1 ✝Wol ya wetem olgeta gudgudfala samting blong hem

oli blong Hae God.

Graon ya wetem olgeta samting we i stap long hem

oli blong hem nomo.

2 Hem i putum graon ya

long medel solwota,

i putum fandesen blong hem daon olgeta

aninit long dip solwota.

3 ?Hu man i gat raet blong go antap

long hil* blong Hae God?

?Hu man i save go insaed

long tabu ples ya blong hem?

4-6 ✝Man we tingting blong hem i klin

mo laef blong hem i stret,

we i no save mekem wosip long ol giaman god,

mo i no save mekem ol giaman promes,

hem nao i save lukaot Hae God,

we i God blong Jekob,*

hem nao i save kam stanap long fes blong hem.

Man olsem,

Hae God bambae i blesem hem

mo i sevem hem.

God bambae i talemaot

we hem i no man blong mekem samting nogud.

7 Ol doa.

!Yufala i mas open bigwan!

!Ol olfala doa, yufala i open gud!

Nao King ya we i hae we i hae

bambae i kam insaed.

8 ?King ya we i hae we i hae, hu ya?

!Hemia Hae God ya!

Hem i strong, mo i gat paoa,

mo oltaem hem i stap win long faet.

9 Ol doa.

!Yufala i mas open bigwan!

!Ol olfala doa, yufala i open gud!

Nao King ya we i hae we i hae

bambae i kam insaed.

10 ?King ya we i hae we i hae, hu ya?

!Hemia Hae God ya!

Hem i gat olgeta paoa,

mo hem nao i King ya we i hae we i hae.