1 God, hem i sefples blong yumi,

hem i paoa blong yumi.

Oltaem hem i rere blong givhan long yumi

long taem blong trabol.

2 Nao from samting ya,

nating sipos graon i seksek,

mo ol hil oli folfoldaon

i go long dipsi,

be yumi no save fraet.

3 I nomata sipos solwota i girap

we i raf we i raf,

mo ol hil oli stap seksek from,

be bambae yumi no save fraet nating.

4 God i hae we i hae,

mo i gat wan reva i stap ron

long taon blong hem,

we i stap mekem ol man long taon ya oli glad,

i stap mekem ol man long tabu haos* blong hem

oli glad tumas.

5 God i stap insaed long taon ya,

mo neva bambae ples ya i seksek

i foldaon.

Taem i stat brok delaet,

be hem i stap finis

blong givhan long taon ya.

6 Taem hem i tok,

voes blong hem i faerap olsem tanda,

nao wol ya i ronaot,

i kam olsem wota.

Mo ol man blong ol narafala kantri

oli fraet tumas,

mo ol kingdom oli folfoldaon.

7 Hae God i gat olgeta paoa,

mo hem i stap wetem yumi.

Hem i God blong Jekob,*

hem i sefples blong yumi.

8 Yufala i kam,

yufala i luk ol samting ya

we Hae God i mekem.

Yufala i luk

ol bigbigfala wok ya

we hem i mekem long wol.

9 Hem i stap mekem

ol faet i finis

long olgeta ples long wol.

Hem i stap brekem ol bonara,

i stap spolem ol spia,

mo i stap bonem ol sil* long faea.

10 Hem i talem se,

"!Yufala i no moa faet!

!Yufala i mas save we mi mi God!

Mi mi King blong ol man long ol narafala kantri.

Mi mi King blong olgeta man long wol."

11 Hae God i gat olgeta paoa,

mo hem i stap wetem yumi.

Hem i God blong Jekob,

hem i sefples blong yumi.