1 Olgeta we oli no wantem folem toktok

blong ol man nogud,

mo we oli no wantem folem

fasin blong olgeta,

mo we oli no wantem joen wetem olgeta

we oli stap laf long God,

olgeta ya oli save harem gud.

2 Ol man olsem,

oli glad blong folem Loa* blong Hae God,

mo oltaem oli stap ridim,

mo oli stap tingting long hem

long dei mo long naet.

3 ✝Olgeta ya oli olsem ol tri

we oli gru long saed blong wota

we i stap ron.

Ol tri ya oli stap karem frut

long stret taem blong olgeta,

mo lif blong olgeta i no save drae.

Mo long sem fasin,

ol man ya tu oli stap win

long evri samting we oli stap mekem.

4 Be ol man nogud oli no olsemia nating,

oli olsem doti blong wit* nomo,

we win i stap karem i go.

5 God bambae i jajem olgeta,

se oli lus,

mo bambae i seraot olgeta

oli gowe long ol man blong hem.

6 Rod blong ol man nogud ya

i rod blong lus,

be ol stret man,

oltaem Hae God i stap lukaot gud long olgeta,

mo i stap lidim olgeta long rod blong olgeta.