1 Hae God.

Mi mi gat plante enemi blong mi.

Olgeta oli plante tumas

we oli stap agens long mi.

2 Oli tokbaot mi, oli talem se,

"God bambae i no save givhan long hem."

3 Hae God.

Yu yu olsem wan sil.*

Oltaem yu stap blokemgud mi

blong trabol i no kasem mi.

Yu yu stap mekem mi mi win,

mo yu stap mekem tingting blong mi i strong bakegen.

4 Oltaem mi stap krae i kam long yu

blong yu givhan long mi.

Mo yu yu stap long tabu hil* blong yu,

nao yu stap ansa long mi.

5 Hae God.

Long naet mi mi ledaon, mi slip gud,

mo long moning mi wekap bakegen,

from we yu stap lukaot gud long mi.

6 I gat ten taosen enemi

we oli hivap raon long mi,

oli stap agens long mi,

be mi mi no save fraet long olgeta.

7 !Hae God, yu yu God blong mi!

!Plis yu kam, yu sevem mi!

Oltaem yu stap panisim ol enemi blong mi,

yu stap brekemdaon paoa blong olgeta.

8 Paoa blong sevem man i blong yu nomo.

Mi wantem blong yu blesem ol man blong yu.