1 Olgeta.

Mi mi presem Hae God

we i stap lukaot long mi.

Hem i stap tijim mi

blong mekem mi mi rere blong faet.

2 Hem i stap blokemgud mi,

mo i stap lukaot gud long mi.

Hem i sefples blong mi

mo i Sevia blong mi.

Mi mi stap trastem hem nomo

blong i sevem mi.

Hem nao i stap mekem

ol man blong ol narafala kantri

oli stap aninit long paoa blong mi.

3 ✝Hae God.

Mi mi luk man

se hem i samting nating nomo.

I no stret

blong yu yu lukluk long hem.

I no stret nating

blong yu yu tingbaot hem.

4 Hem i olsem win

we i blu smoltaem nomo nao i finis.

Ol dei blong hem

i olsem wan sado we i pas finis.

5 Hae God.

Plis yu openem skae yu kamdaon,

yu tajem ol hil long han blong yu,

nao bambae smok i kamaot long olgeta.

6 Yu sanem laetning i kam,

i mekem ol enemi blong yu oli ron wanwan

yu sutum olgeta long ol ara blong yu,

blong mekem olgeta oli ronwe.

7 Plis yu pusum han blong yu i kam,

yu pulumaot mi long dip wota ya,

yu sevem mi.

Yu tekemaot mi

long paoa blong ol man ya blong narafala kantri,

8 we neva oli talem trutok.

Olgeta ya,

nating we oli stap talem nem blong yu

blong mekem tok blong olgeta i strong,

be oli stap giaman nomo.

9 God,

bambae mi singsing long yu

long wan niufala sing,

bambae mi kilim gita blong mi,

mi sing long yu.

10 Oltaem yu stap mekem ol king oli win long faet.

Mi mi man blong wok blong yu,

mo yu yu stap sevem mi.*

11 Ol enemi blong mi,

fasin blong olgeta i strong tumas.

Plis yu blokem olgeta oli no kam spolem mi

yu sevem mi.

Yu tekemaot mi long paoa

blong ol man ya blong narafala kantri,

we neva oli talem trutok.

Olgeta ya,

nating we oli stap talem nem blong yu

blong mekem tok blong olgeta i strong,

be oli stap giaman nomo.

12 Mifala i wantem

se ol yang boe blong mifala

bambae oli kam strong

olsem ol yang tri we oli stap gru gud,

mo ol dota blong mifala bambae oli naes

olsem ol pos blong kona blong haos blong king

we oli katem blong flasem haos ya.

13 Mifala i wantem

se ol garen blong mifala

oli karem plante kakae,

nao ol haos blong kakae blong mifala

bambae oli fulap gud,

mo ol sipsip long ol fenis blong mifala

bambae oli karem pikinini

we i plante we plante.

14 Mifala i wantem

se ol buluk blong mifala

bambae oli no save lusum ol pikinini blong olgeta

blong oli save kam plante we plante.

Mifala i wantem

se ol enemi blong mifala

bambae oli no moa stap klosap long mifala,

nao ol man blong mifala

bambae oli no moa save krae

olbaot long ples blong mifala,

bambae oli save harem gud.

15 Hae God i God blong yumi,

mo from samting ya,

yumi save harem gud.

Mo sipos hem i mekem

ol samting ya i kamtru long kantri ya blong yumi,

bambae yumi glad we yumi glad.