1 !Olgeta man!

!Yumi presem God!

!Yumi glad!

!Yumi singsing long hem!

2 !I gud yumi sing

blong leftemap nem blong hem!

!Yumi presem hem!

!Yumi leftemap nem blong hem!

3 Yumi talem long hem se,

"Ol samting ya we yu yu stap mekem,

oli gud tumas.

Paoa blong yu i bigfala tumas,

i mekem we ol enemi blong yu

oli fraet,

oli bodaon, oli ona long yu.

4 Olgeta man long wol

oli stap mekem wosip long yu,

oli stap singsing blong presem nem blong yu."

5 !Olgeta!

Yufala i kam,

yufala i harem ol samting ya

we God i bin mekem.

Yufala i traem tingbaot

ol bigbigfala wok ya we hem i mekem

long fes blong ol man bifo.

6 ✝Hem i mekem solwota i seraot long tu haf,

ples i kam drae,

mo i mekem reva i no moa ron,

nao ol bubu blong yumi bifo

oli wokbaot nomo,

oli gokros long narasaed.

Mo olgeta oli glad tumas

from samting ya we hem i mekem.

7 Bambae hem i stap rul oltaem

long paoa blong hem,

gogo i no save finis,

mo oltaem bambae hem i stap wajem

ol man blong ol narafala kantri.

I nogud ol enemi blong hem

oli traem girap, oli agensem hem.

8 Olgeta man blong evri kantri,

yufala i presem God blong mifala.

Yufala i presem hem

we yufala i singsingaot bigwan.

9 Hem i stap holem mifala i stap laef,

hem i no save letem mifala i foldaon.

10 God,

yu yu bin mekem ol strong fasin long mifala

blong mekem laef blong mifala i klin,

olsem we man i bonem silva

blong tekemaot doti blong hem.

11 Yu letem mifala i foldaon long trap,

we mifala i harem nogud tumas,

olsem we mifala i stap karem ol hevi samting.

12 Yu letem ol enemi blong mifala

oli kam purumbut long mifala,

mo yu mekem we mifala i gotru long faea,

mo long wota we i ron bigwan.

Be naoia,

yu tekem mifala i kam long sefples bakegen.

13 Bambae mi mi mekem ol sakrefaes

long haos* blong yu,

we bambae mi bonem olgeta i bon evriwan

blong mekem wosip long yu.

Bambae mi givim ol samting ya long yu

we mi promes finis blong givim.

14 Hemia ol samting ya

we taem mi stap long trabol,

mi talem se bambae mi givim long yu.

15 Bambae mi bonem ol smol sipsip we oli fatfat gud

oli bon olgeta long olta blong yu.

Bambae mi bonem ol man sipsip,

we smok blong olgeta

bambae i go antap long yu.

Mo bambae mi tekem ol bul mo ol man nani,

mi bonem olgeta blong mekem sakrefaes long yu.

16 Yufala we i stap ona long God,

yufala i kam, yufala i lesin.

Bambae mi talemaot long yufala

ol samting ya we hem i mekem long mi.

17 Mi prea long hem

blong i givhan long mi,

mo mi presem hem,

mi leftemap nem blong hem.

18,19 God i Masta* blong mi,

mo sipos mi haedem ol sin blong mi,

bambae hem i no save lesin long mi.

Be mi mi talemaot olgeta long hem,

nao hem i lesin long prea blong mi,

i harem tok blong mi.

20 Oltaem mi mi stap presem God

from we taem mi mi prea long hem,

hem i no save tanem baksaed long mi,

hem i holemtaet fasin ya blong hem

we oltaem hem i lavem mi tumas.