OL SAM 123

Man i prea blong Hae God i sore long hem

(Sing ya i blong ol man oli singsing long hem taem oli stap wokbaot blong go antap long Jerusalem* blong mekem lafet)

(Tok i go long Hae God.)

1,2 Hae God.

Oltaem mi mi stap lukluk i kam long yu.

Mi stap lukluk i kam antap long heven,

long ples ya we yu yu stap rul long hem.

Yu yu God blong mifala,

mo olsem we boe blong wok

i stap luk long masta blong hem

blong i givhan long hem,

mo haosgel i stap luk

long misis blong hem,

nao long sem fasin,

bambae mifala i stap lukluk long yu,

gogo yu yu sore long mifala.

3 Hae God.

Plis yu sore long mifala,

plis yu sore long mifala.

Mifala i taedgud long ol man ya

we oltaem oli stap lukluk rabis long mifala.

4 Longtaem tumas,

ol rijman oli stap mekemplei long mifala,

oli stap laf nogud long mifala.