1 Oltaem mi mi putum tingting blong mi

i stap long God nomo,

nao mi save mekem tingting blong mi i longfala,

mi save wet longtaem

blong hem i sevem mi.

2 Hem nomo i stap blokemgud mi

blong trabol i no kasem mi,

mo hem i stap sevem mi.

Hem i strong ples blong haed blong mi,

mo neva bambae ol enemi blong mi

oli save winim mi.

3 Mi mi no strong,

mi olsem fenis we i roten finis,

i stap folfoldaon.

?Bambae yufala evriwan i stap kam faet long mi

gogo kasem wetaem?

4 ?Ating yufala i wantem nomo

blong mekem mi mi foldaon,

mi lusum hae nem blong mi?

Yufala i stap glad nomo

blong talem ol giaman toktok.

Yufala i stap talem ol tok

blong mekem man i harem gud,

be long tingting blong yufala,

yufala i stap singaot* trabol

i kam long hem.

5 Oltaem mi mi putum tingting blong mi

i stap long God nomo,

nao mi save mekem tingting blong mi i longfala,

mi save wet longtaem long hem,

blong kasem ol samting

we tingting blong mi i stap long hem.

6 Hem nomo i stap blokem mi

blong trabol i no kasem mi,

mo i stap sevem mi.

Hem i strong ples blong haed blong mi,

mo neva bambae ol enemi blong mi

oli save winim mi.

7 Mi mi stap luk long God nomo

blong hem i sevem mi,

mo blong hem i holem

hae nem blong mi i stap gud.

Hem nao i strong ples blong blokem mi,

hem i sefples blong mi.

8 Olgeta.

God i sefples blong yumi.

I gud yufala i trastem hem oltaem,

yufala i talemaot ol trabol blong yufala long hem.

9 Olgeta man oli olsem smol win nomo

we i blu wantaem,

nao i finis.

Ol haeman mo ol man olbaot nomo,

olgeta evriwan i sem mak,

oli olsem nating nomo.

Sipos yu putum olgeta long skel,

oli no hevi nating,

oli olsem win nomo.

10 Yufala i no trastem

ol strong fasin ya blong stil

blong yufala i kam rijman.

Yufala i no putum tingting blong

yufala long rod blong stil.

Mo sipos olting blong yufala i stap kam plante,

be yufala i no mas trastem ol samting ya.

11,12 ✝God.

Yu yu Masta* blong mifala.

I no wan taem nomo

we mi mi harem yu yu stap talem

se paoa i blong yu,

mo oltaem yu yu lavem man tumas.

Yu nomo yu stap givim pei long mifala,

stret long ol wok blong mifala.