1 Hae God.

Mi mi stap presem yu

from we yu yu sevem mi

nao mi mi no ded,

mo yu no letem ol enemi blong mi

oli daonem mi,

nao oli stap glad from.

2 Hae God,

yu yu God blong mi.

Mi mi krae long yu

blong yu givhan long mi,

nao yu yu mekem bodi blong mi

i gud bakegen.

3 Yu yu blokem mi

blong mi no go long Hom* blong ol Dedman,

yu sevem laef blong mi.

4 Yumi ol man blong Hae God

we tingting blong yumi i strong long hem,

yumi sing, yumi presem hem.

Hem i tabu.

Yumi mas tingbaot ol samting ya

we hem i bin mekem,

nao yumi talem tangkiu long hem from.

5 Kros blong hem i save stap smoltaem nomo,

be gudfala fasin blong hem i save stap

gogo laef blong man i finis.

Long naet,

maet man i save harem nogud,

i krae,

be long moning,

i save harem gud, i glad bakegen.

6,7 Hae God.

Bifo, mi harem se mi mi sef,

nao mi talem se,

"Neva wan samting i save winim mi."

Yu yu bin mekem i gud tumas long mi,

yu bin blokemgud mi

olsem wan strong hil blong haed.

Be biaen, yu haedem fes blong yu,

nao mi mi fraet bakegen.

8 Hae God,

long taem ya mi mi singaot long yu,

mi askem long yu

blong yu givhan long mi.

9 Mi talem se,

"?Sipos mi mi ded,

bambae yu yu winim wanem?

?Sipos mi mi godaon

long Hom blong ol Dedman,

wanem gudfala samting

bambae yu yu kasem?

!Ol dedman oli no save presem yu!

Asis blong man i no save talemaot

gudfala fasin ya blong yu

we i no save foldaon samtaem.

10 Hae God,

plis yu harem mi,

yu sore long mi.

Plis yu givhan long mi."

11 Yu yu tekemaot harem nogud blong mi finis,

mo yu mekem mi mi glad

we mi stap danis from.

Yu yu tekemaot ol rabis klos ya finis

we i soemaot we mi mi harem nogud,

mo yu mekem tingting blong mi i fulap glad.

12 Nao from samting ya,

bambae mi no save stap kwaet.

Bambae mi stap presem yu.

Hae God, yu yu God blong mi.

Bambae mi stap talem tangkiu long yu oltaem,

gogo i no save finis.