1 "Be naoia, mi mi olfala, mo ol yangfala

oli stap mekem plei long mi.

Be ol papa blong olgeta ya

oli no naf blong mekem wan samting nating.

Bifo,

mi mi no save sanem olgeta

blong oli go givhan long ol dog blong mi,

blong gad long ol sipsip blong mi.

2 Long taem ya,

mi no kasem wan gudfala samting nating

long han blong olgeta.

Olgeta oli olfala finis,

mo oli slak tumas,

oli no naf

blong mekem wok blong mi.

3 Olgeta oli puaman nomo,

mo oltaem oli hanggri tumas.

Long naet,

oli stap kakae ol drae rus nomo

olbaot long bus.

4 Oli stap tekem gras blong draeples

blong oli kakae,

mo oli stap laetem rus blong tri ya brum*

blong oli wom long hem.

5 Ol man oli stap singaot long olgeta,

blong ronem olgeta,

olsem we oli stap singaot long man

blong stil,

blong ronemaot hem.

6 Olgeta ya oli no gat haos,

nao oli stap slip olbaot nomo

long ol hol blong ston,

mo long ol hol we oli digim

long saed blong klif.

7 Olbaot long bus,

oli stap singaot bigwan olsem anamol nomo,

mo oli stap hivap wanples blong haed

insaed long bus.

8 Ol olfala ya oli rabis man nomo

we oli no gat nem nating,

mo ol man oli ronemaot olgeta

oli gowe finis long ples ya.

9 "Be naoia,

ol pikinini blong olgeta oli kam,

oli stap laf long mi.

Oli stap luk mi

olsem wan samting blong pleplei nomo.

10 Oli no laekem mi nating,

oli stap lukluk nogud tumas long mi.

Oli ting se oli moa gud winim mi,

nao oli kam spet long fes blong mi.

11 God i mekem mi mi kam slak,

mi no moa strong,

mo taem olgeta oli luk, oli girap,

oli agens long mi, we oli no kea nating.

12 Oli hivap oli kam plante,

nao oli kam stret long mi,

blong mekem faet long mi.

Oli mekem mi mi fraet, mi ronwe,

nao oli stap mekemrere

blong kam flatem mi olgeta.

13 Oli blokem rod blong mi

blong mi no save ronwe,

nao oli traem spolem mi,

mo i no gat man blong blokem olgeta.

14 I olsem we mi mi stap long wan taon,

we i gat bigfala stonwol i goraon long hem,

be stonwol ya i gat bigfala hol long hem,

nao oli stap kam insaed isi nomo,

mo oli kam kavremap mi.

15 Mi mi fraet we mi fraet gud.

Hae nem blong mi i lus kwiktaem nomo

olsem we win i karem i go,

mo ol gudgudfala samting blong mi

oli lus olsem klaod.

16 "Naoia mi harem

se bambae i no longtaem mi mi ded,

mo i no gat wan samting

blong mekem mi mi harem gud bakegen.

17 Long naet,

ol bun blong mi oli stap soa tumas.

Oli stap soa oltaem nomo,

we i no save spel.

18 God i stap holem mi

long nek blong sot blong mi,

nao i stap tantanem sot ya

we i spolem we i spolemgud olgeta.

19 Mo hem i sakem mi mi godaon long sofmad,

nao mi kam olsem doti nomo."

20 Nao Job i prea, i talem se,

"God.

Mi mi stap krae i go long yu,

be yu yu no ansa long mi.

Taem mi mi prea long yu,

be yu yu no lesin long mi.

21 Oltaem yu stap mekem

i strong tumas long mi.

Long olgeta paoa blong yu,

yu stap ronem mi blong spolem mi.

22 Yu letem win i blu long mi,

i karemaot mi mi gowe.

Mo insaed long strong win ya,

yu stap sakem mi mi go olbaot.

23 Mi mi save we naoia,

yu stap tekemaot laef blong mi.

Bambae mi mi ded olsem ol narafala man.

24 ?From wanem yu kam faet long mi?

!Laef blong mi i kam nogud finis!

!Mi mi no save mekem wan samting!

!Mi stap askem nomo blong yu yu sore long mi!

25 Fastaem mi stap krae wetem olgeta

we trabol i kasem olgeta,

mo mi stap sore long ol man

we oli sot long sam samting.

26 Mi mi stap ting

se laef blong mi bambae i fulap glad,

be naoia, trabol i kam spolem mi.

Mi stap wet blong luk delaet,

be tudak i kam kavremap mi.

27 Mi mi trabol olgeta.

Oltaem mi stap harem nogud tumas

mo mi stap wari tumas.

Evri dei trabol i stap kam kasem mi,

we i stap mekem mi mi harem nogud moa.

28 Oltaem tingting blong mi i hevi,

olsem we mi stap long tudak nomo

we san i no saen long mi nating.

Mi go stanap long fes blong ol man,

mi stap askem nomo blong oli givhan long mi.

29 Be voes blong mi

i olsem voes blong man we i stap hem wan,

we tingting blong hem i kam nogud finis,

i kam olsem voes blong wael dog,

we i stap krae hem wan,

no bigfala pijin ya ostrij.*

30 Mi mi fiva, bodi blong mi i hot tumas,

nao skin blong mi i kam yala from.

31 Bifo, oltaem mi stap harem

ol miusik blong glad,

be naoia mi stap harem

ol man oli stap krae nomo."