes blong mi,

i mekem mi mi fraet we mi fraet nogud,

mi harem we skin blong mi

i kam narafala olgeta.* long fes blong mi, i mekem mi mi fraet we mi fraet nogud, mi harem we skin blong mi i kam narafala olgeta.

16 Mi luk wan samting i stanap,

be mi no save se wanem samting.

Mi lukluk stret long hem,

be mi no luksave nating.

Ples i kwaet,

nao mi harem wan man i tok,

17 i talem se, ‘God i mekem man,

be long fes blong hem i no gat man

we fasin blong hem i stret gud,

mo laef blong hem i klin gud.* no gat man we fasin blong hem i stret moa winim hem, mo we laef blong hem i klin moa winim hem.

18 Ol enjel long heven

oli man blong wok blong God,

be hem i no trastem olgeta,

hem i gat poen long olgeta.

19 ?Yu ting se hem bambae i trastem man

we i mekem long graon nomo?

?Yu ting se hem i save trastem man

we i kamaot long asis nomo?

!Nogat!

Man i save ded kwiktaem nomo

olsem nambembe.

20 Man i save stap long moning,

be hem i save ded i no kasem sapa yet,

we i no gat man i save.

21 Olgeta samting we man i gat,

God i save tekemaot olgeta,

nao plante taem, man i ded

we i no kasem waes yet.’ "