OL SAM 147

Sing blong presem Hae God

(Tok i go long ol man.)

1 Olgeta.

!Yumi mas presem Hae God!

Hem i God blong yumi,

mo i gud yumi singsing blong presem hem,

from we fasin ya i gud tumas,

mo i stret tu.

2 Hae God i stap stanemap Jerusalem* bakegen,

mo i stap tekem ol man blong yumi

we oli stap wok slef* long ol narafala kantri,

oli kambak long ples blong yumi.

3 Hem i stap mekem

olgeta we oli harem nogud,

oli harem gud bakegen,

mo i stap fasem ol soa blong olgeta.

4-6 Hae God i Masta*147.4-6: Masta. Yu luk futnot K long 35.22. blong yumi,

mo hem i hae we i hae.

Hem i makem namba blong ol sta,

mo i putum nem blong olgeta wanwan.

Hem i gat olgeta paoa,

mo man i no save makem waes blong hem.

Hem i stap leftemap olgeta

we tingting blong olgeta i stap daon,

be i stap flatemgud ol man nogud

i godaon long graon.

7 Yumi mas sing long ol singsing

blong presem hem,

yumi mas sing wetem ol gita blong yumi

blong talem tangkiu long hem.

8 Hem i stap putum ol klaod long skae,

mo i stap sanem ren i kam long graon,

mo i stap mekem gras i gru long ol hil.

9 Hem i stap givim kakae long ol anamol,

mo taem ol pikinini blong pijin oli krae,

hem i stap fidim olgeta.

10 Nating we ol hos oli strong blong mekem wok,

mo ol soldia oli no save fraet nating,

be Hae God i no glad long olgeta,

11 hem i glad moa long ol man

we oli stap ona long hem,

mo long olgeta we oli stap trastem hem,

se oltaem hem i lavem man tumas.*147.11: Long sam olfala Oltesteman, namba blong Sam ya i narafala. Yu luk futnot F long en blong Sam 9. Long ol Oltesteman ya, Sam 147 ya i brok long tu haf. Vas wan kasem vas leven, oli kolem Sam 146, mo vas twelef kasem vas twanti, oli kolem Sam 147.

12 Hae God i God blong yumi.

!Yumi ol man Saeon,*

yumi mas leftemap nem blong hem!

!Yumi mas presem hem!*147.12: Tok long las tu haf blong vas ya i folem fasin blong tok long Bislama, be long Oltesteman long lanwis ya Hibru, tok long ples ya i olsem. !Yumi ol man Jerusalem, yumi mas presem hem! !Yumi ol man Saeon, yumi mas presem hem! Long ples ya tufala nem ya Jerusalem mo Saeon tufala i nem blong sem ples nomo.

13 Hem i stap mekem

ol doa* blong stonwol blong yumi

i strong we i strong,

mo i stap blesem yumi evriwan.

14 Hem i stap mekem

kantri blong yumi i stap kwaet,

mo i stap givim ol gudgudfala kakae long yumi

blong i mekem yumi harem gud.

15 Taem hem i givim tok,

wantaem nomo wol ya i obei long hem.

16 Long koltaem, hem i stap mekem

wota blong naet i kam aes,

mo i stap mekem sno

i kam kavremap olgeta ples

olsem blangket.

17 Hem i stap sanem ston blong aes*

i kam plante olsem korel,

nao i no gat man i save stap gud

long koltaem ya we hem i stap sanem i kam.

18 Be taem hem i tok, win i blu,

nao ol aes ya i ronaot, i kam wota,

mo ol reva oli stap ron bakegen.

19 Yumi ol laen* blong Isrel,*

mo oltaem Hae God i stap givim

tok blong hem long yumi,

i stap tijim yumi long ol rod blong hem,

mo long ol tingting blong hem.

20 Hem i no mekem samting ya

long ol man blong ol narafala kantri.

Olgeta ya oli no save nating

ol tingting blong hem.

!Oltaem yumi mas presem Hae God!