1 Hae God.

Plis yu no fogetem King Deved

mo ol hadlaef we hem i kasem.

2 Hae God,

yu yu God blong Jekob,*

mo yu yu gat paoa.

Plis yu tingbaot promes ya blong hem

we hem i mekem long yu.

3-5 Hem i talem se,

"Hae God,

yu yu God blong Jekob

mo yu yu gat paoa.

Bambae mi no save gohom,

mi no save ledaon,

mo mi no save slip.

Bambae mi no save spel,

gogo kasem we mi faenem wan ples blong yu

we yu save stap long hem oltaem."

6 ✝Bifo, taem mifala i stap long Betlehem,

mifala i harem nius blong Bokis ya

we i Saen blong Promes* blong yu,

mo taem mifala i kam long Jearim,

mifala i faenem Bokis ya

long garen blong wan man,

nao mifala i karem.

7 Nao mifala i talem se,

"Yumi go long haos* tapolen blong Hae God.

Yumi mekem wosip long fes blong hem,

we hem i stap sidaon long ples ya,

i stap rul."

8 Hae God.

Ples ya nao i ples blong yu.

Plis yu kam stap olwe long ples ya,

wetem Bokis ya we i saen blong paoa blong yu.

9 Plis yu mekem

we oltaem ol pris* blong yu

oli stap holem ol stret fasin,

mo we ol man blong yu oli glad tumas,

oli stap singsingaot from.

10 Bifo, yu yu mekem wan promes long King Deved,

man blong wok blong yu.

From samting ya,

plis yu no tanem baksaed long king blong mifala,

we yu yu jusumaot hem,

yu putumap hem i kam king.

11 ✝Yu yu mekem wan tabu promes long hem,

mo yu no save brekem promes ya.

Yu yu talem se,

"Bambae mi mekem

wan pikinini blong yu i kam king,

mo bambae hem i rul biaen long yu.

12 Mo sipos hem wetem olgeta we oli stap kamaot biaen long yu

oli stap holem promes blong mi,

mo oli stap folem ol rul we mi mi mekem,

bambae oli kam king,

mo bambae oli stap rul biaen long yu

gogo i no save finis."

13 Olgeta.

Hae God i jusumaot Saeon* finis

blong mekem i kam hom blong hem.

14 Hem i talem se,

"Ples ya Saeon,

bambae mi mi stap olwe long hem.

Hem bambae i hom blong mi,

from we mi mi wantem ples ya tumas.

15 Olgeta samting we ples ya i sot long hem,

mi bambae mi givim long hem

we bambae i plante we plante.

Ol puaman blong ples ya,

bambae mi givim plante kakae long olgeta,

we bambae oli harem gud long hem.

16 Ol pris blong ples ya

bambae mi stap blesem olgeta oltaem,

long olgeta samting we oli mekem.

Mo ol man blong mi long ples ya

bambae oli glad tumas,

oli stap singsingaot bigwan from.

17 ✝Long ples ya Saeon,

bambae mi mi putumap wan long olgeta

we i kamaot biaen long King Deved,

mo hem bambae i wan hae king.

Long ples ya nao,

bambae mi mi stap lukaot gud long hem

blong bambae hem i stap rul oltaem.

18 Oltaem bambae mi stap mekem

ol enemi blong king ya oli sem,

be ol man blong hem

bambae mi mekem olgeta

oli stap long gudfala laef."