1 God.

Mi mi stap long trabol ya.

Plis yu lesin long prea blong mi.

Mi mi fraet tumas long ol enemi blong mi.

Plis yu sevem laef blong mi.

2 Plis yu blokemgud mi

blong ol plan blong ol man nogud

oli no save kasem mi.

Yu no letem mi mi go long han

blong ol hip blong ol rabis man ya.

3 Olgeta oli stap mekemrere ol tok blong olgeta

we i olsem naef blong faet

we i sap we i sap,

mo oli stap makem ol man

blong sutum olgeta

long ol rabis tok ya blong olgeta.

4 Olgeta oli stap haed,

nao wantaem nomo,

oli sutum ol gudfala man

long ol giaman toktok blong olgeta,

we oli no fraet nating.

5 Oli stap givgivhan long olgeta

long ol rabis plan blong olgeta.

Oli stap tingbaotgud ol ples

we bambae oli putum ol trap blong olgeta long hem,

mo oli talem se,

"!Bambae i no gat man i save luk ol trap ya!"

6 Oli stap mekem ol plan

blong mekem ol samting nogud,

mo oli talem se,

"Plan ya blong yumi i nambawan.

Bambae i no gat man i save

faenemaot tingting blong yumi."

7 Be bambae God i sutum olgeta

long ara blong hem,

mo wantaem nomo bambae oli karekil.

8 Ol rabis tok ya blong olgeta

bambae i kakae olgeta bakegen.

Mo ol man we bambae oli luk olgeta,

bambae oli saksakem hed blong olgeta from.

9 Nao olgeta man evriwan bambae oli fraet,

bambae oli stap tingbaot samting ya

we God i mekem,

mo bambae oli stap tokbaot

ol wok blong hem.

10 Ol man we oli stret

bambae oli glad from ol samting ya

we Hae God i mekem,

nao bambae oli faenem sefples long hem.

Olgeta stret man ya evriwan

bambae oli presem hem.