OL SAM 54

Prea we man i mekem blong God i lukaot gud long hem

(Sing ya, Deved i wokem, biaen long taem ya we ol man Sif oli go talem long Sol we Deved i stap haed long ples blong olgeta. Sing ya i blong sing wetem stringban.)

(Tok i go long God.)

1 God,

plis yu sevem mi

long paoa blong yu.

Long strong han blong yu,

plis yu mekem mi mi fri.

2 Plis yu harem prea blong mi,

yu lesin long ol tok blong mi.

3 Ol praod man oli stap kam

blong faet long mi,

ol raf man oli stap traem

blong kilim mi.

Olgeta ya oli no kea nating long yu.

(Tok i go long ol man.)

4 Be oltaem God i stap givhan long mi.

Hem i Masta*54.4: Masta. Yu luk futnot K long 35.22. blong mi,

mo i stap blokemgud mi.

5 Prea blong mi

we ol rabis fasin

we ol enemi blong mi oli stap mekem long mi,

hem bambae i yusum olgeta

blong panisim olgeta bakegen.

Hem bambae i spolem olgeta,

from we tingting blong hem

i stap strong long mi.

(Tok i go long Hae God.)

6 Hae God,

mi bambae mi glad nomo

blong mekem sakrefaes long yu.

Bambae mi talem tangkiu long yu

from we yu yu gud tumas.

7 Yu yu tekemaot mi

long olgeta trabol blong mi,

mo mi luk we ol enemi blong mi oli lus.