1 ✝God.

Ol hiten man oli kam insaed finis

long ples ya blong yu,

oli mekem tabu haos* ya blong yu

i no moa tabu,

mo oli smasemgud taon ya Jerusalem.*

2 Oli livim ol dedbodi blong ol man blong wok blong yu

oli stap,

blong ol wael anamol mo ol bigfala pijin ya valja* oli kakae.

3 Oli kilim ol man blong yu,

mo oli mekem

we blad blong olgeta i ron olsem wota.

Long olgeta ples long Jerusalem,

blad blong olgeta i ron olsem wota nomo,

mo i no gat man i stap blong berem olgeta.

4 Ol man blong ol narafala kantri ya

we oli stap raonabaot long mifala

oli stap jikim mifala blong spolem mifala,

oli stap tok nogud long mifala,

mo oli stap laf long mifala.

5 Hae God. ?Olsem wanem?

?Bambae yu stap kros olwe long mifala

gogo i no save finis?

?Bambae yu letem

kros blong yu i stap bon oltaem olsem faea?

6 I gud yu kros long ol man ya blong ol narafala kantri,

we oli no save mekem wosip long yu

mo oli no save prea long yu.

7 Olgeta ya nao oli kilim ol man blong yu,

mo oli spolem ples ya blong yu.

8,9 God,

oltaem yu yu stap sevem mifala.

Plis yu no panisim mifala

from ol sin blong ol bubu blong mifala bifo.

Plis yu sore long mifala.

Naoia, tingting blong mifala i foldaon olgeta.

Plis yu halpem mifala,

yu sevem mifala,

mo yu fogivim mifala,

yu tekemaot ol sin blong mifala,

from we hae nem blong yu

i stap long mifala.

10 I no stret blong ol man ya blong ol narafala kantri

oli stap talem long mifala se,

"?Wehem God ya blong yufala?"

God,

mifala i wantem luk

we bambae yu panisim olgeta,

from we oli kilim ol man blong wok blong yu oli ded,

blad blong olgeta i ron bigwan.

11 Naoia mifala i stap long kalabus,

mo oli jajem mifala finis,

se mifala i mas ded.

Plis yu lesin long krae blong mifala,

yu kam long paoa blong yu,

yu mekem mifala i fri.

12 Masta* long 35.22.,

olgeta ya oli stap sakem ol rabis tok i kam long yu.

Plis yu givimbak fasin ya long olgeta seven taem.

13 Nao bambae mifala i stap talem tangkiu long yu

oltaem nomo.

Mifala i man blong yu,

mifala i sipsip blong yu nomo.

Bambae mifala i stap presem yu oltaem,

gogo i no save finis.