1 Olgeta.

Bifo,

taem Hae God i tekem yumi i kambak long Jerusalem,

samting ya i olsem wan drim nomo.

2 Long taem ya,

yumi stap laf, yumi stap singsing,

from we yumi glad tumas.

Nao ol man blong ol narafala kantri oli talem se,

"Hae God i mekem ol bigbigfala wok

blong givhan long olgeta."

3 Mo i tru,

hem i mekem ol bigbigfala wok

blong givhan long yumi.

!Long taem ya,

yumi glad we yumi glad!

4 Hae God.

Plis yu mekem

laef blong mifala i gud bakegen,

olsem we ren i mekem

wota i kambak long krik we i drae.

5 I gat ol man blong mifala

we taem oli stap planem kakae long garen blong olgeta,

oli stap harem nogud,

oli stap krae.

Be taem oli tekemaot kakae long garen ya,

plis yu mekem olgeta oli glad.

6 Olgeta.

Ol man ya,

taem oli go planem kakae long garen,

oli stap harem nogud,

oli stap krae.

Be biaen,

taem oli go tekemaot kakae long garen ya oli karem i kam,

bambae oli singsing

from we oli glad we i glad long kakae ya.