1 "God.

Mifala man we i bon long wol ya,

mifala i no strong.

Laef blong mifala i sotfala nomo,

mo i fulap long trabol.

2 Mifala i stap kam bigfala kwiktaem nomo,

olsem we flaoa i gru,

be mifala i stap ded kwiktaem tu,

olsem flaoa.

Laef blong mifala i olsem sado,

we i stap lus kwiktaem nomo.

3 ?Olsem wanem?

?Yu yu glad blong lukluk i kam

long man olsem mi?

?Bambae yu save mekem kot

blong jajem mi?

4 Fasin blong mifala i no stret.

Neva i gat wan samting we i klin gud

i kamaot long samting we i doti tumas,

olsem laef blong mifala.

5 Ol yia blong laef blong mifala,

yu yu makemaot olgeta bifo finis.

Yu yu makemrere taem blong mifala,

mo mifala i no save jenisim.

6 Plis yu tanem fes blong yu

i gowe long mifala,

yu livim mifala i stap.

Laef long wol ya i had,

mo sipos mifala i save glad long hem,

plis yu letem mifala i stap glad olsem.

7 "Tri we man i katemdaon,

samtaem stamba blong hem i no ded olgeta,

i stap laef,

mo i save gru bakegen.

8 Nating we rus blong hem i kam olfala,

mo stamba blong hem long graon i kam drae,

9 be smol wota bambae i mekem hem

i gru bakegen olsem wan yang tri.

10 Be mifala, bambae mifala i ded,

mo hemia bambae i en blong mifala.

Taem mifala i lego rop,

mifala i go lus olgeta.

11,12 "Sipos mifala i ded,

bambae mifala i no save girap bakegen,

i olsem reva we i drae finis,

i no moa ron,

no lugun we i drae,

we i no moa gat wota long hem.

Sipos mifala i slip olsem,

bambae mifala i no save wekap bakegen,

gogo skae i lus.

13 "God.

Mi mi wantem tumas blong yu haedem mi

long Hom* blong ol Dedman,

blong mi save stap long ples ya

gogo kros blong yu i finis,

nao biaen,

bambae yu save putum taem

blong tingbaot mi bakegen.

14 Sipos mifala i ded,

bambae mifala i no save laef bakegen,

be mi mi wantem wet fastaem,

go kasem taem we i moa gud.

Bambae mi mas wet

gogo kasem we trabol ya blong mi

i finis.

15 Nao long taem ya,

sipos yu yu singaot mi mi kam,

mi bambae mi harem yu.

Yu nao yu mekem mi,

mo long taem ya,

bambae yu save glad long mi.

16 Oltaem bambae yu stap lukaot gud long mi

long weples mi mi pas long hem,

be bambae yu no moa save makem

ol sin blong mi bakegen,

17 yu save fogivim mi,

mo yu save tekemaot ol sin blong mi.

18 "Oltaem ol bigbigfala hil

oli stap folfoldaon,

mo ol bigbigfala ston

oli stap kamkamaot long ples blong olgeta.

19 Oltaem wota i stap digimaot

ol bigbigfala ston,

mo bigfala ren i stap wasemaot

ol graon long hil,

mo long sem fasin,

oltaem yu yu stap tekemaot olgeta samting

we mifala i stap putum tingting blong mifala i stap strong long hem.

20 Yu stap mekem i strong tumas long mifala,

gogo yu winim mifala,

nao yu sanem mifala i gowe

long laef ya

we bambae mifala i no save kambak

long hem bakegen samtaem.

Yu mekem we fes blong mifala i kam narafala,

nao yu kilim mifala i ded.

21 Sipos ol pikinini blong mifala oli tekem hae nem

bambae mifala i no save,

no sipos oli lusum hae nem blong olgeta,

be bambae mifala i no save tu.

22 Oltaem mifala i stap harem nomo

we bodi blong mifala i stap soa,

mo mifala i stap harem nogud

long tingting blong mifala."