1 ✝?God blong mi,

God blong mi,

from wanem yu livim mi mi stap olsem?

Mi krae we mi krae

blong yu givhan long mi,

be yu no mekem.

2 Long dei mi stap krae i kam long yu,

be yu no ansa,

mo long naet mi gohed blong krae,

be mi stap harem nogud yet.

3 Be God yu yu tabu we yu tabu,

yu stap sidaon long bigfala jea blong yu,

mo mifala ol laen* blong Isrel,*

mifala i stap presem yu.

4 Ol bubu blong mifala bifo

oli putum tingting blong olgeta i stap long yu,

oli trastem yu,

nao yu yu tekemaot olgeta long trabol.

5 Oli krae i kam long yu,

nao yu yu sevem olgeta,

oli trastem yu,

nao tingting blong olgeta i no foldaon.

6 Be naoia mi mi no moa olsem man,

mi olsem maget nomo

we ol man oli stap lukluk nogud long mi,

oli no laekem mi.

7 ✝Olgeta man we oli luk mi

oli stap tok nogud long mi,

oli stap laf long mi,

oli stap spet long mi

oli stap saksakem hed blong olgeta,

8 ✝oli talem se, "?Hem i trastem Hae God,

be from wanem Hae God i no sevem hem?

?Sipos Hae God i laekem hem,

be from wanem hem i no givhan long hem?"

9,10 Be i stat long dei ya we mi mi bon,

mi mi trastem yu,

mo i kam kasem tede,

oltaem yu yu God blong mi.

Long taem we mama blong mi

i bonem mi,

yu yu lukaot gud long mi, mi sef,

mo long taem we mi mi smol pikinini nomo,

yu yu holem mi mi stap laef

long titi blong mama blong mi.

11 Plis yu no stap longwe long mi.

Naoia trabol i stap klosap,

mo i no gat man blong givhan long mi.

12 Plante enemi oli kamraon long mi

olsem ol bul.

Oli olsem ol strong bul ya long Basan,

nao oli stap hivap raonabaot long mi.

13 Oli openem maot blong olgeta

olsem laeon we i wantem kakae man.

Oli stap singaot bigwan

olsem laeon we i hanggri tumas.

14 Paoa blong mi i lus,

olsem wota we i kafsaed

i go long sanbij.

Ol bun blong mi oli kamaot long ol joen blong olgeta,

mo tingting blong mi i foldaon

we i foldaon olgeta.

15 Paoa blong mi i finis olgeta,

mo tang blong mi i pas strong

insaed long maot blong mi antap.

Yu yu livim mi finis blong mi ded,

mi go long beregraon.

16 Ol man nogud oli kam hivap,

oli stap raon long mi,

olsem hip blong ol dog,

we oli kam blong kakae mi.

Olgeta oli stikim leg blong mi

mo han blong mi.* leg blong mi mo han blong mi.

17 Man i save luk ol bun blong mi nomo,

nao ol enemi blong mi oli luk mi,

oli stap laf long mi.

18 ✝Oli tekemaot ol klos blong mi

oli seraot long olgeta,

mo oli sakem daes blong luk se

hu bambae i tekem kot blong mi.

19 Hae God.

Plis yu no stap longwe long mi,

yu kam kwik,

yu givhan long mi.

20 Yu blokem olgeta

we oli wantem kam faet long mi

blong kilim mi mi ded.

Yu sevem laef blong mi,

yu tekemaot mi long paoa blong olgeta ya

we oli olsem dog.

21 Yu sevem mi

blong ol laeon ya oli no kakae mi.

Mi mi no gat paoa nating

long fes blong ol wael bul ya.

22 ✝Nao mi bambae mi talemaot long ol man blong mi

ol samting ya we yu bin mekem.

Bambae mi mi presem yu

long fes blong olgeta.

23 Bambae mi talem se,

"Yufala ol laen blong Isrel,

yufala i man blong wok blong Hae God.

Yufala i mas presem hem,

yufala i mas ona long hem,

mo yufala i mas bodaon long hem.

24 Hem i no save fogetem ol puaman,

mo i no save livim olgeta

oli stap harem nogud.

Hem i no save tanem baksaed long olgeta.

Taem oli krae long hem

blong i givhan long olgeta,

hem i stap ansa long olgeta."

25 Nao bambae mi mi presem yu

long fes blong olgeta man blong yu.

Long fes blong olgeta ya

we oli stap mekem wosip long yu,

bambae mi mekem ol sakrefaes ya

we mi bin promes blong mekem.

26 Hae God,

ol puaman bambae oli kakae

olsem we oli wantem,

mo olgeta we oli stap lukaot yu

bambae oli presem yu.

Prea blong mi,

we olgeta ya bambae oli gat gudfala laef oltaem.

27 Hae God.

Olgeta man blong evri kantri

bambae oli tingbaot yu bakegen.

Olgeta evriwan long evri ples long

wol bambae oli kambak long yu.

Olgeta man blong evri kala

bambae oli mekem wosip long yu,

28 from we yu yu King,

mo yu stap rulum olgeta man.

29 Olgeta praod man

bambae oli bodaon long yu.

Olgeta man blong wol ya oli save ded,

be bambae oli bodaon long fes blong yu.

30 Ol man we oli no bon yet

bambae oli wok blong yu.

Ol man bambae oli talemaot yu

long olgeta we bambae oli kam biaen.

31 Bambae oli talemaot ol stret fasin blong yu

long ol man we bambae oli bon biaen se,

"Hae God i sevem ol man blong hem."