1 !God!

?From wanem yu lego mifala olsemia?

!Mifala i man blong yu nomo!

?Olsem wanem?

?Bambae yu stap kros long mifala oltaem nomo?

2 Plis yu tingbaot mifala.

Yu yu jusumaot mifala longtaem finis,

se mifala i man blong yu.

Bifo, mifala i stap wok slef* nomo,

be yu yu tekemaot mifala,

yu makemaot mifala long laen ya,

se mifala i man blong yu.

Plis yu tingbaot hil ya Saeon*

we yu stap long hem bifo.

3 Ol enemi blong mifala

oli spolemgud evri samting long haos* blong yu.

I gud yu kam,

yu wokbaot long ples ya, yu lukluk.

4 Ol enemi blong yu oli win finis,

oli stap long haos blong yu,

oli stap singsingaot bigwan.

Oli pulum ol flaeg blong olgeta

long ples ya finis,

blong soemaot we oli win.

5 Oli stap mekem olsem ol man

blong katemdaon tri,

we oli stap daonem ol tri

long akis blong olgeta.

6 Oli stap smasem ol plang blong haos blong yu

long ol akis mo ol bigbigfala hama blong olgeta.

7 Oli brekemdaon haos ya,

nao oli putum faea long hem.

Ples ya we ol man oli stap mekem wosip long yu long hem,

oli spolem,

oli mekem i no moa tabu.

8 Oli wantem flatemgud mifala,

nao oli bonem evri ples long kantri ya

we mifala i stap go long hem

blong mekem wosip long yu.

9 Olgeta saen blong soemaot paoa blong yu long mifala

i finis.

Naoia i no moa gat profet i stap,

mo i no moa gat man we i save talemaot

we trabol ya bambae i stap olsem

go kasem wetaem.

10 God.

?Bambae ol enemi blong mifala

oli stap laf long yu gogo kasem wetaem?

?Olsem wanem?

?Bambae oli stap tok nogud

long nem blong yu oltaem nomo?

11 ?From wanem

yu no wantem givhan long mifala?

?From wanem yu no mekem wan samting

blong halpem mifala?

12 God, yu yu King blong mifala.

I stat bifo olgeta,

yu yu sevem mifala plante taem finis.

13 ✝Long bigfala paoa blong yu,

yu mekem solwota i gowe,

mo yu smasem hed

blong ol bigbigfala anamol ya blong solwota.

14 ✝Yu smasem ol hed blong bigfala anamol ya Leviatan,*

mo yu givim bodi blong hem long ol anamol blong draeples

blong oli kakae.

15 Ol springwota mo ol reva,

yu mekem olgeta oli stap ron,

mo ol bigfala reva we neva oli drae samtaem,

yu mekem oli drae.

16 Yu yu mekem dei mo naet,

mo yu putum san mo mun

long ples blong tufala.

17 Yu makem ol ples

we wol i go finis long hem,

mo yu mekem kol taem mo hot taem.

18 Hae God,

yu mas tingbaot

we ol enemi blong yu

oli stap laf long yu.

Olgeta ya oli no bilif long yu,

mo oli stap tok nogud long nem blong yu.

19 Plis yu no letem

mifala i go long han blong ol enemi ya blong mifala

we fasin blong olgeta i strong tumas.

Yu no fogetem mifala

we ol man ya oli stap ronem mifala.

20 Plis yu tingbaot promes* ya

we yu mekem wetem mifala.

Naoia i gat fulap faet i stap

long olgeta ples we ol man oli stap long tudak.

21 Mifala i stap harem nogud

aninit long han blong ol enemi ya.

Plis yu no letem mifala i sem.

Mifala i puaman,

mifala i sot long plante samting.

Plis yu mekem rod blong mifala i presem yu.

22 God,

plis yu talemaot we yu yu stret.

Yu mas tingbaot

we ol man we oli no save yu

oltaem oli stap laf long yu,

i stat long moning,

gogo kasem long sapa.

23 Ol enemi ya blong yu we oli kros,

oli stap singsingaot.

Noes blong olgeta i stap gohed oltaem.

Plis yu no fogetem olgeta.

Yu kam, yu panisim olgeta.