1 ✝"Bigfala anamol ya Leviatan,* yu yu no save kasem hem long huk,

mo yu no save fasemtaet

tang blong hem long rop.

2 Yu yu no naf nating blong putum rop

i gotru long nus blong hem,

no blong mekem huk

i gotru long maot blong hem.

3 ?Yu ting se hem i save askemgud long yu

blong yu letem hem i go fri?

?Yu ting se hem i save krae long yu

blong yu yu sore long hem?

!Hem i no save tinghevi long yu nating!

4 Hem i no save agri blong i kam wok blong yu,

mo i no save mekem promes wetem yu

se bambae i slef* blong yu gogo i ded.

5 ?Yu ting se yu save mekem hem

i kam kwaet,

olsem pijin we yu holem long bus?

Yu no save fasem hem long rop

blong ol gel blong yu

oli pleplei long hem.

6 ?Yu ting se ol man blong salem fis

oli save tok from praes blong hem?

Ol bisnesman oli no save katkatem

long ol smosmol pis blong salem.

7 ?Yu ting se yu save planem spia

long skin blong hem?

Yu no save sperem long hed blong hem

blong kilim hem i ded.

8 Sipos yu traem wan taem nomo

blong tajem hem,

be neva bambae yu wantem tajem hem bakegen.

Bambae hem i faet long yu,

we neva bambae yu save fogetem.

9 "Taem ol man oli luk bigfala anamol ya,

oli fraet, we oli seksek tumas from,

nao oli stap folfoldaon long graon.

10 Taem anamol ya i girap,

man we i luk, i fraet tumas.

I no gat man i save stanap

long fes blong hem.

11 I no gat man

we i save go faet long hem

we bambae i save sef.

I no gat man long wol ya,

we i save go faet long hem.* 11 I no gat man we i save kam faet long mi we bambae i save sef. I no gat man long wol ya, we i save kam faet long mi.

12 "Bambae mi traem tokbaot

leg blong hem long yu.

Bambae mi traem stori

long bodi blong hem

we i bigwan olsem wanem

mo i strong olsem wanem.

13 Skin blong hem

i olsem strong klos blong faet,

mo i no gat man i save planem spia

i gotru long hem.

14 I no gat man

i save openem maot blong hem.

Ol tut blong hem i stap mekem

man i fraet tumas.

15 Skin blong baksaed blong hem,

mi wokem long ol sil blong blokem ara.

Olgeta oli strong olsem ston,

mo oli laenap, oli joen gud wanples,

16 nao nating we win,

be bambae i no save gotru.

17 Mi fasemgud olgeta

we oli stap joen gud wanples,

blong i no gat wan samting

i save pulumaot olgeta.

18 Ae blong hem i saen we i saen,

i red olsem san

we i jes girap long moning,

mo taem hem i snis,

laet i stap kamkamaot

long nus blong hem.

19 Taem hem i openem maot blong hem,

faea we i laet i stap kamkamaot,

mo oltaem ol smosmol faea

oli stap sut i kam.

20 Smok i stap kamaot bigwan

long nus blong hem,

olsem smok blong gras we man i bonem

we i no drae gud.

21 Win blong hem i stap mekem faea i laet,

mo faea we i laet, i stap kamaot

long maot blong hem.

22 Nek blong hem

i strong we i strong,

nao taem ol man oli luk hem,

oli fraet we i fraet.

23 I no gat wan ples long bodi blong hem

we skin blong hem i sofsof,

olgeta skin blong hem i strong

olsem aean nomo.

24 Tingting blong hem i strong we i strong,

olsem ston blong granem wit.*

Hem i no save fraet nating,

mo i no gat wan samting nating

i save mekem hem i ronwe.

25 Taem hem i girap,

nating we ol larikenman blong faet,

be oli save fraet we i fraet,

we oli no gat paoa nating.

26 I no gat wan naef blong faet

i save mekem hem i karekil.

I no gat spia, no ara, no wanem

we i save mekem hem i harem nogud.

27 Hem i stap luk aean

i olsem waelken nomo,

mo long hem,

bras i olsem wud we i roten finis.

28 I no gat ara

we i save mekem hem i ronwe,

mo ol ston we man i stonem hem long hem,

hem i harem olsem gras nomo.

29 Hem i luk nalnal

i olsem waelken nomo,

mo taem ol man oli sperem hem long spia,

hem i stap laf nomo long olgeta.

30 Ol skal long bel blong hem

oli sap olsem pis botel.

Oli stap katem sofmad olsem plao

we buluk i pulum blong brekem graon.

31 Taem hem i swim strong,

hem i stap tantanem solwota

i mekem i waet we i waet,

mo i stap mekem wota i boel

olsem wota we i boel long sospen.

32 Mo taem hem i spid i go,

solwota biaen long hem

i stap soemaot trak blong hem

we i saen we i waet gud.

33 I no gat wan samting long wol ya

we i olsem hem.

Hem i wan samting we i no save fraet.

34 Ol anamol we oli flas tumas,

be hem i stap lukluk rabis nomo long olgeta.

Hem i king blong olgeta wael anamol."