1 Ol haeman.*!

?I tru se yufala i stap jajem man

long stret fasin?

?Yufala i stap jajem ol man

long rod we i stret?

2 !Nogat!

Yufala i stap tingbaot nomo

ol rabis fasin we yufala i save mekem,

mo yufala i stap mekem ol strong fasin nomo

blong spolem ol man long wol.

3 Ol man nogud oli stap gorong oltaem,

i stat long taem we oli stap

long bel blong mama blong olgeta.

Oli stap talem ol giaman tok,

i stat taem oli bon.

4 Oli olsem ol posen snek

we posen blong olgeta i strong tumas,

mo oli stap blokem sora blong olgeta

olsem posen snek ya

we sora blong hem i fas,

5 we i no save harem voes blong man blong pleplei long snek, mo i no save harem

singsing blong kleva.

6 God,

plis yu brekem ol tut blong ol laeon ya.

Hae God,

plis yu pulumaot ol tut blong olgeta.

7 Yu letem olgeta oli lus olsem wota

we i kafsaed i go long sanbij,

yu flatemdaon olgeta olsem gras long rod,

we ol man oli stap purumbut long hem

nao i drae.

8 Plis yu letem olgeta oli kam olsem snel

we wota blong hem i ronaot,

nao i ded.

Yu mekem olgeta oli kam olsem pikinini

we i ded taem i bon,

we i no save luk delaet.

9 God,

taem oli no gat save yet

plis yu katemdaon olgeta

olsem ol rabis gras nomo.

Taem oli laef yet,

plis yu kros,

yu blu long olgeta blong oli gowe.

10 Bambae ol stret man oli glad

taem oli luk

we yu yu panisim ol man nogud.

Bambae oli stap wokbaot nomo

long blad blong ol man nogud ya.

11 Nao ol man bambae oli talem se,

"Tru, God i stap.

Hem i stap givim pei long ol stret man.

Hem i stap jajem olgeta man long wol."